MWANDA WAKA KIDI NA MVUBU?

Shi ubaimanija, nabya ukendeja biyampe būmi bobe pa kyaba kya bakwabo bakwendejeje’bo.

WADI WA KULONGA’PO NAMANI?

Tala bidi uno mwanda: Brian pa kumona bakwabo babidi ba ku masomo bāya, mutyima munda ubamufu. Mwanda uno yenga ke misunsa ibidi mituntulu yobamuningila kutoma mfwanka. Pano abaiya monka.

Mubajinji wamunena’mba:

“Kadi udi’nka bunka? Leka nkulombole mulunda nobe.”

Patela kishima “mulunda,” wakulumuna kilole kya mfwanka mu ditumba ne kutambika’kyo Brian.

Brian wamone mukwabo mupatyike kilole mu minwe. Papo Brian mutyima munda ubamufwididila.

Brian wapele’mba “Um-um, kendi mukulombole kala amba nki . . .”

Mulunda nandi wa bubidi wamutyibe amba: “Leka kwendalala nankyo!”

Brian wamulondolola na bukankamane amba, “Ami nkyendalelepo!”

Kupwa wakwata Brian pa mapuji ne kumunena na misongwe’mba “Ata’tu.”

Mulunda nandi mubajinji wamufwenya kilole mu mpala, kamusongola’mba: “Ketusapo kusapwila’mo muntu nansha umo. Kekudi uyuka.”

Shi wadi amba abe ye Brian, wadi wa kulonga’po namani?

 KUNKUMANA ULANGULUKE!

Le balunda na Brian i balangulukile pa byobalonga? Le i abo bene belangile’byo? Padi ke abopo bene. Divule, i bakwabo bebatonona kulonga nabya. Byobakimba kuswibwa, ke balonga bibasoñanya bakwabo.

Shi i abe utenwe na mwanda wa uno muswelo, le wadi wa kulonga muswelo mukwabo ne kukomena kuningilwa’kwa?

  1. BADIKILA KWITEAKANYA

    Bible unena’mba: “Muntu wañeni umona kibi penepo wefya: Ino bendalale bapita’tu ne kususuka ponka.”​—Nkindi 22:3.

    Divule ubwanya kumona makambakano kumeso. Kimfwa ubamone dya kulampe bakwenu ba ku masomo batoma mfwanka. Papo ubamone kala’mba makambakano oa keo, kowiteakanya.

  2. LANGULUKA

    Bible unena’mba: “Ikalai kyaba kyonso na mutyima wa mundamunda muyampe.”​—1 Petelo 3:16.

    Wiipangule amba, ‘Shi mpwane nyeke na kibumbo’kya, le nkemona namani?’ Na bubine, ukakimba dimodimo kusangaja bakwenu. Ino le ukeimvwana namani kyaba kikwabo? Le ukasaka kona mwikadilo obe mwanda’tu wa kusangaja bakwenu ba ku masomo?​—Divilu 23:2.

  3. KWATA BUTYIBI

    Bible unena’mba: “Wañeni wakamwa.”​—Nkindi 14:16.

    Nansha bikale namani, batwe bonso tunenwe kukwata butyibi ne kwitabija byobya bilupuka’ko. Bible utela bantu bākwete butyibi buyampe, kimfwa Yosefa, Yoba, ne Yesu. Kadi i mutele ne boba bākwete butyibi bubi, Kena, Esau, ne Yudasa. Le ukalonga’po namani?

Bible unena’mba: ‘Londa byobya bya binebine.’ (Ñimbo ya Mitōto 37:3) Shi ulangulukila kala pa bikokeja kulupuka ne kuteakanya ñeni yobe, ukatulumuka’tu ke bikupēlela kulama mwimanino obe​—kadi ukamwena’mo.

Kokazakala​—kebikulombepo kushintulwila bakwenu bilabila. Pakwabo bikulomba kupela’tu na kusumininwa amba, Aa. Nansha pa kulombola mwimanino obe wampikwa kutelententa, ubwanya kunena’mba:

  • “Ami bidi ntalulei’mo!”

  • “Nkikalangapo nonga byabyo’byo!”

  • “Mundyukile kala biyampe!”

Kya mvubu i kulondolola ponka na ponka kadi na kusumininwa. Shi ulonga namino ubwanya kutulumuka’tu padi badi bakuningila’ba abakuleka!

 MWA KULONGELA POBAKUZAWILA

Shi witabije bikuningila bakwenu, nabya ukekala bwa kimashini kyobendeja

Le ukalonga namani shi bakwenu bakuzawila? Shi abakunena’mba, “Kibi kidi kwepi​—le ubavila’ni?” Abe’wa mona bino byonso bu kuningilwa na bakwenu. Le ukalonga’po namani? Kudi miswelo ibidi ya bya kulonga.

  • Kwitabija mizaulo’ya. (“Udi na bubinga, ami ne wa bule!” Kupwa lombola mu kīpi kyowapēlela.)

  • Ubwanya kumujokejeja byaakunenanga. Lombola kyowapelelanga ne kumulengeja alanguluke. (“Nkyadipo nkulangila’mba ubwanya kutoma mfwanka!”)

Shi bakwenu abaendelela na kukuzawila, taluka’po! Vuluka’mba shi wije’po po pene. Shi utaluke’po ubalombola amba kusakilepo bakwenu bashinte mwimanino obe.

Na bubine, kudipo mwa kwepukila kuningilwa na bakwenu. Inoko ubwanya kutonga byosaka kulonga, kulama mwimanino obe pampikwa kujina. Ku mfulo, ke abe mwine wa kutonga!​—Yoshua 24:15.