Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 31

I Kwepi kwa Kumona Busengi

I Kwepi kwa Kumona Busengi

LELO kwakwetwe kashā bulanda nansha na mukose pa kasuku kobe?—Lelo kwanene kashā amba kekudipo muntu unswele?—Bana bamo banenanga uno muswelo. Inoko Leza i mulaye amba: “Amiwa nkikakwilwa po.” (Isaya 49:15, BB) Mwene kino i kintu kya kutendelwa kifwaninwe kulanga’po?—Bine, Yehova Leza wituswele bya binebine!

Molangila le i muswelo’ka witelekele uno mukōko mujimine?

Mulembi umo wa Bible wānene amba: ‘Shi ba tata ne lolo abandekelela, Yehova ukamboyanga.’ (Mitōto 27:10) Kuyuka kino kwituseñanga bya binebine, mwene i amo?—I amo, Yehova witusapwila’mba: “Kokakwatwapo moyo, mwanda ndi nobe. . . . Nkakukwasha” binebine.Isaya 41:10.

Inoko, byaba bimo, Yehova ulekanga Satana etuletele makambakano. Yehova ulekanga Satana atompe’nka ne bengidi Bandi. Kyaba kimo Dyabola wāsuswile Yesu bikata, byāfikija Yesu ku kwabija Yehova amba: ‘Leza wami! Leza wami! Lelo i bika byowandekela?’ (Mateo 27:46) Nansha Yesu byaādi ususuka, wādi’tu uyukile amba Yehova umuswele. (Yoano 10:17) Inoko Yesu wādi kadi uyukile amba Leza ulekele Satana utompa bengidi Bandi ne kadi umulekele wibasusula. Shapita mukwabo ukashintulula mwanda waka Leza ulekele Satana ususulañana.

Shi tukidi banuke, tukomenwanga kutalula moyo bitatyi bimobimo. Kimfwa, lelo kodi ne mujimine koenda?—Lelo wakwetwe moyo?—Bana bavule bakwatwanga moyo. Difuku dimo Mufundiji Mukatampe wasekunwine lusango lwa kujimina. Inoko kādipo mwana wājimine. Ino wādi mukōko.

Mu bintu bikwabo nobe udi pamo bwa mukōko. Mu muswelo’ka? Bine, mikōko ke mikatakatapo kadi ke mikomokomopo. Kadi isakanga  muntu wa kwiilama ne kwiikinga. Muntu ulama mikōko witwanga bu mukumbi.

Mu lusango lwandi, Yesu wēsambīle pa muntu wādi na mikōko katwa. Inoko mwājimina mukōko umo. Padi mukōko wādi usaka bidi kukatala bidi bukila bukwabo bwa mukuna. Ino kepāijijepo, mukōko’o wāikala kulampe na mikwabo. Le ulanga wao mukōko wētelekele namani powātadile koku ne koku wēmona amba udi’nka pa bunka bwao?—

Lelo mukumbi wālongele namani paāmwene amba mukōko umo keudi’popo? Lelo wānene amba i ao mwine wajimina, nkidipo ne kyonekambakenya pa mwanda wao kine’ni? Nansha wāshile bidi yoya mikōko 99 pa kyaba kiyampe kakakimbe mukōko umo’wa? Lelo mukōko umo onka udi’tu na mvubu ya nao beukambakene bikatampe uno muswelo?—Shi wādi amba abe ye uno mukōko mujimine, le wādi wa kusaka mukumbi akukimbe?—

Lelo i ani udi pamo bwa mukumbi wānyongolwele mukōko wandi?

Mukumbi wādi uswele mpata mikōko yandi yonso, nansha ke owa umo wājimine mwine. O mwanda mwine wa wāendele kukakimba ne owa mwine mujimine. Fwatakanya’po bidi nsangaji yāikele na mukōko mujimine’wa pa kumona mukumbi wao wiya! Kadi Yesu unena amba mukumbi wāsepelele pa kumona mukōko wandi. Wāsepelele bikatampe mukōko umo’wa kupita’ko mikwabo 99 yampikwa kujimina. Shi ke pano, i ani udi pamo bwa mukumbi wa mu lusango lwa Yesu? Le i ani  witulamanga biyampe shē pamo na mwāikadile uno mukumbi na mukōko wandi?—Yesu wānene amba i Shandi wa mūlu. Ne Shandi mwine i Yehova.

Yehova Leza i Mukumbi Mukatampe wa bantu bandi. Aye uswele boba bonso bamwingidila, kwela’mo ne bana batyetye pamo bwa abe bene. Kasakilepo nansha umo wa mu batwe alongwe bibi nansha konakanibwa. Na bubine i kya kutendelwa kuyuka amba Leza witutele mutyima bikatampe uno muswelo!—Mateo 18:12-14.

Lelo abe umwene Yehova bu muntu udi’ko bine mwikadile’ko shobe nansha muntu mukwabo yense?

Lelo witabije binebine mudi Yehova Leza?—Lelo umumwene bu muntu udi’ko binebine?—Kunena na bubine ketubwanyapo kumona Yehova. Mwanda aye i Mushipiditu. Aye udi na umbidi keumonwepo na etu meso. Inoko aye i muntu udi’ko binebine, ne kadi aye witumonanga. Uyukile ne kitatyi kyotusakilwa bukwashi. Kadi tubwanya kwisamba nandi mu milombelo, pamo’nka na motwisambilanga na muntu mukwabo yense pano pa ntanda. Yehova usakanga twisambe nandi.

 Penepo nanshi shi ubakwatwa bulanda nansha ubemone amba udi pa bunka, lelo i kika kyofwaninwe kulonga?—Sapwila’mo Yehova. Fwena kwadi, nandi ukakusenga ne kukukwasha. Vuluka amba Yehova ukuswele, nansha kitatyi kyowiivwana amba udi enka pa kasuku kobe. Shi ke pano tutekune bidi Bible wetu. Betulombola mu Mitōto 23, kushilwila pa vese 1 amba: “Yehova i Mukumbi wami; nkikabulwangapo [kintu], mhm. Undādikile mu madyo a lumenya; unkunkuja pa mema atalala, nyā.”

Tadija kibweja’ko mulembi, mu vese wa 4, amba: “Eyo, i binebine, nansha mpityile mu kipakasa kya mujiñininya wa lufu, nkikakwatyibwapo moyo ku kibi, shi kika, shi kika? mhm; mwanda abe udi nāmi: Kamama kobe ne mukombo obe binseñanga ku mutyima.” Ye mwitelekelanga boba bonso batōta Yehova bu Leza wabo. Basengibwanga pobatanwa mu makambakano. Lelo nobe ye mowitelekelanga?—

Pamo’nka na mulelelanga mukumbi muyulwe lusa luombe lwandi, mo monka ne Yehova nandi mwalelelanga bantu bandi. Wibalombolanga dishinda dyoloke dya kwenda, nabo bamulondanga na nsangaji. Nansha shi bajokolokwe na bikambija, kebadipo na kyobakwatyilwa moyo. Mukumbi wingidijanga kamama kandi nansha mukombo wandi mwanda wa kukinga mikōko ku banyema bakokeja kwiilonga bibi. Bible ulombola muswelo wāikele nkasampe mukumbi Davida kukinga mikōko yandi kudi ntambo ne kimbwi. (1 Samwele 17:34-36) Ne bengidi ba Leza nabo  bayukile amba Yehova ukebakinga. Betelekanga bu bantu bashikete ku matwi talala mwanda Yehova udi nabo.

Lelo i ani ubwanya kwitukwasha pamo bwa mukumbi ukinga mikōko yandi shi tudi mu bikambija?

Yehova uswele mikōko yandi binebine, ne kadi wiilamine biyampe. Bible unena’mba: ‘Ukadisha luombe lwandi bwa mukumbi; ukakwatakanya twana twa mikōko mu kuboko kwandi. Twana nato uketukwasha na kwitukwatakanya senene.’—Isaya 40:11.

Lelo kino kibakupe nsangaji pa kuyuka amba Yehova udi pamo bwa uno mukumbi?—Lelo nobe usaka kwikala mukōko wa mu mikōko yandi?—Mikōko ivwananga diwi dya mukumbi wayo. Ikalanga pabwipi nandi. Lelo nobe wivwananga Yehova?—Lelo udi nandi pabwipi?—Nabya kekudipo kyokwatyilwa moyo. Yehova ukekalanga nobe.

Yehova ukwatakanyanga na buswe boba bamwingidila. Tutange kya pamo kinena Bible pa uno mwanda, mu Mitōto 37:25; 55:22; ne mu Luka 12:29-31.