Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 15

Bufundiji bwa Mwa Kwikadila Biyampe

Bufundiji bwa Mwa Kwikadila Biyampe

LE UYUKILE amba mfwatakani i kika?—Eyo, mfwatakani i kufītyilwa muntu kampanda mwanda’tu i mwishile nobe nansha mwanda unenanga ludimi lungi. Nanshi kwikala na mfwatakani i kulangila nansha kumona muntu kampanda bibi abe kwamuyukile biyampe.

Lelo ulanga amba i biyampe kushikwa muntu kumeso kwa kumuyuka binebine mwaikadile nansha mwanda’po’tu i mwishile nobe?—Anha, ke byolokepo kwikala na ntondo, kadi ke biyampepo nansha dimo. Ketufwaninwepo kuleka kulonga biyampe ku muntu kampanda mwanda’po’tu i mwishile netu.

Langa’po bidi. Lelo uyukile’ko muntu omwishidile nandi musombelo wa lukoba nansha yewa unenanga ludimi lwishile na lwenu?—Padi uyukile ne bantu bamweka bingi mwanda badi na bilonda nansha na misongo. Lelo udi biyampe na bantu beshidile nobe ne wibaswele?—

Le i muswelo’ka otufwaninwe kwikala na bantu botwishidile nabo?

Shi tuteja Mufundiji Mukatampe, Yesu Kidishitu, nabya tukekala biyampe na bantu bonso. Nansha ekale muntu wa ntanda’ka nansha wa lukoba lwa musombelo’ka, i bimo byonka kotudi. Tufwaninwe kwikala biyampe nandi. Buno bo bufundiji bwāfundije Yesu, nansha bantu bavule byokebetabije’bopo. Leka bidi twisambile’po.

Muyuda umo wādi ufwatakenya bakwabo bibi wāile kudi Yesu kamwipangula kino kipangujo amba: ‘Lelo kyomfwaninwe kulonga i kika pa kwikala na būmi bwa nyeke?’ Yesu wāyukile amba uno mwana-mulume wādi padi usaka Yesu anene amba tufwaninwe kwikala biyampe enka na bantu ba wetu musaka nansha muzo. O mwanda mwine Yesu kālondolwelepo kipangujo’kya aye mwine, ino wāipangwile  muntu’wa amba: ‘Lelo Bijila bya Leza binena amba tufwaninwe kulonga bika?’

Muntu’wa wālondolola’mba: ‘Ukasanswa Yehova Leza obe ne mutyima obe onso, kadi ukasanswa mukwenu’nka bwa abe mwine.’ Yesu nandi amba: ‘Ubalondolola bya bine. Endelela kulonga enka nankyo nabya ukamona būmi bwa nyeke.’

Inoko, uno muntu kādipo usaka kwikala biyampe nansha kuswa bantu beshile nandi. Penepa wātompa kukimba pa kwibingijija. Kāipangula Yesu amba: ‘Lelo mukwetu mwine i ani’le?’ Padi wādi usaka Yesu amulombole amba: “Balunda nobe bo abo bakwenu,” nansha amba “I boba bomwiifwene nabo.” Pa kulondolola kipangujo, Yesu wāsekunwine lusango lwa Muyuda ne mwine Samadia. Lunena namino.

Muntu umo wādi utūka mu dishinda, utamba ku Yelusalema wenda ku Yediko. Muntu’wa wādi Muyuda. Paādi wenda, batubwalāla bāmukwata. Bāmushinda panshi ne kumusela lupeto lwandi ne bivwalwa byandi bine. Batubwalāla’bo bāmukupila bininge, bāmushiya mupungile kufula kwa dishinda.

Kitatyi kityetye pa kupita’po, kitobo umo wādi upityila mu dyonka dishinda’dya. Wāmona muntu’wa bamutapetape bilonda bibi.  Shi wādi abe longa wālongele’po namani?—Ebiya kitobo wākongolokele kufula kwa dishinda wāenda. Kāimenepo nansha kwimana kwine. Kālongelepo kantu nansha kamo kene ka kukwasha uno muntu.

Kupwa, muntu mukwabo mutōtyi mukatampe enka wātūkila mu dyonka dishinda’dya. I mwine Levi wādi wingidilanga mu tempelo mu Yelusalema. Lelo wāimene mwanda wa kumukwasha?—Ehe. Nandi wālonga enka mwālongele kitobo’mwa.

Ku mfulo, mwine Samadia nandi wāpityila monka. Le ubamumone mwaila mwishinda mu kitonto’mwa?—Wāmona Muyuda’wa ulēle panshi bamutapetape bilonda bibi. Mu kine kyaba’kya, bene Samadia bavule kebādipo beswele na Bayuda nansha dimo. (Yoano 4:9) Le uno mwine Samadia ukashiya muntu’wa kwampikwa kumukwasha? Lelo ukeneneja aye mwine amba: ‘Le kyonkakwashisha uno Muyuda i  kika? Mwene aye kakankwashapo shi nami bantapa bilonda’?

Mwanda waka mwine Samadia wādi mukwetu muyampe?

Ino, uno mwine Samadia pa kumumona mulume nobe ulēle kufula kwa dishinda, wāmukwatyilwa lusa. Wākomenwa kumushiya bitupu amba efwile. Penepo wātuka pa nyema wandi, wāenda padi muntu’pa, wāshilula kumundapa bilonda byandi. Kāmupungulwila’po māni ne vinyu. Bino byādi bya kūmija bilonda. Kupwa wāmupombela kipeta kya mbwija pa bilonda’pa.

Uno mwine Samadia wātekuna biyampe shē muntu mutapwe’wa wāmutentamija pa nyema wandi. Kupwa kebenda batūka mu dishinda bityebitye kufika ne pa kifikilo kya beni, pa hotela mityetye. Kwine’kwa mwine Samadia wāfutyila muntu’wa kwa kulāla, kadi wāmulama biyampe shē.

Pano Yesu kaipangula muntu waādi wisamba nandi amba: ‘Molangila abe i ani pa bano basatu wādi mukwabo muyampe?’ Shi wādi abe longa wālondolwele’po namani? Le i kitobo’ni, i mwine Levi’ni, nansha i mwine Samadia?—

Muntu’wa wālondolola’mba: ‘Yewa muntu wāimene ne kundapa muntu mutapwe bilonda’wa ye mukwabo muyampe.’ Penepo Yesu nandi amba: ‘Ubanena bya bine. Enda nobe ukalonge’nka namino.’—Luka 10:25-37.

 Mwene luno i lusango luyampe? Lulombola patōkelela bakwetu i bāni. Ke’nkapo balunda netu ba pa mutyima. Kadi ke’nkapo bantu botudi nabo lukoba lumo nansha besamba lwetu ludimi, ehe. Yesu i mwitufundije kwikala biyampe na bantu bonso kwampikwa kutala kwabo, mobamwekela, nansha ludimi lobanena.

Mo mwikadile Yehova Leza. Aye kadipo na ntondo. ‘Shenu wa mūlu utēmejanga dyuba dyandi ku babi ne ku bayampe bene kumo,’ ye mwānenene Yesu. ‘Kadi unokeja ne mvula ku bayampe ne ku babi bene.’ Penepo nanshi, tufwaninwe kwikala biyampe na bantu bonso, enka mwikadile nabo Leza.—Mateo 5:44-48.

Nobe ukekala mukwetu muyampe muswelo’ka?

Penepa nobe shi wamona muntu mwitape kintu, le ukalonga namani?—Le ukamutala namani shi i muntu wa ntanda ingi nansha shi i wa lukoba lwishile na lobe? Ufwaninwe kumukwasha, mwanda nandi i enka mukwenu. Shi kadi ubamone amba kukokejapo kumukwasha mwanda wi mwanuke, nabya ita muntu mutame amukwashe. Ukokeja kwita nansha mpulushi nansha mwadimu wa ku masomo. Kulonga namino ko kwikala biyampe, mwādi mwikadile mwana-mulume mwine Samadia.

Mufundiji Mukatampe witusakila kwikala biyampe. Witusakila tukwashe bakwetu, nansha shi i bāni. O mwanda mwine wāsekunwine luno lusango lwa mwine Samadia muyampe.

Pa bitala buno bufundiji bwa mwa kwikadila biyampe na bantu kwampikwa kusañuna misaka nansha mizo yabo, tanga Nkindi 19:22; Bilongwa 10:34, 35; ne 17:26.