Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 41

Bana Basangaja Leza

Bana Basangaja Leza

MOLANGILA, i mwana’ka kādi musangaje Yehova kupita bonso pano panshi?—I wandi Mwana, Yesu. Tusa kwisambila pano pa bintu byālongele Yesu byāsangeje Shandi wa mūlu.

Kisaka kya ba Yesu kyādi kishikatanga ku kibundi kwendwa lwendo lwa mafuku asatu shi muntu utamba ku Yelusalema, kwine kwādi tempelo ya buya bwa dyangi ya Yehova. Yesu wāityile tempelo bu “Njibo ya Tata.” Aye ne kisaka kyabo bādi benda’ko mwaka ne mwaka kukadya masobo a Pashika.

Mwaka umo, paādi na myaka 12, kisaka kyabo kyādi mu lwendo lwa kujokela kwabo kupwa kwa Pashika. Bufuku pa kwila bāimana, amba batale Yesu kadipo nabo, kadipo nansha na babutule nansha na balunda bene. Ponka’po ba Madia ne Yosefa bājokela ku Yelusalema kukakimba Yesu. Le momwena Yesu wādi kwepi?—

Bātene Yesu mu tempelo. Wādi uteja bafundiji, wibepangula ne bipangujo. Ne shi abamwipangula kintu kampanda, wādi ulondolola. Bādi batendela malondololo mayampe aādi ulondolola. Mwene ubamone Leza kyaādi usangela wandi Mwana?—

Na bubine, ba Madia ne Yosefa pobāmwene Yesu, bātūkije mutyima mpata. Ino Yesu kādipo uzumbija mutyima. Mwanda wādi uyukile amba tempelo i kifuko kiyampe kwikala’mo. O mwanda wāipangwile amba: “Le kemuyukilepo’mba kimfwanyinwe ngikale mu Njibo ya Tata?” Yesu wādi uyukile amba tempelo i njibo ya Leza, kadi wādi uswele kwikala’mo.

Kupwa ba Madia ne Yosefa bājokela na Yesu kwabo ku Nazala, Yesu papo na myaka 12. Molangila Yesu wādi namani na bandi bambutwile? —Eyo, Bible unena amba “wadi wibakokele.” Le molangila i kunena’mba’ka?—I kunena amba wādi na kikōkeji kobadi. Bine, wādi ulonga byobya byādi bimunena bambutwile bandi kulonga, nansha shi abamutume, kimfwa kukateka mema mu mushimwa.—Luka 2:41-52, MB.

I muswelo’ka wāikele Yesu kusanga Leza pa bwanuke?

Penepa langa bidi pa kino: Nansha Yesu byaādi mubwaninine, wādi ukōkele bambutwile bandi bampikwa kubwaninina. Le kino kyāsangeje Leza?—Bine, kyāmusangeje, mwanda Kinenwa kya Leza kinena bana amba: “Kōkelai bakwimubutula.” (Efisesa 6:1) Nobe ukasangaja Leza shi ukōkele bambutwile bobe, mwālongele Yesu.

Muswelo mukwabo obwanya kusangaja Leza i kusapwila bakwabo myanda ya Leza. Bantu bamo bakokeja kunena amba banuke kebafwaninwepo kala kusapula. Ino bantu pobātompele kukankaja bana batyetye kusapula, Yesu wānene amba: ‘Kemwatangile nanshi mu Bisonekwa amba, mu kyakanwa kya twana, mo muneñenye mitōto?’ (Mateo 21:16) Nanshi shi bine tuswile, batwe bonso tubwanya  kusapwila bakwetu myanda ya Yehova ne kumuyukanya mwaikadile Leza wa kutendelwa. Ne shi tulonga namino, tukasangaja Leza.

Le i kwepi kotukafunda myanda ya Leza mwa kukalombwela’yo bakwetu?—I mu kwifunda Bible ku njibo. Ino twifundanga kadi bivule ku kifuko kubungakenanga bantu ba Leza mwanda wa kwifunda. Ino le i muswelo’ka otusa kuyuka bantu bandi?—

Tutale, le i bika biloñanga bano bantu ku kwabo kupwila? Lelo binebine bafundijanga byobya bidi mu Bible? Lelo batañanga Bible ne kwisambila pa myanda idi’mo? Uno o muswelo otutejanga Leza, mwene i amo?—Kadi ku kupwila kwa bwine Kidishitu ko kotufwaninwe kwivwana binena Leza, mwene i amo?—Ino le bikala namani shi bantu banena amba kufwaninwepo kulonda binena Bible mu būmi bobe? Le ukanena amba i bantu ba Leza?—

Tala kintu kikwabo kya kulangulukila’po. Bible unena amba bantu ba Leza bakekala ‘bantu ba dijina dyandi.’ (Bilongwa 15:14) Dijina dya Leza i Yehova, nanshi tubwanya kwipangula bantu shi Yehova ye Leza wabo. Shi bapele amba ke Leza wabopo, nankyo tubayuka kala amba ke bandi bantupo. Kadi bantu ba Leza bafwaninwe kusapwila bakwabo myanda ya Bulopwe bwa Leza. Ne kadi bafwaninwe kuyukana amba baswele Leza mwanda balamine bijila byandi.—1 Yoano 5:3.

Shi uyukile bantu balonga bino byonso’bi, nankyo bo bantu bofwaninwe kutōta nabo pamo. Ufwaninwe kuteja senene ku kuno kupwila; ne shi abaipangula bipangujo, nobe walondolola. Kino kyo kyālongele Yesu paādi mu njibo ya Leza. Ne shi ulonga bino bintu, ukasangaja Leza mwāmusangejije Yesu.

Le nobe ubulwe’po kutela’ko bana bakwabo bāsangeje Leza batelelwe mu Bible?—Temote i kimfwa kiyampe mpata. Shandi kādipo witabije mudi Yehova. Ino inandi Yunisa, ne nkambo wandi  Loisa, bādi betabije. Temote wādi wibevwana ne kwifunda myanda ya Yehova.

Temote wāsakile kulonga bika nansha shandi byaādi wampikwa kwitabija?

Temote pa kutama, mutumibwa Polo wākapempwile kibundi mwaādi ushikete. Wājingulula amba Temote usenswe bikata kwingidila Yehova. O mwanda mwine wāityile Temote kwenda nandi akengidile Leza bininge. Konso kobādi benda, bādi benda basapwila bantu myanda ya Bulopwe bwa Leza ne myanda itala padi Yesu.—Bilongwa 16:1-5; 2 Temote 1:5; 3:14, 15.

Lelo mu Bible mudi enka bimfwa bya bansongwalume bāsangeje Leza kete?—Ke’nkapo abo bonka kete, ehe. Tala bidi mwālongele kansongwakaji kamo kene Isalela. Mu myaka yabo’ya, muzo wa Shidea wādi mu lwana na muzo wa Isalela. Difuku dimo bene Shidea bālwa bulwi na Isalela ne kukwata bākwata kansongwakaji’ko bu kapika. Penepo bēkatuma ku njibo ya mukata wa basola, dijina dyandi i Nemani. Kāikala ke kapika ka mukaja Nemani.

 Papo Nemani nandi wādi na luba lwitwa bu makopo. Mu bañanga bonso kekwādipo nansha umo wādi ubwanya kumundapa’lo. Ino kano kansongwakaji ka mu Isalela kādi kakulupile amba mwingidi umo wa Leza, ubadilwa mu bengidi beshile na bakwabo, ukokeja kukwasha Nemani. Inoko ba Nemani ne mukajandi kebādipo batōta Yehova. Le kansongwakaji’ka kādi kakokeja kwibasapwila byobya byokādi kayukile? Shi wādi abe longa wālongele namani?—

Kano kansongwakaji kene Isalela kāsangeje Leza namani?

Bine, kano kansongwakaji kānene amba: ‘Shi Nemani waenda ku meso a mupolofeto wa Yehova udi mu Samadia’wa! nankyo ukamundapa makopo andi.’ Nemani wāivwene kansongwakaji’ka, wāenda kudi mupolofeto wa Yehova. Nemani pa kulonga byāmunene mupolofeto, wākoma. Kino kyālengeje Nemani ekale mutōtyi wa Leza wa bine.—2 Balopwe 5:1-15.

Lelo nobe usakanga kukwasha muntu kampanda ayuke Yehova ne byonso byakokeja kulonga, pamo na mwālongele kansongwakaji’ka?—Le i bāni bokokeja kukwasha?—Ino na bubine, dibajinji kebakalangapo amba basakilwa bukwashi. Ino abe ukokeja kwibasapwila bintu biyampe bilonga Yehova. Papo bakokeja kwivwana. Kulupila’tu amba kino kikasangaja Leza.

Kukankamikwa kukwabo kukankamikwa bankasampe baloelelwe kwingidila Leza kutanwa mu Mitōto 122:1; 148:12, 13; Musapudi 12:1; 1 Temote 4:12; ne Bahebelu 10:23-25.