Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 27

Lelo Leza Obe I Ani?

Lelo Leza Obe I Ani?

MWANDA waka kino kipangujo kipangulwa amba, Lelo Leza obe i ani, i kipangujo kya mvubu mpata?—Mwanda bantu batōtanga baleza bangibangi. (1 Kodinda 8:5) Pāikele mutumibwa Polo kutambula bukomo bwa kundapa muntu wādi kaendele kashā, bantu bātulwile diwi kebanena’mba: “I baleza ke bēalamuna umbu-bantu, betutūkila pano!” Bantu bādi kebasake kutōta ba Polo ne mulunda nandi Banabasa. Bāinika Polo dya bu Mekyule, Banabasa nandi bu Yupita, ano ādi majina a baleza ba mabela.

Inoko ba Polo ne Banabasa kebādipo bakokeja kuleka bantu bebatōte. Bānyemena monka mu bukata bwa kibumbo, kebanena’mba: ‘Vundaminai byobya bityani muvundamukile kudi Leza mūmi.’ (Bilongwa 14:8-15) Lelo “Leza mūmi,” wāpangile bintu byonso i ani’le?—Bine, i Yehova, ‘Mwine Mukatakata Mwine pano pa ntanda ponsololo.’ Yesu wāityile Yehova bu “Leza wabinebine kasuku.” Penepo nanshi, le i ani ufwaninwe kutōtwa kasuku kandi?—I enka Yehova kete!—Mitōto 83:18; Yoano 17:3, MB; Kusokwelwa 4:11.

Mwanda waka ba Polo ne Banabasa bāpeleje bantu kwivukwila kobadi?

Bantu bavule batōtanga baleza bakwabo pa kyaba kya “Leza wabinebine kasuku.” Batōtanga nyeke bintu byobepungila abo bene, bya mityi, bya mabwe, nansha bya byuma. (Divilu 32:4-7; Levi 26:1; Isaya 44:14-17) Nansha ke bana-balume ne bana-bakaji bekalanga bankanka betwanga byaba bikwabo bu baleza, babingwa, nansha kutōtwa bu bankishi. Lelo i biyampe kwibatumbija ntumbo?—

Solo pa kupwa kwikala ke mutumibwa Polo, wāsonekele amba kudi “bakusabibwa meso a mutyima kudi Leza wa panopantanda, boba bakubulwa kwitabija.” (2 Kodinda 4:4) Le uno leza i ani?—Bine, i Satana Dyabola! Satana udi na bukomo bwa kufikija bantu ku kutōta milwi ne milwi ya bantu ne bintu.

 Satana paātompele kunena Yesu amba amufukatyile ne kumutōta, lelo Yesu wāsapwidile Satana bika?—Amba: “Ukafukatyila kutōta’nka Yehova Leza obe. E yenka ōkēngidila mīngilo.” (Mateo 4:10) Pa kino Yesu wālombwele patōka amba butōtyi i bwa kutōta enka Yehova kete. Leka bidi tutange mwanda wa bansongwalume bamo bādi bayukile kino. Majina abo i ba Shadelake, Meshake, ne Abedenengo.

Bano bansongwalume Bahebelu bādi ba mu muzo wa Leza wa Isalela ne bāselelwe bu misungi mu ntanda ya Babiloni. Mulopwe witwa bu Nebukaneza wāshimikile’mo nkishi wa nsahabu (olo) mukatakata. Difuku dimo wāsoñanya amba shi byombanwa bibavuma, muntu yense ufwaninwe kufukatyila nkishi’wa. Wādyumuna’mba: ‘Yewa kevukwilapo kutōta ukelwa umbukata mwa nkelwa ya mudilo utēma.’ Shi wādi abe, longa wālongele’po namani?—

I kika kyapelela bano bantu kufukatyila nkishi?

 Ba Shadelake, Meshake, ne Abedenengo bādi balonga nyeke kintu kyonso kibasoñanya mulopwe. Ino bāpelele kufukatyila nkishi. Le uyukile kyobāpelele?—Mwanda kijila kya Leza kinena’mba: ‘Kokekala ne baleza bakwabo pondi. Kokepungila nkishi kadi kokamufukatyila.’ (Divilu 20:3-5) Nanshi ba Shadelake, Meshake, ne Abedenengo bākōkele kijila kya Yehova pa kyaba kya kukōkela mbila ya mulopwe.

Mulopwe wāyulwa bulobo byamwiko, ponka’po wākaseleja bansongwalume Bahebelu basatu’ba bāletwa kwadi. Kāipangula’mba: ‘Lelo i bine amba kemwingidilangapo baleza bami? Nsa kwimupa’ko katōkwe kakwabo. Pano shi mubaivwana kuvuma kwa byombanwa, mwivukwilei ne kutōta nkishi onapungile. Ino shi kemutōtelepo, mukelwa umbukata mwa nkelwa ya mudilo utēma; lelo i leza’ka ukemunyongolola mu makasa ami, a?’

Lelo bano balumyana basatu bādi ba kulonga namani? Shi wādi abe, longa wālongele’po namani?—Abo bāsapwidile mulopwe amba: ‘Leza wetu otwingidila ukokeja kwitunyongolola. Ino nansha shi ketunyongolwelepo, ketukengidilapo baleza bobe, nansha kutōta nkishi obe wa nsahabu.’

Mulopwe wāyulwa bulobo byamwiko. Wāsoñanya’mba: ‘Kabijai nkelwa misungu isamba-ibidi, kutabuka ne moikabijibwanga mafuku onso!’ Ebiya wasoñanya bantu bandi bakomokomo kukuta Shadelake,  Meshake, ne Abedenengo, ne kwibela mu nkelwa! Nkelwa byoyākabile bibibibi, lubimbi lwa mudilo lwāipaya bantu ba mulopwe’ba! Le Bahebelu basatu’ba nabo?

Ba Shadelake, Meshake, ne Abedenengo bāponene bakutwe umbukata mwa mudilo utēma. Ino kupwa bāimana bwimwa! Kebātemenepo. Ne kadi kebākidipo bakutwe monka. Le kino kyābwanikile muswelo’ka?—Mulopwe wātala mu nkelwa, ebiya byaāmwene byāmulengeja moyo mpata. Kāipangula’mba: ‘Mwene twadi tubaela bantu basatu umbukata mwa mudilo?’ Bengidi bandi amba: “I amo, abe mulopwe.”

Yehova wāpandije bengidi bandi mu nkelwa ya mudilo muswelo’ka?

Kupwa mulopwe kanena’mba: ‘I! talai! ami namone bantu baná, bananga umbukata mwa mudilo, kadi mudilo keusokelepo nansha muntu umo mwine.’ Le uyukile muntu wa buná’wa wādi ani?—Wādi mwikeulu wa Yehova. Wākingile Bahebelu basatu’ba kutyina’mba bakatema.

Ebiya, mulopwe pa kumona nabya, wāfwena pabwipi na kyakanwa kya nkelwa, kāite na diwi ditunduke amba: “Shadelake, ne Meshake, ne Abedenengo, banwe bengidi ba Leza Mukatakata Mwine, lupukaimo, mwiyei kuno!” Pobātambile’mo, bantu bonso bebamona bampikwa  kutema nansha pamo pene. Nansha luvumba lwa mudilo kununka pobadi mpika. Penepa kadi mulopwe kānena’mba: ‘Leza wa Shadelake, ne Meshake, ne Abedenengo, atōtwe, watuma mwikeulu wandi kunyongolola bengidi bandi, mwanda kebatōtelepo leza ungi, shi ani, shi ani, poso’nka Leza wa abo bene.’—Danyele, shapita wa 3.

Dyalelo, i bankishi’ka bobatumbija ntumbo kudi bantu?

Netu tubwanya kuboila ñeni pa kino kyālongekele’ki. Nansha ke dyalelo dine bantu bakipuñanga byelekejo, nansha bankishi ba kutōta. Dibuku dimo (The Encyclopedia Americana) dinena’mba: “Lwembela nansha ndalapo, nayo i ijila, pamo’nka bwa musalaba.” Byelekejo bibwanya kwikala bya mityi, bya mabwe, bya byuma, nansha bya bisandi. Bana ba bwanga babajinji ba Yesu kebādipo batōta mbikavu mwine Loma, kadi mulembi wa mānga Daniel P. Mannix unena pa uno mwanda amba kino kibwanya kudingakanibwa pamo na “kupela kukupidila ndalapo buzu nansha kupituluka mu mpiko ya kukōkela buludiki.”

Shi ke pano, le ulanga amba ku meso a Leza kebidipo na mwanda shi kyelekejo kya mutōtelo kampanda i kipungwe na kisandi, dibwe, nansha kilonda?—Lelo i kyendele’mo mwingidi wa Yehova kutōta kyelekejo kya uno muswelo?—Ba Shadelake, Meshake, ne Abedenengo kebēkitōtelepo, o mwanda Yehova nandi wēbatōkelwe mutyima. Le i muswelo’ka obwanya kwiula kimfwa kyabo?—

Boba bengidila Yehova kebabwanyapo kutōta muntu mukwabo nansha kintu. Tanga binenwe pa uno mwanda mu Yoshua 24:14, 15, 19-22; Isaya 42:8; 1 Yoano 5:21; ne Kusokwelwa 19:10.