Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 21

Lelo Tufwaninwe Kwitatwila Bintu Kampanda?

Lelo Tufwaninwe Kwitatwila Bintu Kampanda?

LELO kwitatula i kulonga namani? Le wikuyukile?—Tala kino kimfwa. Lelo kodi mutompe kulonga kintu kampanda kyokuyukile mwa kwikilongela senene? Padi kodi mutompe kutuma nansha kupoba futu. Nansha kadi padi kodi mutompe kukaya makayo a kutumbuka monji. Lelo kudi muntu wadi ukusepa’mba: “Aha! Ha! Ha! Ami’wa mbwanya kukaya senene kukupita”?—Bine, yao muntu wadi witatula.

Le wivwananga ku mutyima namani shi bakwenu betatula? Le bikusangajanga?—Penepa, ulanga namani shi nobe witatula, le bakwenu nabo bakevwana namani ku mutyima?—Lelo i kiyampe kusapwila muntu amba: “Ami’wa ne muyampe mpata kukutabuka”?—Lelo Yehova usangelanga bantu balonga nankyo?—

Mufundiji Mukatampe wādi uyukile bantu bādi belangila bu bayampe mpata kutabuka’ko bakwabo. Bādi betatula, nansha kwianya abo bene, bamona bakwabo bonso bu badi panshi. O mwanda mwine Yesu wēbasekunwinine lusango lumo lwa kwibalombola amba i kibi kwitendela abo bene. Ivwana molunenena.

Lusango lwine lunenena pa Mufadiseo umo ne usonkeja musonko umo. Ino, Bafadiseo bādi bafundiji ba bipwilo, ne pavule pene bādi balonga bintu mu muswelo wa kwimwekeja bu boloke mpata nansha bu bajila kupita’ko bantu bakwabo. Mufadiseo wa mu lusango lwa Yesu’o wāendele kukalombela ku tempelo ya Leza mu Yelusalema.

Mwanda waka Leza wāsangedile usonkeja musonko, ino Mufadiseo mpika?

Yesu amba usonkeja musonko nandi wākalombele konka ku tempelo. Bantu bavule kebādipo basenswe basonkeja musonko. Bādi bamona amba basonkeja musonko bādi batompa kwibadimba. Ne i kya bine, basonkeja musonko bavule bādi divule ba budimbidimbi.

 Mu tempelo’mo, Mufadiseo’wa wāshilula kulombela Leza namino amba: ‘Abe Leza, nakufwija’ko mwanda ami nkidipo kipya-mambo pamo bwa bantu bakwabo. Nkidimbangapo bakwetu nansha kwibalongela bintu bibi kwine mpika. Nkidipo pamo bwa uno usonkeja musonko uno’u, mhm. Ami’wa ne muntu moloke. Nshikilwanga na nzala ku yenga mafuku abidi, ku yenga mafuku abidi, mwanda’tu wa kwikala na kitatyi kivule kya kukulanga abe. Kadi nambulanga mu tempelo kintu kyo-kyonso kya dikumi kyomonanga.’ Na bubine uno Mufadiseo wādi ulanga amba aye i muyampe mpata kupita’ko bakwabo, Mwene i amo?—Kadi wādi usapwila’byo ne Leza.

Inoko usonkeja musonko kādipo namino. Kāsakilepo nansha kutulula meso andi kutala’o mūlu paādi ulombela. Wāimanine kulampe, kasha ubandika mutwe panshi. Usonkeja musonko wāivwene mutyima kusansa pa mwanda wa bubi bwandi, penepo kāikupila pa kyadi kyandi na njia. Kātompelepo kusapwila Leza mwaikadile muyampe. Ino wādi kalombela’mba: ‘Abe Leza, mfwile’ko lusa ami kipya-mambo.’

Mofwatakenya i wepi pa bano bantu babidi wāsangeje Leza? Le i Mufadiseo wādi wilangila amba i muyampe kupita’ni? Nansha i usonkeja musonko, wāivwene mutyima kusansa pa mwanda wa bubi bwandi?—

Yesu wānenene amba usonkeja musonko ye wāsangeje Leza. Mwanda waka? Yesu wāshintulwile amba: ‘Mwanda yewa wakutompa kwimwekeja bu muyampe kupita bantu bakwabo ukapēlulwa. Ino yewa wa kwipēleka ku meso a aye mwine nabya ukalēmekwa.’—Luka 18:9-14.

 Lelo i bufundiji’ka bwāfundije Yesu mu luno lusango?—Wādi ufundija amba i bibi kufwatakanya amba batwe twi bayampe kupita bakwetu. Ketukokejapo padi kunena amba twilangilanga bu bayampe, ino bilongwa byetu bikokeja kulombola amba twilangilanga bu bayampe. Lelo nobe ye molongelanga?—Tala byātene mutumibwa Petelo.

Yesu paālombwele bandi bana ba bwanga amba bakamunyema pobakamukwata, Petelo wēaninye amba: ‘Nansha shi bonsololo’tu bakushiye, ami nkikakushiyepo nansha dimo!’ Bine Petelo wādi wiongola. Aye wādi mwikulupile aye mwine bipitepite. Ino wānyemene Yesu. Inoko, wāalamukile pa mutyima, na motukefundila’kyo mu Shapita wa 30 wa dino dibuku.—Mateo 26:31-33.

Tala kimfwa kya mu ano mafuku. Padi ku masomo bakokeja kwimwipangula’ko bipangujo pamo na omufundanga nandi. Le ukemona namani shi abe’wa ubwanya kulondolola bukidibukidi, ino mwanā masomo mukwenu kubwanya’byo mpika? Na bubine, shi abe uyukile malondololo ukeivwana biyampe. Ino lelo bikekala biyampe shi kowidingakanya na yewa wija pa kulondolola?—Lelo i byendele’mo kwitendela amba ami ndi biyampe ino mukwetu udi bibi?—

Kino ye kyo kyālongele Mufadiseo’wa. Wādi witatula amba aye i muyampe kutabuka usonkeja musonko. Inoko Mufundiji Mukatampe wānene amba Mufadiseo’wa wēongwele. Kunena na bubine, muntu ubwanya kulonga kintu kampanda biyampe kupita’ko mukwabo. Inoko ke kunenapo amba aye ye utabukile binebine bantu bonso.

Shi uyukile bivule kupita mukwenu, lelo kyakyo kyo kikwikadija bu muntu upityile muntu ye-yense?

Byobidi nankyo, shi tuyukile bivule kupita’ko muntu mukwabo, lelo bwabo bo bubinga bwa kwitatwila?—Langa’po bidi. Lelo i batwe bene balongele buongo bwetu?—Ehe, Leza ye wētupele batwe bonso buongo. Kadi bintu bivule byotuyukile, twi befundile’byo ku muntu mukwabo. Padi kudi bintu byotutangile mu dibuku kampanda. Nansha kadi kepabulwe i muntu kampanda wetusapwidile’byo. Nansha shi i kintu kyotwiyukīle batwe bene, le twikiyukile namani?—I amo, i pa kulanga na buongo bwitupele Leza.

 Shi muntu walonga buninge ino kalongelepo senene, i biyampe abe umunene binenwa bimukankamika mu bidyoma. Musapwile amba abe usangedile kyawalonga’kya. Padi ubwanya enka ne kumukwasha alonge biyampe kupita penepa. Nobe usakanga bantu bakulongela nabya, mwene i amo?—

Mwanda waka i bibi kwitatula shi tudi na lukupa kupita muntu mukwabo?

Bantu bamo badi na lukupa kupita’ko bakwabo. Le ukalonga namani shi udi na lukupa kupita mwanenu mwana-mulume nansha mwana-mukaji? Lelo bo bubinga bwa abe kwitatwila?—Ehe, ke amopo. Bidibwa byotudyanga byo bitutamija na bukomo. Kadi Leza ye upānanga mwinya, mvula ne kintu kyonso kisakibwa pa kutamija bidibwa, mwene i amo?—Nanshi shi tutama na bukomo, tufwaninwe kufwija’ko Leza.—Bilongwa 14:16, 17.

Umbukata mwetu kekudipo usangelanga muntu wianya, mwene i amo?—Tuvuluke’ko binenwa bya Yesu, bya amba: ‘Monka momusakila bantu bemulongele, nenu mwibalongelei’nka nabya.’ Shi tulonga namino, nankyo ketukefwanapo kashā yewa Mufadiseo wādi witatula wa mu lusango lwāsekunwine Mufundiji Mukatampe.—Luka 6:31.

 Difuku dimo muntu umo wāityile Yesu bu muyampe. Lelo Mufundiji Mukatampe wānene amba, ‘Eyo, ami uno muyampe’?—Ehe, kānenepo nankyo. Ino aye wānene amba: “Kutupu muyampe poso Leza enka.” (Mako 10:18) Mufundiji Mukatampe wādi binebine mubwaninine, ino kētatwilepo. Inoko waādi utendela mitendelo yonso i Shandi Yehova.

Pa kino, lelo kudi muntu kampanda otubwanya kutendela?—Eyo, udi’ko. Tubwanya kutendela Umpangi wetu, Yehova Leza. Kitatyi kyotubandila buya bwa mikejima ya kupona kwa dyuba nansha kintu kikwabo kitendelwa kya mu bupangi, tukokeja kulombola muntu kampanda amba, ‘Leza wetu wa kutendelwa, Yehova, ye wālongele bino bintu!’ Nanshi twikalei nyeke beteakanye kwisambila pa bintu bikatakata bilongele kala Yehova ne byobya byakalonga mu mafuku a kumeso.

Lelo i kika kianinya uno mwanuke?

Tutange binena Bisonekwa pa bitala kwitatula, nansha kwianya, ne kadi tuyuke muswelo otufwaninwe kwepuka kwitendela batwe bene: Nkindi 16:5, 18; Yelemia 9:23, 24; 1 Kodinda 4:7; ne 13:4.