Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 20

Le Abe Usakanga Kwikala Nyeke Umbajinji?

Le Abe Usakanga Kwikala Nyeke Umbajinji?

LE UYUKILE muntu kampanda usakanga kwikala nyeke umbajinji?—Ukokeja kutonona bakwabo kwasaka aye ekale umbajinji ku mulongo. Lelo kodi mumone bino bilongeka?—Mufundiji Mukatampe wāmwene’nka ne batame bene besakila bifuko bibajinji, ko kunena’mba bifuko bya bulēme kutabuka. Ino kāsangedile’byopo. Tutale mobyāpityile.

Lelo kodi mumone bantu bakimba kwikala babajinji?

Bible witusapwila amba Yesu wāityilwe ku masobo makatampe kwa Mufadiseo umo, wādi mwendeji mukatampe wa kipwilo. Yesu pa kufika’ko, wāshilula kutala betwa bakwabo batwela kebetongela abo bene bifuko bilumbuluke. Ebiya wāsekunwina betwa’ba lusango lumo. Lelo uswile nobe wivwane’lo?—

 Yesu wānene amba: ‘Shi muntu wakwite ku masobo a butundaile, koketongela kushikata pa kifuko kilumbuluke, nansha kya bulēme kutabuka.’ Lelo uyukile kyānenēne Yesu nabya?—Wāshintulwile amba padi muntu mupite bulēme nandi i mwitwe’ko. Ebiya, enka na momwenine pa kifwatulo’pa, mwinē masobo waiya kanena’mba: ‘Mushile uno mukelenge kyaba, abe enda popa.’ Le uno wityilwe ukeivwana namani?—Ukevwana bumvu mwanda bonso bakamukupwila meso pataluka kaenda ku kifuko kya bulēme butyetye.

Yesu wādi ulombola amba ke biyampepo kwisakila kifuko kya pangala. O mwanda wānene amba: ‘Pa kwitwa ku masobo a butundaile, enda ukashikate pa kifuko kya kubulwa bulēme. Ino mwine wakwita pa kwiya akunene’mba: “Abe mulunda, tundulukila ku kifuko kya bulēme.” Ebiya abe pa kutundulukila pa kifuko kya bulēme nabya ukekala mulēme ku meso a bakwenu bonso betwe.’—Luka 14:1, 7-11.

Le i bufundiji’ka bwāfundije Yesu paādi wisambila pa boba betongela bifuko bipite buya, nansha bibajinji?

Lelo ubaivwanija kine kimanine’po lusango lwa Yesu?—Tulete’po kimfwa tutale shi ubaivwanija’kyo. Langa shi ubaikila mu motoka muyule bantu bā. Lelo ukanyemena kutonga pa kushikata ne kuleka muntu mukulumpe emane bwimwa?—Lelo Yesu ukasangela shi abe ubalonga nankyo?—

Padi muntu mukwabo ukanena amba Yesu kadipo mwanda na byotulonga. Ino le nobe witabije kino?—Yesu paādi ku masobo makatampe ku njibo ya Mufadiseo’wa, wādi utala bantu mobādi bētongela bifuko byabo bya kushikata. Le kulangapo amba enka ne dyalelo dine utele mutyima ku byotulonga?—Pano Yesu byakadi momwa mūlu, po pene pabwanya kwitubandila biyampe.

 Shi muntu ukimba kwikala mubajinji, kino kikokeja kuleta bikambija. Pavule pene kebyo kuleta lupotopoto ne kukwatyija bantu nsungu. Dimodimo kino kilongekanga shi bana abakanange pamo lwa motoka. Enka’tu milango ikishitulwa, bana kala banyemena’mo kwikala babajinji. Kyobasaka i bityi bipite buya, byobya bya pabwipi na makalashi. Le penepo i bika bibwanya kulupuka’ko?—Bine, babwanya kwikalela abo bene na bene.

Kwisakila kwikala mubajinji kubwanya kuleta kavutakanya kakatampe. Kwāletele ne kavutakanya umbukata mwa batumibwa ba Yesu. Enka na motwafundile kala mu Shapita wa 6 wa dino dibuku’mwa, bēpotomeje mwanda wa kuyuka i ani mukatampe kutabuka umbukata mwabo. Le penepa Yesu wālongele’po kika?—Eyo, wēbadingile. Inoko kitatyi pa kupita’po, bēpotomeja monka. Tutale bidi mobyāshilwidile.

Batumibwa, ne bantu bakwabo,  badi mu lwendo lwa mfulo pamo na Yesu, benda ku kibundi kya Yelusalema. Yesu wadi wibasapwila mwanda utala Bulopwe bwandi, ebiya ba Yakoba ne Yoano kebalanga mwa kukabikadila bu balopwe pamo nandi. Mwanda’o, abakesambe’o enka ne na inabo Salome. (Mateo 27:56; Mako 15:40) Penepo abo bakidi mu dishinda benda ku Yelusalema, Salome waiya kudi Yesu, wafukata ku meso andi, kamulombe amwitabijije’ko byalomba’bya.

Penepo Yesu wamwipangula’mba: “Lelo byosaka i bika?” Aye amba usaka Yesu ashikatyije bandi bana mu Bulopwe bwandi, au ku lundyo au nandi ku lunkuso. Mofwatakenya, lelo batumibwa bakwabo dikumi abeivwana ku mutyima namani pa kuyuka kyokya kyalomba inandya ba Yakoba ne Yoano?—

Le Salome ulomba Yesu bika, ne bibafule namani?

Bine, abafityilwa ba Yakoba ne Yoano mityima fututu. Penepo Yesu wadingila batumibwa bandi bonso madingi mayampe. Yesu webasapwila  amba bamfumu ba Bajentaila baswele kwikala bakatampe kadi ba bulēme. Basakanga bekele na bitenta bikatampe mwanda wa bantu bonso bebakōkele. Inoko Yesu kasapwila balondi bandi amba abo kebafwaninwepo kwikala uno muswelo. Ino Yesu webanena’mba: ‘Yewa usaka kwikala mubajinji umbukata mwenu ufwaninwe kwikala umpika wenu.’ Langa’po bidi wao mwanda!—Mateo 20:20-28.

Lelo uyukile biloñanga umpika?—Kakungilangapo bamwingidile, aye’ko ye wingidila bantu bakwabo. Kashikatangapo pa kifuko kibajinji, inoko i pa kya panshi. Kaloñangapo bintu bu muntu mupite bulēme, inoko bu wa bulēme butyetye mpata ku bonso. Kadi vuluka, Yesu wānene amba yewa usaka kwikala umbajinji ufwaninwe kwingila bwa umpika wa bakwabo.

Shi ke pano, molangila le kino kishintulula kika kotudi?—Lelo umpika ubwanya kwipotomeja na mfumwandi amba i ani wa kushikata pa kityi kipite buya? Nansha le ubwanya kupatena kuyuka i ani ukadya dibajinji? Le ulanga’po namani?—Yesu washintulwile amba umpika utangidijanga nyeke mfumwandi kumeso.—Luka 17:7-10.

Nanshi pa kyaba kya kutompa kwikala umbajinji, le i kika kyotufwaninwe kulonga?—Bine, tufwaninwe kwikala bwa bapika kudi bakwetu. Kadi kino kishintulula kutangidija bakwetu kumeso kwetu. Ko kunena amba tufwaninwe kumona amba bakwetu badi na bulēme kwitupita. Lelo ubwanya kulanga’ko miswelo yokokeja kutangidija bakwenu kumeso?—Ubulwe’po bidi kujokela ku paje wa 40 ne wa 41, utale monka miswelo imoimo yobwanya kutangidija bakwenu kumeso na kwibengidila.

Ukavuluka amba Mufundiji Mukatampe wātangidije bakwabo kumeso kwa aye mwine na kwibengidila. Mu kyolwa kya mfulo kyaādi pamo na batumibwa bandi, wāfikile enka ne kuzonzama kaeboija ku maulu. Shi netu tutangidija bakwetu kumeso na kwibengidila, nabya tukasangaja Mufundiji Mukatampe ne Shandi Yehova Leza mwine.

Tutange’ko bisonekwa bikwabo bya mu Bible bitukankamika kutangidija bakwetu kumeso kwetu: Luka 9:48; Loma 12:3; ne Fidipai 2:3, 4.