MWANDA WAKA KIDI NA MVUBU?

Shi witeleke biyampe na bambutwile, nabya ukekala biyampe mu būmi.

WADI WA KULONGA’PO NAMANI?

Tala bidi uno mwanda: I Dya Busatu kyolwa. Geoffrey wa myaka 17, wapu byobadi bamunenene kulonga, pano kadi na mutyima wa kukepwija mukose! Waakija televijo ne kwiela mu kityi kyasenswe.

Aye’tu upwa nabya, shandi nandi wafika pa kibelo, mulobe.

“Geoffrey! Mwanda waka wela kyaba na kutala televijo, mwene wadi ufwaninwe kukwasha’ko nkasobe na kaji? Abe kuloñangapo nyeke byotukunena!”

eoffrey weuninga bimvwanikwa amba, “Bibaiya monka.”

Shandi wamufwena, wamwipangula’mba, “Abe, i bika byowanena?”

Geoffrey waela kyefu ne kumukengula, kupwa walondolola’mba, “Aa, kutupu.”

Shandi walobe ne kumufunina’mba, “Kokatompa kunondolola nankyo difuku dikwabo!”

Shi wadi amba abe ye Geoffrey, wadi wa kupwa uno mwanda namani?

KUNKUMANA ULANGULUKE!

Kwisamba na bambutwile kudi pamo bwa kwendeja motoka. Shi ubatana mabwe mwishinda, ubwanya kwiakonkoloka.

 KIMFWA:

Nsongwakaji umo witwa bu Leah unena’mba: “Ntunyanga kwisamba na Tata. Kyaba kimo shi namuneneja, umona wanondolola’mba, ‘Eh, mfwile’ko lusa, i ami o wadi unena?’”

LEAH UDI NA BINTU BISATU BYA KUTONGA’PO KYA KULONGA.

  1. Kusanukila shandi.

    Leah alondolole na bulobo mba, “Aa, kebidipo na mwanda! Wibileke!”

  2. Kuleka kwisamba na shandi.

    Leah aleke’byo’tu kulombola shandi wandi mwanda.

  3. Kwilaija kitatyi kikwabo, ebiya besambile pa mwanda’wa.

    Leah esambe na shandi mpala na mpala, nansha kumulembela mwanda’wa mu mukanda.

Le ulanga Leah atonge’po kyepi?

TALA: Shandya Leah wadi musūle’ko​—pa kino kamwenepo amba mwana wafītwa. Shi Leah atonge Kipindi A, shandi kasapo kuyuka kyaasanukila i kika. Kino kipindi kekisapo kulengeja shandi ate mutyima ku binena mwana, kadi kikalombola’mba kalēmekelepo shandi. (Efisesa 6:2) I bine, i kutupu usa kumwena mu kino kipindi.

Monka mokukajokelapo mu lwendo mwanda wa mabwe, mo monka mokasokwela ne muswelo wa kwiteleka na bambutwile

Kipindi B nansha byo kipēla ino kekilombolapo tunangu. Mwanda waka? Mwanda pa kupwija wabo mwanda senene, Leah ufwaninwe kwisamba na shandi​—kadi pa kusaka amba shandi amukwashe, ufwaninwe bidi kuyuka būmi bwa mwana. Kūba talala kekukapwijapo mwanda’wa.

Ino Kipindi C, Leah kalekelepo mabwe adi mu dishinda amwipaile lwendo. Inoko watonge kwisamba na shandi kitatyi kikwabo. Kadi shi Leah watoñenga kulembela shandi mukanda, napo kadi wadi wa kwiimvwana biyampe.

Kadi kulemba mukanda kubwanya kumukwasha anene biyampe bidi ku mutyima. Shandi nandi pasa kutambula uno mukanda usa kuyuka bine byadi bisaka kumusapwila Leah, ne kino kikamukwasha emvwanije bine bikambakanya mwana. Mu uno muswelo Leah ne shandi abamwena bonso mu Kipindi C. Kino kipindi, kikale kya kwisamba mpala na mpala nansha na mukanda, kibakwatañana na mulangwe wa mu Bible wa amba, “tulondelondei bintu bileta ndoe.”​—Loma 14:19.

I bika bikwabo byadi bibwanya kulonga Leah?

Shi kudi mulangwe owavuluka lemba’o papa padi pululu. Kupwa lemba bibwanya kulupuka’ko.

 IKALA NA MUNENENO MUPOTOLOKE

Vuluka’mba, ke ponsopo pabwanya kwitana byowanena na mwebimvwanina bambutwile bobe.

KIMFWA:

Bambutwile bobe abakwipangula kine kyokaledile. Ubalondolola’mba “Kimvwenepo bya kwisamba’byo.”

Ino bambutwile bobe abaimvwana’byo amba: “Nkimukulupilepo. Nkimusapwila’byopo nsa kukasapwila’byo balunda nami.”

Langa shi udi na mwanda mukatampe ino bambutwile basaka kukukwasha. Ino ubanena amba: “Kemwakilangai’ko. nsa kwiupwija ami mwine.”

  • Bambutwile bobe babwanya kwibimvwana namani?

  • I muswelo’ka muyampe owadi wa kwibalondolola?