Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 13

Boba Bāikele Bana ba Bwanga ba Yesu

Boba Bāikele Bana ba Bwanga ba Yesu

Le uno mwana-mulume’u i ani, ne wāikele mwanā bwanga wa Yesu namani?

LE MWINGIDI wa Leza mulumbuluke kupita bonso nyeke i ani?​—Bine, i Yesu Kidishitu. Lelo ulanga amba tubwanya kumwifwana?​—I amo, Bible unena amba wētushidile kimfwa kya kulonda. Kadi witwita twikale bandi bana ba bwanga.

Le uyukile mushintulwila kwikala mwanā bwanga wa Yesu?​—Kishintulula bintu bivule. Kibajinji, tufwaninwe kuboila ñeni kwadi. Ino ke’nkapo kyakyo kete. Kadi tufwaninwe ne kwitabija binebine byobya byanena. Shi twitabije’byo bine, nabya tukalonga byobya byaitusapwila.

Bantu bavule banenanga amba betabije mudi Yesu. Le ulanga amba abo bonso i bandi bana ba bwanga binebine?​—Ehe, bavule ke bandi bana ba bwangapo. Abo’ko bendanga ku kipwilo. Inoko bavule kebetūdīle’kopo kyaba nansha kimo kya kwifunda byāfundije Yesu. Na bubine, enka boba balonda kimfwa kya Yesu bo bandi bana ba bwanga kete.

Twisambile’ko bidi pa bamobamo bāikele bana ba bwanga ba Yesu paākidi pano panshi. Umo wa mu bana ba bwanga babajinji i Fidipa. Fidipa nandi wākatana mulunda nandi Natanela (wa dikwabo dya bu Batolomyu), ye yeu omona ushikete munshi mwa mutyi’u. Natanela pa kufika kudi Yesu, Yesu wanena’mba: “Awa shandi mwine Isalela wa bine, wampikwa budimbidimbi munda.” Natanela weela mūlu kaipangula amba: “Lelo ubandyuka namanyi?”

Lelo Yesu wāityile bāni amba bekale bandi bana ba bwanga?

 Yesu amba: “Nakumwene kala po wakidi munshi mwa mutyi wa kikuyu ne Fidipa mwine kakakwityile.” Natanela wabezemuka bininge pa kumona amba Yesu wadi muyuke enka ne kwaadi kwine, o mwanda Natanela wanena’mba: “Wi Mwana Leza, kadi wi Mulopwe wa Isalela.”​—Yoano 1:49, MB.

Yudasa Isakadiota, Yudasa (wa dikwabo dya bu Fadeusa), Shimona

Kudi bakwabo bāikele kala bana ba bwanga ba Yesu kumeso kwa ba Fidipa ne Natanela. I ba Andele (Andeleo) ne tutu wandi Petelo, pamo ne Yoano pakwabo padi ne Yakoba, tutu wa Yoano. (Yoano 1:35-51) Inoko, kupwa, abo bonso buná abajokela ku mwingilo wabo wa buluwe bwa mishipa. Ebiya difuku dimo Yesu pa kwenda ukunkuja ku Dijiba dya Ngadilea, wamone Petelo ne Andele bata bukonde mu dijiba. Yesu webete amba: “Nondei.”

Yakoba (mwanā Afesa), Tomase, Mateo

Yesu waenda kumeso bityetye, wamone ba Yakoba ne Yoano nabo. Badi mu bwato ne shabo mwine monka, babanga makonde abo. Yesu webete nabo bamulonde. Shi wādi abe obāityile kudi Yesu, le wāswele  kulonga namani? Lelo longa wāendele nandi ponka na ponka?​—Bano bana-balume bayukile Yesu biyampe. Bayukile amba i mutumwe na Leza. O mwanda mwine abaleka ponka na ponka mwingilo wabo wa buluwe bwa lui kebalonda Yesu.​—Mateo 4:18-22.

Natanela, Fidipa, Yoano

Bano bana-balume pobāikele ke balondi ba Yesu, lelo ko kunena amba tamba penepa bādi kebalonga nyeke enka byoloke?​—Ehe. Vuluka amba bano bana-balume bādi bepatanya’nka ne kwipatanya lupata lwa kusaka kuyuka i ani utabukile bakwabo bukata. Inoko bātelekele Yesu, kadi bādi na mutyima wa kushinta mulangilo wabo. Shi netu tudi na mutyima wa kushinta, nabya tukokeja kwikala bana ba bwanga ba Yesu.

Yakoba (tutu wandya Yoano), Andele, Petelo

Yesu wāityile bantu ba miswelo yonso bekale bandi bana ba bwanga. Difuku dimo, nsongwalume mpeta muludiki nansha mfumu wāile kudi Yesu, wāmwipangula muswelo wa kukamona būmi bwa nyeke. Uno mfumu mpeta wānena amba ulamine kala bijila bya Leza tamba ku bwanuke bwandi, penepo Yesu wāmwita’mba: ‘Iya wikale mulondi wami.’ Lelo uyukile mobyāpityile?​—

Tala, uno mwana-mulume paāyukile amba kwikala mwanā bwanga wa Yesu kyo kyādi kya kwikala kintu kya bulēme mpata kupita’ko kwikala mpeta, mutyima wāmufita’nka fututu. Kāikelepo mwanā bwanga wa Yesu mwanda wādi uswele lupeto lwandi kupita’ko mwaādi uswelele Leza.​—Luka 18:18-25.

Yesu pa kupwa kusapula kubwipi kwa mwaka umo ne kipindi, wātongele bana ba bwanga 12 mu bakwabo amba bekale batumibwa. Batumibwa i boba bana-balume baādi utuma kukengila mwingilo kampanda wa pa bula. Lelo uyukile abo majina?​—Tutompe bidi kwifunda’o. Wibatale pano pa bifwatulo bidi pano’bi, penepo tompa shi ubwanya kutela majina abo. Kupwa tompa kutela majina abo ku mutwe.

Bano bana-bakaji bādi bakwasha Yesu paādi wenda usapula i bāni?

Mwenda mafuku, mutumibwa umo wa boba 12 wāalamuka ke mubi. I Yudasa Isakadiota. Kupwa, mwanā bwanga mukwabo wātongwa wāikala ke mutumibwa. Lelo uyukile dijina dyandi?​—I Matyiasa. Mwenda  mafuku, ba Polo ne Banabasa nabo bāikala ke batumibwa, ino kebādipo babadilwa mu boba 12.​—Bilongwa 1:23-26; 14:14.

Enka na motwefundile kala mu dino dibuku mu Shapita 1, Yesu wādi utele bana batyetye mutyima. Mwanda waka?​—Mwanda wādi uyukile amba nabo bakokeja kwikala bandi bana ba bwanga. Na bubine, bana babwanya divule kwisamba myanda mu muswelo ubwanya’nka ne batame bene kwivwana ne kusaka kwifunda bivule padi Mufundiji Mukatampe.

Ne bana-bakaji bavule nabo bāikele bana ba bwanga ba Yesu. Bamobamo bādi benda pamo nandi kukasapula ku bibundi bikwabo. Ba Madia Madaleni, Njoana, ne Susana bāendele nandi pamo. Padi  bādi bakwasha ne ku kumutekela bidibwa ne kumukendela bivwalwa.​—Luka 8:1-3.

Lelo nobe usaka kwikala mwanā bwanga wa Yesu?​—Vuluka amba, kwikala wandi mwanā bwanga ke kwa kunenapo ku kanwa bitupu, ehe. Tufwaninwe kulonga bintu bya bu bandi bana ba bwanga konso kotudi, ke’nkapo’tu na kwenda ku kupwila kwa bwine Kidishitu kete, ehe. Le i kwepi kumo komona bu kuyampe kulonga bintu bilombola amba twi bana ba bwanga ba Yesu?​—

Na bubine, tufwaninwe kulonga uno muswelo ku njibo. Ino kadi kifuko kikwabo i ku masomo. Kintu kyoketufwaninwepo kwilwa nyeke abe na ami i kino: pa kusaka kwikala mwanā bwanga wa bine wa Yesu, tufwaninwe kulonga bintu enka na mwaādi ulongela’byo aye mwine mafuku onso nyeke, mobukila mobukila, konso kotudi shi kwepi, shi kwepi.

I kwepi kuyampe kulonga bintu bilombola amba twi bana ba bwanga ba Yesu?

Shi ke pano, tutange kya pamo kyokya kinena Bible pa bitala bana ba bwanga ba Yesu, mu Mateo 28:19, 20; Luka 6:13-16; Yoano 8:31, 32; ne 1 Petelo 2:21.