Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 30

Bukwashi bwa Mwa Kupwila Moyo Wetu

Bukwashi bwa Mwa Kupwila Moyo Wetu

LELO kwingidila Yehova kukupēlelanga?—Mufundiji Mukatampe kānenepo amba bipēla. Bufuku bulondakana na dyawāipailwe, wāsapwidile batumibwa bandi amba: “Shi bapanopantanda abēmushikwe, nanshi yukai bidi byo babadikila kunshikwa ami.”—Yoano 15:18.

Petelo wētatwile amba nkikanyemapo Yesu, ino Yesu wānena amba Petelo ukamutuna misunsa isatu mituntulu bwine bufuku’bwa amba nkimuyukilepo. Ne bine Petelo wāmutunine! (Mateo 26:31-35, 69-75) Lelo Petelo wāmutunine’byo namani?—Petelo wāmutunine mwanda wākwetwe moyo, monka mwākwatyilwe’o batumibwa bakwabo.

Lelo uyukile mwanda waka batumibwa bākwetwe moyo?—Mwanda bākomenwe kulonga kintu kya mvubu mikatampe mpata. Kuyuka kino kuketukwasha tumwingidile Yehova, nansha shi betulonga bika nansha kwitunena shi bika, shi bika. Ino pa kushilula, tutalei bidi byālongekele mu bufuku bwa mfulo bwādi Yesu pamo na batumibwa bandi.

Dibajinji abadīla pamo masobo a Pashika. Pashika byādi bidibwa bishile na bikwabo mwanda byādi bidibwa mwaka ne mwaka mwanda wa kuvuluja bantu ba Leza kukūlwa kwabo mu bupika bwa Edipito. Kupwa Yesu wāshilula nabo bidibwa bikwabo bishile na bikwabo byonso. Tukesambila’po mu shapita wa kumeso ne kushintulula mwanda waka bino bidibwa bituvuluja Yesu. Pa kupwa kudya bino bidibwa ne kupwa Yesu kukankamika batumibwa bandi, waenda nabo ku budimi bwa Ngesemani. Kino i kifuko kyobaswele mpata kadi ko kobanangilanga pavule pene.

 Yesu wetolwela pa bunka bwandi mu budimi’mwa kalombela. Kadi wanena ba Petelo, Yakoba, ne Yoano nabo balombele. Inoko abo abaponena mu tulo bukū. Misunsa isatu mituntulu Yesu wetolwela pa bunka bwandi kulombela, bine, kadi pajoka misunsa isatu yonso’ya, watana Petelo ne bakwabo mu tulo! (Mateo 26:36-47) Lelo uyukile kine kyobadi bafwaninwe kukeshesha na milombelo?—Twisambile’po bidi.

Mwanda waka ba Petelo, Yakoba, ne Yoano badi bafwaninwe kukesha?

Yudasa Isakadiota wādile bidi Pashika pamo na Yesu ne batumibwa bakwabo mu kyolwa’mwa. Nalanga ubavuluka, Yudasa wāikele ke ngivi. Pano napo kadi waaba Yesu. Aye uyukile kifuko kya mu budimi bwa Ngesemani kwitaninanga pavule pene Yesu na batumibwa Bandi. Ebiya Yudasa waiya konka ne basola ba kukwata Yesu. Abo pa kufika, Yesu webepangula’mba: “Le o musaka i ani?”

Basola abalondolola’mba: tukimba “Yesu.” Yesu kakwetwepo moyo, webalondolola’mba: “Ami uno.” Basola ababezemuka bikata pa mwanda wa bukankamane bwa Yesu penepo kebetole kimvunda-nyuma ne kupona abapone panshi. Ebiya Yesu amba: ‘Shi i ami omukimba, nanshi lekai’ko batumibwa bami beendele.’—Yoano 18:1-9.

Basola pa kukwata Yesu kebamukute, batumibwa abakwatwa moyo, kebanyema lubilo. Inoko ba Petelo ne Yoano abasake kumona mobipityila, kebenda balonda koku bekele’ko ka kyaba kalampe. Ku mfulo, abafikija Yesu ku njibo ya kitobo mukatampe, Kaifasa. Yoano byobamuyukile kala kudi kitobo mukatampe, kalama wamutweja aye ne Petelo mwine munda mwa kipango.

Babitobo kebafike kala ku njibo ya Kaifasa mwanda wa kusambija Yesu. Basaka Yesu epaibwe. O mwanda mwine abapaye batumoni ba kumubepela bubela. Bantu kebakupila Yesu bikoni ne mapi. Papita bino byonso’bi, Petelo udi pabwipi ponka.

Nsongwakaji, kalama watwejanga ba Petelo ne Yoano’wa, wajingulula Petelo. Kamunena’mba: “Abe nobe wadi ne Yesu”! Inoko Petelo  watune Yesu amba nkimuyukilepo nansha dimo. Pabapite kakyaba katyetye, nsongwakaji mukwabo wajingulula Petelo kalombola boba bemene’po amba: “Uno’u nandi wadi ne Yesu.” Petelo watune monka amba nkimuyukilepo. Kakitatyi pa kupita’po bantu bamo abamone Petelo kebamunena’mba: ‘I binebine nobe nanshi udi wa ku abo.’ Petelo watune musunsa wa busatu amba: “Ami nkiyūkilepo muntu’o”! Petelo watyipe’nka ne mutyipo amba byanena’bya i bya bine, penepo Yesu nandi waalamuka wamutale.—Mateo 26:57-75; Luka 22:54-62; Yoano 18:15-27.

Mwanda waka Petelo wākwetwe moyo kabepa amba nkiyukilepo Yesu?

Le uyukile kyābepēle Petelo?—Bine, i moyo wāmukwete. Ino i kika kyāmukwatyije moyo? Le i kika kyaākomenenwe kwikala na bukankamane? Langa’po bidi. Lelo i kika kyāpele Yesu bukankamane?—Wādi ulombela kudi Leza, Leza nandi wāmupa bukankamane. Kadi vuluka, Yesu wāsapwidile Petelo misunsa isatu mituntulu amba lombela, ne kutala, ne kwendelela na kukesha. Ino byāikele namani?—

Kitatyi ne kitatyi, Petelo wādi ulāla tulo. Kādipo ulombela, kadi kādipo wendelela na kukesha. O mwanda wātulumukile’tu abakwata  Yesu. Kupwa mu kisambo’mwa, pobādi bakupila Yesu ne kukuta nkuku ya kumwipaya, Petelo wākwatwa moyo. Ino, nsaa mityetye yabadikile, le Yesu wāsapwidile batumibwa bandi kutengela kika?—Yesu wēbasapwidile amba enka mobamushikilwe kudi ntanda, ne abo bene bakebashikwa.

Le nobe ukokeja kutanwa namani mu ngikadilo iifwene na yātenwe’mo Petelo?

Shi ke pano tutale netu kintu kikokeja kwitufikila kiifwene pamo na kyokya kyāfikile Petelo. Kimfwa mudi mu masomo, penepo bantu bakwabo abashilula kwisambila bibibibi pa boba kebemunangapo ndalapo nansha kebadyangapo masobo a Noele. Le bikekala namani shi muntu wakutale kakwipangula’mba: “Le bine banwe nanshi kemwimunangapo ndalapo?”  Nansha bakwabo nabo amba: “Bine twivwananga amba banwe kemudingapo ne Noele mine!” Lelo ukakwatwa moyo pa kunena bya bine?—Lelo ukekala na mutyima wa kubepa, pamo na mwābepele Petelo?—

Kupwa papo, Petelo wākwetwe bulanda bukata pa mwanda wa kutuna kwaātunine amba nkiyukilepo Yesu. Paālangile kyokya kyaālongele, mulume nobe wāenda panja kadila. Bine, waālukīle kudi Yesu. (Luka 22:32) Langa’po bidi pano. Lelo i kika kibwanya kwitukwasha tuleke kukwatwa moyo ne kunena mwānenene Petelo?—Vuluka, Petelo wābudilwe kulombela ne kwendelela na kukesha. Penepo, momwena i kika kyotufwaninwe kulonga twikale balondi ba Mufundiji Mukatampe?—

Bine tufwaninwe kulomba bukwashi kudi Yehova. Pādi palombela Yesu, lelo uyukile kintu kyāmulongēle Leza?—Wātumine mwikeulu wa kumukankamika. (Luka 22:43) Lelo bamwikeulu ba Leza babwanya kwitukwasha netu?—Bible unena’mba: ‘Mwikeulu wa Yehova welele umbukata bwa nsakwa boba bamwakaminwe, kadi wibanyongololanga.’ (Mitōto 34:7) Ino pa kutambula bukwashi bwa Leza, tufwaninwe ne kulonga kintu kikwabo, ke’nkapo kulombela kete, mhm. Le uyukile i kika kikwabo kyotufwaninwe kulonga?—Yesu wāsapwidile balondi bandi amba bekale batala ne kwendelela na kukesha. Le ulanga tubwanya kutala ne kukesha namani?—

Tufwaninwe kuteja na katentekeji byobya binenwa mu kupwila kwetu kwa bwine Kidishitu ne kuta mutyima ku byotutanga mu Bible. Ino kadi tufwaninwe kulombela Yehova kitatyi kyonso ne kumulomba etukwashe tumwingidile. Shi tulonga namino, tukatambula bukwashi bwa mwa kupwila moyo wetu. Kupwa tukasangala ponso potumona mukenga wa kusapwila bakwetu myanda itala Mufundiji Mukatampe ne Shandi.

Bino bisonekwa biketukwasha tuleke kwikala na moyo wa kutyina bantu basaka kwitulekeja kulonga byoloke: Nkindi 29:25; Yelemia 26:12-15, 20-24; ne Yoano 12:42, 43.