Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 44

Balunda Netu Bafwaninwe Nabo Kuswa Leza

Balunda Netu Bafwaninwe Nabo Kuswa Leza

BALUNDA i bantu botusenswe kwisamba nabo ne kwikala nabo kyaba kivule. Ino i kipite buya kwikala na balunda bayampe. Molangila, le i ani mulunda netu muyampe mpata kupita bonso?—Bine, i Yehova Leza.

Lelo na bubine tubwanya kwikala balunda na Leza?—Bine tubwanya, mwanda Bible unena’mba Abalahama, muntu wāikele’ko pa kala kene, wādi ‘Mulunda na Yehova.’ (Yakoba 2:23) Le uyukile kyāmwikadije mulunda na Leza?—Bible ulondolola’mba Abalahama wādi ukōkele Leza. Wādi ukōkela nansha kitatyi kyobādi bamunena kulonga kintu kikomokomo. Nanshi pa kwikala mulunda na Yehova, tufwaninwe kulonga byobya bimusangaja, pamo bwa Abalahama ne mwādi mulongelanga Mufundiji Mukatampe mafuku onso.—Ngalwilo 22:1-14; Yoano 8:28, 29; Bahebelu 11:8, 17-19.

I kika kyālengeje Abalahama ekale ‘mulunda na Yehova’?

 Yesu wāsapwidile batumibwa bandi amba: “Banwe mwi balunda nami shi mulonga kino kyo nemunena.” (Yoano 15:14, MB) Kintu ne kintu kyādi kinena Yesu kyādi kitamba kudi Yehova, nanshi Yesu wādi unena’mba balunda nandi i boba bādi balonga bibanena Leza. I bine, balunda nandi bonso bādi baswele Leza.

Balunda ba pa mutyima ba Mufundiji Mukatampe bādi batumibwa bandi, bomona pa bifwatulo bya pa paje wa 75 wa kino kitabo’ki. Bādi benda nandi pamo ne kumukwasha ku mwingilo wa busapudi. Yesu wādi kitatyi kivule pamo na bano bana-balume. Bādi badīla bidibwa pamo. Bādi besambila pamo myanda ya Leza. Kadi bādi balongela bintu bikwabo pamo. Ino Yesu wādi na balunda bakwabo bavule. Wādi ushikata nabo pamo, kadi wādi upityija nabo byaba bya nsangaji.

Kisaka kimo kyādi kisenswe Yesu kwikala nakyo pamo kyādi mu kibundi kityetye kitwa bu Betani, kufula’tu kwa kibundi kikatampe kya Yelusalema. Lelo ukibavulukile?—Bādi ba Madia, Mata ne mwanabo Lazalasa. Yesu wāityile Lazalasa bu mulunda nandi. (Yoano  11:1, 5, 11) Yesu kyaādi uswelele kino kisaka ne kuloelelwa kwikala nabo pamo i pa mwanda bādi baswele Yehova ne kumwingidila.

Mwanda waka pavule pene Yesu wādi ushikata na kino kisaka shi waenda ku Yelusalema? Lelo uyukile majina abo?

Ino ke kunenapo amba Yesu kādipo biyampe na bantu kebengidilapo Leza. Wādi nabo biyampe. Wādi wenda ne ku mobo abo ne kudya nabo pamo. Kino kyāfikije ne bamo kunena’mba Yesu i ‘mulunda ne basonkeja-musonko ne babipya-mambo.’ (Mateo 11:19) Kunena na bubine, pādi penda Yesu ku mobo a bano bantu, ke kunenapo amba wādi usenswe mwikadila wabo wa umbūmi, ehe. Kyaādi wendela kwabo i mwanda wa kumona mwa kwisambila nabo myanda ya Yehova. Wādi utompa kwibakwasha bashinte mwikadila wabo mubi bamwingidile Leza.

I kika kikandīle Zakiasa ku mutyi?

Ye mokyāikadile difuku dimo mu kibundi kya Yediko. Yesu wādi’tu wipityila lwandi wenda ku Yelusalema. Kwādi kibumbo kikata kya bantu, ne mu kibumbo’mwa mwādi muntu wa dijina dya bu Zakiasa. Wādi usaka nandi amone Yesu. Ino Zakiasa wādi mwīpi, ne wādi kakokejapo kumumona mwanda wa kibumbo. Penepa wānyemena lubilo kufula kwa dishinda wākakanda ku mutyi mwanda wa kumona Yesu biyampe pa kupita.

Yesu pa kufika pa mutyi’wa, wātala kūlu kānena’mba: “Tūka bidi bukidi bukidi, ke-pantu dyalelo dino’di nsaka mfikile mobe munjibo.” Ino Zakiasa wādi mpeta wādi ulonga bintu bibi.  Mwanda waka Yesu wāsakile kwenda ku njibo ya muntu wa uno muswelo?—

Kyādi kyendela’ko Yesu, ke kunenapo amba wādi usenswe mwikadilo wa uno muntu, mhm. Wāendele’ko mwanda wa kusapwila Zakiasa myanda ya Leza. Wāmwene muswelo wakambakene uno muntu pa kumumona. Pa kino wāyukile amba kepabulwe padi Zakiasa ukevwana. Kyāikele kyaba kiyampe kya kumusapwila munenena Leza pa mufwaninwe kwikadila bantu.

Mwanda waka Yesu wakapempula Zakiasa, nandi walaya kulonga bika?

Penepa bibafule namani pamo na motumwena pano’mu?—Zakiasa wasangela bufundiji bwa Yesu. Wealakanya bininge pa mwanda wa byaādi udimbanga bantu, kadi wālaya kujokeja lupeto lonso lwaādi udyanga ku manyengenyenge. Ebiya waikala ke mulondi wa Yesu. Enka’tu kupwa papo, ba Yesu ne Zakiasa abaikala balunda.—Luka 19:1-10.

Shi tulonde kimfwa kya Mufundiji Mukatampe, lelo netu tusa kupempula bantu bampikwa kwikala balunda netu?—Eyo, tusa kwibapempula. Ino kyotwendela ku abo mobo, ke kunenapo amba tusenswe mwikadilo wabo, ehe. Kadi ketukasakepo kulonga bintu bibi byobalonga. Tukebapempula mwanda wa kwibasapwila myanda ya Leza.

 Ino balunda netu ba pa mutyima i boba botusenswe kwikala nabo mu kisense kitatyi kilampe. Pa kusaka bekale balunda bayampe, bafwaninwe kwikala bantu bobasenswe kudi Leza. Bamobamo kebayukilepo ne Yehova mwine. Ino shi basaka kumuyuka, tukokeja kwibakwasha. Ne shi mwenda mafuku abasu Yehova na motumuswelele batwe, papo nabya tubwanya kwikala balunda nabo ba pa mutyima.

Kudi muswelo mukwabo wa kuyuka shi muntu ukokeja kwikala mulunda muyampe. Abe tala bintu byalonga. Lelo aye uloñanga bantu bakwabo bintu bibi koku usepa ne kusepa? Byabyo ke biyampepo, mwene i amo?—Lelo i muntu upyanga myanda kitatyi kyonso? Batwe ketukasakepo kwitweja mu myanda yandi, mwene i amo?—Ne le uloñanga bibi ku kusaka ne kufwatakanya amba i mukosoke mwanda kekudipo umukwete? Nansha shi kekudipo muntu umukwete, Leza umwene byalonga, mwene i amo?—Le ulanga amba bantu balonga bintu bya uno muswelo bakokeja kwikala balunda netu bayampe?—

Kwata’po bidi Bible obe. Tutale mwanenena pa muswelo ukokeja kwitona bakwetu mu būmi bwetu. I kisonekwa kya 1 Kodinda shapita wa 15, vese wa 33. Lelo ubatana’kyo?—Kitangwa’mba: “Kemukyongolwai; kwinangila kubi kuboleja miswelo milumbuluke.” Kino kishintulula’mba shi tunanga na bantu babi, netu tukokeja kwikala babi. Kadi na bubine balunda bayampe nabo baketukwasha twikale na bibidiji biyampe.

Ketukilwa’ko nansha dimo amba Yehova ye Muntu mupite bulēme mu būmi bwetu. Ketukasakepo nansha dimo kona bulunda botusambile nandi, mwene i amo?—Nanshi tufwaninwe kwikala badyumuke amba twikale enka na balunda baswele Leza kete.

Mvubu ya kwikala na balunda bayampe i milombolwe mu Mitōto 119:115; Nkindi 13:20; 2 Temote 2:22; ne 1 Yoano 2:15.