Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 11

Bukwashi bwa Bamwikeulu ba Leza

Bukwashi bwa Bamwikeulu ba Leza

BANTU bamo banenanga amba betabijanga enka kintu kyobamona na meso. Ino kuno i kubulwa ñeni. Mwanda kudi bintu bivule bine bidi’ko ino byoketwamwene kashā na meso etu. Lelo ubwanya kutela’ko kimo?​—

Lelo luvula lotwesa nalo’lu le? Mwene tubwanya kwilwivwana ku ngitu?​—Olola kuboko kobe, pepwila’po umpuya. Mwene kudi kyowaivwana?​—Bine ubaivwana, ino kubwanyapo kumona luvula, le ke amopo?​—

Twesambīle kala pa bantu ba ku mushipiditu, boketubwanyapo kumona. Twayukile amba bamo i bayampe ino bakwabo i babi. Tela’ko bidi bantu bamobamo bayampe ba ku mushipiditu boketubwanyapo kumona.​—Bine, kudi Yehova Leza, Yesu, ne bamwikeulu bayampe. Lelo bamwikeulu babi nabo badi’ko?​—Bible unena amba badi’ko. Nsapwile byowafundile pangala pabo.​—

Kintu kimo kyotuyukile i kino: bamwikeulu bayampe ne babi bene, bonsololo betutabukile bukomo. Mufundiji Mukatampe wādi uyukile bivule bitala pa bamwikeulu. Mwanda aye wādi kala mwikeulu kumeso kwa kubutulwa’ye bu mwana wa lukeke pano pa ntanda. Wādi wikele pamo na bamwikeulu bakwabo mūlu. Wādi uyukile midiyo ne midiyo ya bamwikeulu. Lelo bamwikeulu bonso’ba badi na majina?​—

Eyo, twafundile amba Leza wapele ñenyenye majina. Nanshi tubwanya kunena amba ne bamwikeulu bonso nabo badi na majina. Kadi tuyukile amba babwanya kwisamba abo bene na bene, mwanda Bible wisambila pa ‘ndimi ya bamwikeulu.’ (1 Kodinda 13:1) Le ulanga amba bamwikeulu besambilanga pa bika? Lelo besambilanga ne pa yetu myanda pano panshi?​—

 Tuyukile amba bamwikeulu ba Satana, bademona, batompanga kwitutonona tutombokele Yehova. Nanshi besambilanga pa muswelo wa kwitutombokeja. Basakanga twikale pamo bwa abo mwanda wa Yehova etupele pamo nabo. Ino le bamwikeulu ba kikōkeji ba Leza nabo? Le ulanga amba nabo besambanga yetu myanda?​—Bine, besambanga’yo. Abo basakanga kwitukwasha. Ivwana nkusapwile muswelo bamwikeulu bamobamo ba Leza mobākwashishe bantu bādi baswele Yehova ne kumwingidila.

Kimfwa, kwādi mwana-mulume umo wādi wikalanga mu Babiloni, dijina dyandi i Danyele. Bantu bavule ba mu Babiloni kebādipo baswele Yehova. Bātula enka ne mbila ya kunena amba yense wakalombela kudi Yehova Leza bakamupa mfuto. Ino Danyele kādipo ubwanya kuleka kulombela kudi Yehova. Lelo uyukile kyobālongele Danyele?​—

Bine, bantu babi bāeleje Danyele mu kina kya bantambo. Danyele wādi’mo enka bunka bwandi pamo ne bantambo bapepeketa nzala. Lelo  uyukile mobyāpityile?​—Danyele mwine unena amba: “Leza watume mwikeulu wandi wamumija byakanwa bya bantambo.” Bine, i kutupu kantu kobāmulongele! Bamwikeulu babwanya kulongela boba bengidila Yehova bintu bitulumukwa.​—Danyele 6:18-22.

I kika kyālongele Leza pa kupandija Danyele?

Kupwa kyakyo kwādi kitatyi kimo kyāelelwe Petelo mu kifungo. Vuluka, Petelo wādi mulunda na Mufundiji Mukatampe, Yesu Kidishitu. Bantu bamo kebādipo basaka pādi pēbasapwila Petelo amba Yesu i Mwanā Leza. O mwanda mwine bāelele Petelo mu kifungo. Basola bādi balama Petelo kutyina amba wakanyema. Lelo kwādi muntu wādi ukokeja kumukwasha?​—

Petelo wādi ulēle pa bukata bwa batulama babidi, au koku, au koku, mukutwe nkano ku maboko. Inoko Bible unena’mba: ‘Penepo  kala, mwikeulu wa Yehova wāiya, ne kike kyatōkeja momwa mu kifungo. Wātenga Petelo mu lubavu wāmulangula kāmunena’mba: “Taluka bukidi!”’

Mwikeulu umo wākweshe Petelo atambe mu kifungo muswelo’ka?

Ponka’po, nkano yandi yāzulumuka ku makasa andi! Kadi mwikeulu wāmunena’mba: ‘Vwala bivwalwa ne bikwabilo byobe, unonde.’ Bakalama kēbadipo bakokeja kwibemika, mwanda mwikeulu ye wādi ukwasha Petelo. Ebiya pōbafikile pa kinjilo kya kyuma, kwālongeka kintu kekyālongekele kashā. Bine kinjilo’kyo kyēshitukila akyo kine! Mwikeulu’wa wānyongolwele Petelo mwanda wa Petelo endelele na kusapula.​—Bilongwa 12:3-11.

Lelo bamwikeulu ba Leza babwanya kwitukwasha netu?​—Eyo, babwanya. Lelo kino kishintulula amba kebaketulekapo tutanwa na kyaka nansha dimo?​—Ehe, bamwikeulu kebaketwimikapo ku kyaka shi tulonga bintu byampikwa ñeni. Inoko nansha shi tulonga bintu na ñeni, tukokeja kutanwa na kyaka. Bamwikeulu kebanenwepo kukinga bantu amba bino byaka bileke kufika. Ke-pantu Leza i mwibape mwingilo wa pa bula wa kwingila.

Bible wisambila pa mwikeulu usapwila bantu konsokonso batōte Leza. (Kusokwelwa 14:6, 7) Le mwikeulu wibasapwilanga namani? Lelo welanga lubila aye mūlu mu muswelo ubwanya muntu ne muntu kumwivwana?​—Mhm, balondi ba Yesu badi pano panshi bo basapwila bakwabo myanda ya Leza, ebiya bamwikeulu nabo benda bebakunkuja mu mwingilo wabo. Bamwikeulu batanga mutyima ku boba basaka binebine kuyuka myanda ya Leza amba bamone katōkwe ka kwivwana. Netu twingilei uno mwingilo wa kusapula, ne bamwikeulu nabo baketukwasha.

Ino le bikekala namani shi bantu bampikwa kuyuka Leza abetukambakanya? Le shi betwela mu kifungo namo le? Lelo bamwikeulu baketulupula’mo?​—Bakokeja kwitulupula’mo. Ino ke ponsopo pobaloñanga uno muswelo.

Mwikeulu usapwilanga Polo bika pano?

Kitatyi kimo bākutyile Polo, mulondi wa Yesu. Wādi wenda lwa bwato mu kivula kibikibi. Ino bamwikeulu kebāmukutulwilepo ponka  na ponka. Mwanda kwādi bantu bakwabo bādi banenwe kwivwana myanda ya Leza. Mwikeulu umo wānena’mba: “Abe Polo, kokikwatwa moyo, poso’nka ukēmane ne ku meso a Kesala.” Bine, Polo wādi wa kukafikijibwa kudi Kesala mulopwe wa ntanda, mwanda wa akamusapwile. Bamwikeulu bādi nyeke bayukile konso kudi Polo, ne bādi bamukwasha. Netu shi twingidila Leza binebine nabya baketukwasha.​—Bilongwa 27:23-25.

Kudi mwingilo mukwabo mukatampe usa kulonga bamwikeulu panopano ponka. Kitatyi kya Leza konakanya babi kekidi pabwipi ponka. Bonso kebatōtapo Leza wa bine bakonakanibwa. Boba banena amba kebakulupilepo mu bamwikeulu mwanda kebabwanyapo kwibamona bakemwenanga abo bene kwiongola kobeongwele.​—2 Tesalonika 1:6-8.

Le batwe biketupityila namani?​—Shi tudi ku mutamba wa bamwikeulu ba Leza, nabya baketukwasha. Ino lelo batwe tudi ku mutamba wabo?​—Tudi’ko shi twingidilanga Yehova. Ne shi twingidila Yehova, nankyo tukasapwila bantu bakwabo nabo bamwingidile.

Pa kusaka uyuke muswelo utenekwanga bamwikeulu na myanda ya būmi bwa bantu, tanga Mitōto 34:7; Mateo 4:11; 18:10; Luka 22:43; ne Bilongwa 8:26-31.