Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 39

Leza Wavuluka Wandi Mwana

Leza Wavuluka Wandi Mwana

YESU wādidile impolo pāfwile mulunda nandi Lazalasa. Lelo ulanga’mba Yehova wāivwene bibi pāsuswilwe Yesu ne paāfwile?—Bible unena amba Leza ‘ufitwanga ku mutyima’ nansha ‘kutapwa’ na bintu bilongeka.—Mitōto 78:40, 41; Yoano 11:35.

Lelo ukokeja kufwatakanya mobyādi bisanshila Yehova ku mutyima paāmwene mufwila wandi Mwana muswedibwe?—Yesu wādi uyukididile’tu biyampe amba Leza kakamwilwapo. O mwanda mwine kubajinji kwa kufwa, wānene bishima byandi bya mfulo amba: ‘Abe Tata, nalubwila būmi bwami mu maboko obe.’—Luka 23:46.

Yesu wādi uyukile’tu biyampe amba usa kusangulwa, kādipo wa kushibwa “mu kalunganyembo,” ko kunena amba mu kibundu. Yesu pa kupwa kusangulwa, mutumibwa Petelo wāpitulukile mu byobya byālembelwe mu Bible pangala pa Yesu, amba: “Kakashībwapo mu kalunganyembo nansha mubidi wandi kubola’o bubole, mhm.” (Bilongwa 2:31; Mitōto 16:10)  Umbidi wa Yesu kewāijijepo mu kibundu kitatyi kyoubwanya kubola, nansha koneka ne kununka bibibibi.

Pādi Yesu pano pa ntanda, wālombwele bandi bana ba bwanga amba kakashalapo mufwe kitatyi kilampe. Wēbashintulwidile amba ‘ukepaibwa, kupwa ukasangulwa mu difuku dya busatu.’ (Luka 9:22) Nanshi, na bubine bana ba bwanga kebādipo bafwaninwe kutulumuka pa kusangulwa kwa Yesu. Ino le bātulumukile?—Tutale mobyāikadile.

Yesu wafu ku mutyi wa masusu pa nsaa ya busatu ya kyolwa, mu Dya Butano. Yosefa, mpeta umo wa mu Kidye Kikatakata, nandi i mwanā bwanga wa mu bufyafya wa Yesu. Aye pa kuyuka amba Yesu wafu, waenda kudi Pilato, mbikavu mwine Loma. Wamulombe atukije umbidi wa Yesu ku mutyi wa masusu ende akeujike. Kupwa, Yosefa waselela umbidi wa Yesu mu budimi mudi kibundu, momwa mobajikanga bantu bafwe.

Abatūla umbidi mu kibundu, kupwa abakunkulwila dibwe dikatampe dine ku ntambilo. Adyo dyo dyajika ku kibundu. Pano ke difuku dya busatu, ko kunena amba Dya Yenga. Pakifita mwanda dyuba kedyatambile. Kudi bana-balume balama kibundu. Babitobo bakulu bo bebatumine kwikilama. Le uyukile kyobalamina’kyo?—

Babitobo nabo badi bevwana padi panena Yesu amba usa kusanguka. Ino abakatūla balami ku kibundu mwanda wa kutyina amba bana ba bwanga bakāya kwiba umbidi wandi ne kunena amba Yesu wasanguka. Ino mu kitulumukila, nshi ibashilula kuzakala. Mu mfindi’mo, kike kibakemuka’mo. Bine, i mwikeulu wa Yehova! Basola abapungila moyo kebakijina ne kujina kwine. Mwikeulu waiya ku kibundu, watalula’ko dibwe. Bine, mu kibundu i mutupu muntu!

Mwanda waka mu kibundu i mutupu? Le i kika kyalongeka?

Bine, bibalongeka enka na mwānenene mutumibwa Petelo mafuku pa kupita’po amba: “Uno Yesu aye, Leza wamusangula.” (Bilongwa 2:32) Leza wāsangwile Yesu na umbidi wiifwene na owa waādi nao kumeso kwa aye kwiya pano pa ntanda. Wāsangwilwe na umbidi wa ku mushipiditu udi pamo na wa bamwikeulu. (1 Petelo 3:18)  O mwanda Yesu wadi wilongela ngitu ya bu muntu shi kasake bantu bamumone. Le ye mwaalongela pano?—Tutale bidi.

Dyuba pano dibatambe. Bashidika abaenda. Madia Madaleni, ne bana-bakaji bakwabo bana ba bwanga ba Yesu nabo papo benda ku kibundu. Benda besamba amba: ‘Lelo i ani uketukunkulwila’ko dibwe dilēma nabya’dya?’ (Mako 16:3) Ino abo pa kufika ku kibundu, abatana dikunkulule’ko kala. Kadi kutala nenki, mu kibundu mutupu! Bine, umbidi mufwe wa Yesu ne kowaya jimejime! Ponka’po Madia Madaleni wavukula lubilo kaenda kudi batumibwa ba Yesu bamobamo.

Bana-bakaji bakwabo abashala ku kibundu. Kebeipangula’mba: ‘Le mubidi wa Yesu udi kwepi?’ Na mu kukopa kwa diso, kubebatambila bantu babidi bavwele bisandi bikelema. Bine, i bamwikeulu! Kebanena bana-bakaji’ba amba: ‘Le kyomukimbila Yesu kuno i kika? Wasanguka mu lufu. Endai lubilo mukasapwile bandi bana ba bwanga.’ Bine, fwatakanya’po bidi lubilo lwanyema bano bana-bakaji! Abo bakyenda mu dishinda, abesambakana na mwana-mulume umo. Le uyukile i ani?—

Bine, i Yesu, wavwala umbidi wa bu muntu! Nandi wasapwila bana-bakaji’ba amba: ‘Endai mukasapwile bami bana ba bwanga.’ Bana-bakaji abasepelela byamwiko. Abakatana bana ba bwanga kebebasapwila amba: ‘Yesu i mūmi! Twadi tubamunone!’ Madia wapu kala kulombola ba Petelo ne Yoano amba mu kibundu i mutupu. Pano abakatale’ko, enka momwena pa kifwatulo’pa. Kebatale bisandi bya bukonge byobadi bapombele Yesu, ino mwa kwitabijija bibebapu ñeni. Bibasakila betabije amba Yesu pano ke mūmi monka, ino bikibakolela kwitabija amba i bya bine.

I bika padi bilanga ba Petelo ne Yoano?

Kitatyi pa kupita’po, enka mu Dya Yenga’mo, Yesu wamwekela bandi bana ba bwanga babidi mu dishinda pobadi benda ku kibundi kya Emese. Yesu kaenda wisamba nabo, ino kebamujingulwilepo mwanda kakidipo na ngitu ya muswelo umo na yaādi nayo dibajinji. Abajingulula Yesu enka pa kudya pamo nabo ne pa kulombela. Bine,  bana ba bwanga abakunkwa ku mutyima bininge kebeyumbija kujokela ku Yelusalema konso ne bula! Padi kinondanonda na pano, Yesu wamwekela Petelo mwanda wa kumulombola amba i mūmi.

Kupwa mu dyonka dya Yenga’mo kyolwa, bana ba bwanga bavule abebungila mu kyumba kimo. Milango papo mishitwe mbū. Bine’nka na mu kukopa kwa diso, Yesu au kadi pamo nabo mu kyumba! Pano abayukididila’tu amba Mufundiji Mukatampe i mūmi binebine. Langa’po bidi mobasangela!—Mateo 28:1-15; Luka 24:1-49; Yoano 19:38–20:21.

Pano ke mafuku 40 matuntulu Yesu umweka na imbidi mishileshile ya bu muntu mwanda wa kulombola bandi bana ba bwanga amba  i mūmi. Kupwa wataluka pano panshi ne kujokela kudi Shandi momwa mūlu. (Bilongwa 1:9-11) Kepejije kala bana ba bwanga kebasapwila bantu bonso amba Leza i musangule Yesu mu bafu. Nansha babitobo bebakupila ne kwipaya’ko bamobamo, kebalekele’byopo kusapula. Mwanda bayukile amba nansha shi abafu, Leza ukebavuluka pamo’nka na mwaadi wavulukila wandi Mwana.

Pa kitatyi kya mwaka kyāsangwilwe Yesu, le bavule balañanga namani? Ino abe ulanga’po namani?

Bine, balondi babajinji ba Yesu i beshile kulampe kwine na bantu bavule dyalelo! Mu matanda amo bantu balañanga enka myanda ya tululu twa Pasaka ne mai a Pasaka mapente senene pa kitatyi kya mwaka kyāsangwilwe Yesu. Inoko Bible kanenenepo nansha kamo kene pa myanda ya tululu ne mai a Pasaka. Ino Bible inenanga myanda ya kwingidila Leza.

Tubwanya kwifwana bana ba bwanga ba Yesu shi netu tusapwila bantu amba Leza wālongele kintu kya kutendelwa paāsangwile wandi Mwana. Ketudipo ne kyotukakwatyilwa moyo nansha shi bantu banena amba basa kwitwipaya. Nansha shi twafwa, Yehova uketuvuluka ne kwitusangula, monka mwaāsangwidile Yesu.

Mwene netu tubasangala pa kuyuka amba Leza uvulukanga boba bamwingidila ne amba ukebasangulanga mu bafu?—Kuyuka kotwayuka bino bintu kufwaninwe kwitupa mutyima wa kusaka kuyuka mwanda waka tufwaninwe kusangaja mutyima wa Leza. Le wadi uyukile kala amba tukokeja kumusangaja?—Tusa kwisambila’po mu shapita ulonda’ko.

Kwitabija lusangukilo lwa Yesu kukaningisha lukulupilo lwetu ne kukomeja lwitabijo lwetu. Tanga’po bidi Bilongwa 2:22-36; 4:18-20; ne 1 Kodinda 15:3-8, 20-23.