Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 19

Lelo I Biyampe Kūmana?

Lelo I Biyampe Kūmana?

LE UYUKILE bansongwalume nansha bansongwakaji basenswe bya kwiyuja kadi ba lonji?—Lelo usenswe kwikala nabo kisense’ni? Nansha usenswe kwikala pamo na muntu muyampe kadi usaka ndoe?—Mufundiji Mukatampe wānene amba: “Dyese dyo dyabo boba ba kupwanya, ke-bantu abo bakatelwanga bu-bāna ba Leza.”—Mateo 5:9.

Inoko dimodimo bantu bakwabo baloñanga bintu bitukwatyija nsungu. Mwene i amo?—Pa kino tukokeja kwikala na mutyima wa kwibalubwila kinongo. Dyuba dimo, kino kyāfikīle ne bana ba bwanga ba Yesu pobādi benda ku Yelusalema. Ivwana nkusapwile mobyāpityile.

Pobāendele’mo’tu kakyaba, Yesu wābadikije bandi bana ba bwanga bamo ku kibundi kya Samadia kukakimba’ko kyaba kya kukōkolokelwa. Ino bantu ba ku kyokya kibundi kebādipo basaka kwibatambula’mo, mwanda bene Samadia bādi na mutōtelo mukwabo. Kadi kebādipo basaka muntu nansha umo wenda kukatōta ku kibundi kya Yelusalema.

Lelo ba Yakoba ne Yoano bādi basaka kulubwila bene Samadia kinongo namani?

 Shi wādi abe obālongele nankyo, longa wālongele’po namani? Lelo longa nsungu yākukwete? Le wādi wa kusaka kwibalubwila kinongo?—Ye kyo kyāsakile kulonga bano bana ba bwanga, ba Yakoba ne Yoano. Bānene Yesu amba: “Lelo uswile tunene mudilo utūke mūlu kwibaloteja fututu?” Bine, ke kya kutulumukapo shi Yesu wēbetyile bu Bana ba Kukungula bwa Mvula! Inoko Yesu wēbasapwidile amba ke biyampepo kulonga bantu owa muswelo.—Luka 9:51-56; Mako 3:17.

Na bubine bitatyi bimo bantu bakokeja kwitulongela byampikwa kwendela’mo. Padi banuke bakwabo kebakasakepo batwe kukaya nabo mu abo makayo. Bakokeja’nka ne kunena’mba: “Ketwimusakilepo pano.” Shi abetulonga kintu kya uno muswelo, kibwanya kwitusansa, mwene i amo? Tukokeja kwikala’nka ne na mutyima wa kusaka kwibajokejeja byobetulonga’bya. Ino le tufwaninwe kwibajokejeja’byo?—

Le ubulwe’po bidi kuyata Bible obe? Tupūtule mu Nkindi shapita 24, vese wa 29. Tutanga’mo amba: “Kokanena’mba: Nkamulonga monka mwanongela ami; nkalubwila muntu’wa mwendele mwingilo wandi.”

Le kino kishintulula namani kodi?—I kunena amba ketufwaninwepo kujokeja kinongo. Ketufwaninwepo kusanshija muntu mwanda’po’tu nandi wetusanshija. Ino le ukalonga namani shi muntu ukukolomona amba mūmane nandi? Padi wakukwatyija nsungu na kukushola mutonko. Padi wakufutulula na kukusepa amba ubatyina. Kimfwa shi wakwita bu kisenga kidi na moyo. Le ukalonga’po namani? Lelo ukaloba kala koūmana nandi?—

Tutalei monka kinena’po Bible. Pūtula mu Mateo shapita 5, vese 39. Yesu unena’mo amba: “Kemutwala na mubi lupata mhm, nanshi wakukukupila kutama kumo nabya mwalwije ne kukwabo.” Molangila, le i kika kyādi kisaka kunena Yesu pano? Lelo wādi usaka kunena amba shi muntu wakukupila kikoni ku ditama dimo, ufwaninwe kumuleka akukupile ne ku dikwabo dine?—

Ehe, Yesu kādipo nansha dimo usaka kunena nankyo. Kukupilwa kunenwe pano i kwishile na kukupilwa kikoni. Ako kuno i kutononwa  nansha kukununwa. Muntu ukokeja kwitukupila namino mwanda wa kwitusomba tūmane. Kyasaka i nsungu itukwate. Le shi netu tubakwatwa nsungu, twamutonona nansha kumukununa, le bikafula namani?—Kepabulwe padi tukekupididila.

Inoko Yesu kādipo usaka bandi bana ba bwanga bōmane. O mwanda mwine wānene amba shi muntu wetukupila, ketufwaninwepo netu kumujokejeja. Ketufwaninwepo kukwatwa nsungu ne kūmana nandi. Shi tūmane, nabya tubamwekeja amba netu ketudipo biyampe pamo’nka bwa yewa washilulanga lūma.

Shi kavutakanya kabashilula, molangila le i kika kiyampe mpata kulonga?—I kusonsoloka’po. Padi muntu’wa ukakutonona nansha kukukununa misunsa mikwabo. Inoko bikokeja padi kufudila’nka papo. Shi  ubasonsoloka’po, ke kunenapo amba wi muzoze. Ko kunena amba udi na bukomo bwa kulonga byoloke.

Le tufwaninwe kulonga bika shi muntu ukimba kūmana netu?

Inoko bikekala namani shi waūmana ne kushinda mukwenu? Le kupwa bikapita namani?—Yewa owakupila ukokeja kukaloba balunda nandi. Babwanya’nka ne kukupola kimutyi nansha kukutapa lupete. Shi ke pano, mwene ubamone kyādi kitupelejeja Yesu kūmana?—

Le tukalonga namani shi twamona bantu bōmana? Lelo tufwaninwe kwitabila muntu kampanda nansha kankenge?—Bible witusapwila kyokya kyoloke. Pūtula mu Nkindi shapita 26, vese wa 17. Unena’mba: “Yewa upita kwiela ku lūma ke lwandipo, i pamo’nka bwa muntu ukwata mbwa [ku] matwi.”

Lelo kutwela mu ñuma ya bene i pamo na kukwata ku matwi a mbwa namani? Bakokeja kukusanshija, nanshi leka’byo!

Le mbwa uloñanga namani shi ubamukwata ku matwi? Bikalanga bisansa mbwa’wa, kadi ukokeja’nka ne kukusuma, mwene i amo? Mbwa pa kwisunya bininge amba asomboloke, nobe papo ukamukwatyidila bininge ku matwi, nabyo po pene bikalobeja mbwa bikata. Shi umulekelele, kakabulwepo padi kukusuma bisansa. Ino le ukokeja kwimana’nka ponka’pa kasha umukwata ku matwi lonso?—

Na bubine, ano o makambakano otubwanya kutanwa’mo shi twikuja mu lūma lwa bene. Padi ketuyukile ne washilulanga lūma mwine nansha kine kyobōmena. Padi yewa obakupila’wa i mwibe kintu kya mukwabo. Shi tumwitabile, nabya tubakwasha ngivi. Ke biyampepo, mwene i amo?

 Byobidi nankyo, le ukalonga namani shi wamona bantu bōmana?—Shi i ku masomo, ukokeja kuketa mwadimu lubilo. Ino shi ke ku masomopo, ubwanya kwita mbutwile obe nansha bampulushi. Bine, nansha shi bantu bakwabo basaka kūmana, batwe tufwaninwe kwikala ba kupwanya.

Le ukalonga namani shi wamona bōmana?

Bana ba bwanga ba bine ba Yesu baloñanga bukomo bwabo bonso kutyina’mba bakatwela mu ñuma. Shi tulonga namino, tulombolanga amba twi bakomo mu kulonga byoloke. Bible unena amba ku mwanā bwanga wa Yesu ‘lūma i kijila, ino ekale wa kikōkeji ku bonso.’—2 Temote 2:24.

Shi ke pano tutale madingi makwabo mayampe aketukwasha tunyeme ñuma: Loma 12:17-21 ne 1 Petelo 3:10, 11.