Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Lelo I Bika Bine Bifundija Bible?

 SHAPITA WA DIKUMI NE KITEMA

Wilame mu Buswe bwa Leza

Wilame mu Buswe bwa Leza
  • Kuswa Leza kushintulula namani?

  • I muswelo’ka otukokeja kwilama mu buswe bwa Leza?

  • Yehova ukesela namani boba belama mu buswe bwandi?

Le ukalonga Yehova ekale ke kinyemeno kyobe mu bino bitatyi bya kimpumpu?

1, 2. I kwepi kwampikwa kyaka kotukokeja kunyemena dyalelo?

FWATAKANYA shi wenda mu dishinda koku kimpumpu kipukuma. Kūlu kubafīta fututu. Mapeni abashilula kupena, mikungulo nayo keikungula, ku mfulo mvula kanoke kinya kikuka milungu. Ubanyema lubilo, wenda ukimba mwa kufyama. Amba wele meso kufula kwa dishinda, ubamone’ko kitanda. I kikomo senene, mūmu tē, kadi mudi’tu dyangi shē. Bine ukasangela muntu’mwa!

2 Netu tudi mu bitatyi bya bimpumpu. Ngikadilo ya ntanda yendanga ibipila’ko. Ino shako kudi kitanda nansha mpakala yampikwa’mo kyaka, mu kinyemeno motukokeja kulamibwa lonso ku bibi. Le i mwepi le? Imvwana mufundijija Bible, amba: “Nkemunenena Yehova na’mba aye i mpakala yami, i munsakwa mwami; wami Leza mo nkulupile.”—Ñimbo 91:2.

3. Yehova ukekala kinyemeno kyetu namani?

3 Langa’po bidi! Yehova, Umpangi ne Mubikadi wa diulu ne ntanda, ukokeja kwikala mpakala yetu ya kwitukinga. Ukokeja kwitulama  senene, mwanda udi na bukomo bupityile bwa muntu nansha kintu kyo-kyonso kikimba kwitusanshija. Nansha shi abetusanshija, Yehova ukokeja kupwija bibi byonso bitufikila. Ino Yehova ukekala kinyemeno kyetu namani? Tufwaninwe nanshi kumukulupila. Kadi, Kinenwa kya Leza kitusoñanya’mba: ‘Mwilamei mu buswe bwa Leza.’ (Yude 21) I amo, tufwaninwe kwilama mu buswe bwa Leza, ko kunena amba kuloeja kipwano kyetu kya buswe na Tata wetu wa mūlu. Nabya tukakulupila amba i kinyemeno kyetu. Ino tukaningija namani kino kipwano?

KUJIULA NE KWITABA KU BUSWE BWA LEZA

4, 5. I miswelo’ka imoimo ilombwele’mo Yehova buswe bwandi kotudi?

4 Pa kwilama mu buswe bwa Leza, tufwaninwe bidi kwimvwanija muswelo witulombolanga Yehova buswe. Langa bidi bufundiji bumobumo bwa mu Bible bowafunda mu dino dibuku. Yehova byadi Umpangi, i mwitupe ntanda bu kīkalo kyetu kilumbuluke. I mudinge’po bidibwa ne mema, bungibungi bwa bipangwa, būmi bwa banyema, ne bintu bivule bya buya bwa dyangi. Kadi Leza byadi Mushiludi wa Bible, i mwitusokwele dijina ne ngikadilo yandi. Kadi Kinenwa kyandi kitulombola amba wātumine Yesu wandi Mwana muswe pano panshi, wāmuleka etususukile ne kwitufwila. (Yoano 3:16) Le kino kyabuntu kidi na kamweno’ka kotudi? Kyo kitupa lukulupilo lwa būmi bwa kutendelwa mu mafuku āya kumeso.

5 Lukulupilo lwetu lwa mu mafuku āya kumeso lwimanine ne pa kintu kikwabo kilongele Leza. Yehova i mushimike umbikalo wa mūlu, ke Bulopwe bwa Meshiasa kadi. Panopano ponka busa kupwija masusu onso ne kwalamuna ntanda ke paladisa. Langa’po bidi! Tukokeja kwikala’mo nyeke mu ndoe ne mu nsangaji. (Ñimbo 37:29) Pano’ko bidi, Leza i mwitupe buludiki bwa mwa kwikadila na būmi bulumbuluke tamba’nka pano. Kadi i mwitupe kyabuntu kya milombelo, dishinda didi pululu dya kwisamba nandi. Ino i miswelo’tu mityetye Yehova yalombwele’mo buswe bwandi ku bantu bonso ne kodi abe bunka bobe.

6. Le ukokeja kwitaba namani ku buswe bukuswele Yehova?

 6 Kipangujo kya kamweno kyofwaninwe kubandaula i kino: Le nketaba namani ku buswe bwa Yehova? Bavule bakanena’mba, “Eyo, nami mfwaninwe kuswa Yehova.” Le nobe ye momwena? Yesu wānene amba kino kyo kijila kikatampe kipityile byonso, amba: “Sanswa Yehova Leza obe na mutyima obe onso ne na muya obe onso ne na ñeni yobe yonso.” (Mateo 22:37) Bine, kudi bubinga buvule bofwaninwe kuswila Yehova Leza. Ino le kwimona amba udi na buswe bwa uno muswelo kyo kintu kimo kete kilombwa pa kuswa Yehova na mutyima, na muya, ne na manwa obe onso?

7. Le kuswa Leza i enka kwimona’tu amba umuswele? Shintulula.

7 Monka mwikilombwela Bible, kuswa Leza ke enkapo kwimona amba umuswele. Bine, kwiimvwana amba uswele Yehova kudi na kamweno, inoko yo ngalwilo’tu ya kumulombola buswe bwa bine. Eyo, museke wa kipa udi na mvubu pa kusaka amba wikale na mutyi upa’ko bipa. Ino shi usaka kipa, le ukasangala shi muntu wa kupe’nka museke onkaonka? Nansha dimo! Ne kwimona bu muntu uswele Yehova Leza nako mo monka, i ngalwilo’tu. Bible ufundija’mba: “Buno namino bo buswe bwa Leza, amba tulame mbila yandi; kadi mbila yandi keilēmangapo, aa.” (1 Yoano 5:3) Nanshi buswe bwa bine bwa kuswa Leza bufwaninwe kupa bipa bilumbuluke. Bufwaninwe kumweka mu bilongwa.—Tanga Mateo 7:16-20.

8, 9. I muswelo’ka otukokeja kuswa Leza ne kumufwija’ko?

8 Tulombolanga amba tuswele Leza shi tulama mbila yandi ne kulonda misoñanya yandi. Kebikolepo mpata kulonga uno muswelo. Bijila bya Leza kebilēmangapo, mhm, ino i bitūlwe’ko mwanda wa twikale na būmi buyampe, bwa nsangaji, ne botutondwa senene. (Isaya 48:17, 18) Shi tulonde buludiki bwa Yehova, nabya i Tata wetu otufwija’ko bikatampe pangala pa bintu byonso byetulongele. Ino i kya bulanda, mwanda i batyetye kete bafwija’ko Leza mu ino ntanda ya dyalelo. Ketusakilepo  kwikala bantu bampikwa mutyima wa kufwija’ko, pamo bwa bamobamo ba mu kitatyi kyādi Yesu pano panshi. Yesu wābelwile ba makopo dikumi, ino umo kete ye wājokele kumufwija’ko. (Luka 17:12-17) Bine, twikalei pamo bwa yewa umo wāfwijije’ko, ke pamopo bwa boba kitema bampikwa mutyima wa kufwija’ko!

9 Shi ke pano, i mbila’ka imoimo yotufwaninwe kulama? Ke tudi besambile pa imoimo mu dino dibuku, ino leka tupituluke’mo mityetye. Kulama mbila ya Leza kuketukwasha twilame mu buswe bwandi.

FWENA BININGE KUDI YEHOVA

10. Shintulula mwanda waka i kya kamweno twendelele kwifunda kuyuka Yehova Leza.

10 Kwifunda kuyuka Yehova i ditabula dya kamweno pa kufwena kwadi. I mwanda wa kulonga nyeke nyeke. Shi wadi amba udi panja pa mashika bufuku ota mudilo, le wadi wa kuleka lubimbi lwenda lufifila (lububalala) ne kubula? Nansha dimo. Wadi wa kwendelela na kusonshila nkuni mwanda wa lubimbi lwendelele na kwaka ne  kukukabija. Būmi bobe budi mu kyaka! Pamo’nka bwa nkuni ishinsakanibwa nayo mudilo, “kuyukidija Leza” kukashinsakanya nyeke buswe bwetu botuswele Yehova bwikale bukabe.—Nkindi 2:1-5.

Buswe boswele Yehova bufwaninwe kusonshilwa mwa kwakila’bo nyeke pamo bwa mudilo

11. Bufundiji bwa Yesu bwādi na lupusa’ka pa balondi bandi?

11 Yesu wādi usaka balondi bandi bekale nyeke na buswe buloe kadi bukabe bobaswele Yehova ne Kyandi Kinenwa kilēme kya bubine. Yesu pa kupwa kusanguka, wāfundije bana bandi ba bwanga babidi bupolofeto bumobumo bwa mu Bisonekwa bya Kihebelu bwāfikidile padi aye. Byāikala namani? Bana ba bwanga’ba bānene’mba: “Le mityima yetu keyadipo itēma mudilo paadi wisamba netu mwishinda, paadi witushintulwila ne pa mfulo Bisonekwa?”—Luka 24:32.

12, 13. (a) Bavule badi mu ntanda ya dyalelo, buswe bwabo bobaswele Leza ne Bible ke budi namani? (b) Tukalonga namani buswe bwetu buleke kutalala?

12 Nobe powayukile dibajinji byobya bifundija Bible, mwene waimvwene mutyima obe ukabijibwa na nsangaji, na bupyasakane, ne na buswe bwa kuswa Leza? Bine, waimvwene uno muswelo. Bavule bene bemvwananga uno muswelo. Ino kyashala pano i kino: kulama buno buswe kashā bukaba ne kwendelela na kwibutamija. Ketusakilepo kulonda bisela bya ntanda ya dyalelo. Yesu wālaile amba: “Buswe bwa bangi bene bukatalala.” (Mateo 24:12) Ukalonga namani buswe boswele Yehova ne bubine bwa mu Bible buleke kutalala?

13 Endelela na kwifunda kuyuka Yehova Leza ne Yesu Kidishitu. (Yoano 17:3) Languluka, nansha kulanga na mushike, pa byobya byowifunda mu Kinenwa kya Leza na kwiipangula’mba: ‘Le bino bibamfundija bika padi Yehova Leza? Lelo bibampe buluji’ka bukwabo bwa kumuswila na mutyima, na ñeni, ne na muya wami onso?’ (Tanga 1 Temote 4:15.) Kulanguluka kwa uno muswelo kukalengeja buswe boswele Yehova bwikale nyeke bukabe.

14. Le milombelo iketukwasha namani buswe botuswele Yehova bwikale nyeke buloe?

14 Muswelo mukwabo wa kulama buswe boswele Yehova  bwikale nyeke bukabe i kulombela kitatyi ne kitatyi. (1 Tesalonika 5:17) Mu Shapita wa 17 wa dino dibuku, twafundile amba milombelo i kyabuntu kilēme kitupele Leza. Monka muloelanga kipwano kya bantu besamba kitatyi ne kitatyi pampikwa kafinda, ne kipwano kyetu na Leza nakyo mo monka, kikekala kikabe ne kyūmi shi tulombela kitatyi ne kitatyi. Nanshi i kipite buya milombelo yetu ileke kwikala ya kisela—ya kupituluka mu bishima byotwibidile kala, twadi’mo ke tudi’mo, pampikwa kumwekeja malango ne buluji bwinebwine. Tufwaninwe kwisamba na Yehova monka mwisambilanga mwana na shandi wa buswe. Shako, tukesamba na bulēme, inoko tulupula bitudi ku mutyima, pampikwa kafinda ne budimbidimbi. (Ñimbo 62:8) Bine, kwifunda Bible pa kasuku ne milombelo ya na mutyima umo i bintu bya kamweno mu butōtyi bwetu, kadi bitukwasha twilame mu buswe bwa Leza.

SANGELA BUTŌTYI BOBE

15, 16. Mwanda waka i kyendele’mo tumone mwingilo wa kusapula Bulopwe bu dyese ne kyabulēme?

15 Kwifunda Bible pa kasuku ne milombelo i bilongwa bibadilwa mu butōtyi botutōtela kufula. Ino pano tubandaulei bintu bikwabo bibadilwa mu butōtyi bwetu bumweka ku meso a bantu: kusapwila bakwetu nkulupilo yetu. Le kodi kala musapwile bantu bakwabo bubine bwa mu Bible? Shi i amo, nabya wasangedile dino dyese dya kutendelwa. (Luka 1:74) Kitatyi kyotusapula bubine butala padi Yehova Leza botufundile, nabya twingilanga mwingilo wa kamweno mpata upelwe bene Kidishitu bonso ba bine—wa kusapula myanda miyampe ya Bulopwe bwa Leza.—Tanga Mateo 24:14; 28:19, 20.

16 Mutumibwa Polo wādi umona mwingilo wandi bu kintu kya mvubu, wiwita bu kyabulēme. (2 Kodinda 4:7) Kulombola bantu myanda itala Yehova Leza ne mpango yandi o mwingilo upityile yonso ofwaninwe kwingila. I mwingilo wingidilwa Mfumu upityile bonso, uleta ne byabuyabuya bipite byonso. Kwingila uno mwingilo ko kukwasha bantu ba mityima miyampe bafwene kudi Tata wetu wa mūlu, bashilule ne kwenda  mu dishinda ditwala ku būmi bwa nyeke! Le kudi kadi mwingilo uleta kuloelelwa kutabuka uno? Pakwabo kadi, kusapula bukamoni butala padi Yehova ne Kinenwa kyandi kutamijanga lwitabijo lobe ne kuloeja buswe bomuswele. Kadi Yehova utendelanga bukomo bolonga. (Bahebelu 6:10) Kwingila uno  mwingilo nyeke ne na kininga kukakukwasha wilame mu buswe bwa Leza.—Tanga 1 Kodinda 15:58.

17. Mwanda waka mwingilo wa bwine Kidishitu i wa kupēlakana nao dyalelo?

17 I biyampe kadi kuvuluka amba mwingilo wa kusapula Bulopwe i wa kupēlakana nao. Bible unena’mba: “Sapula kinenwa, pyasakena’mo.” (2 Temote 4:2) Mwanda waka dyalelo dyo dine dya kupēlakana nao? Mwanda Kinenwa kya Leza kitulombola’mba: “Difuku dikatakata dya Yehova didi pabwipi, didi pabwipi ponka, ne kupeja’dyo nakampata.” (Zefenia 1:14) I amo, kitatyi aki kīya lubilo kya Yehova kufudija ngikadilo yonsololo ya bintu. Bantu bafwaninwe kudyumunwa! Banenwe kuyuka amba pano kyo kitatyi kya abo kutonga Yehova ekale Mubikadi wabo. Mfulo ‘keikejepo, mhm.’—Habakuka 2:3.

18. Mwanda waka tufwaninwe kutōta Yehova patōkelela pamo na bene Kidishitu ba bine?

18 Yehova usaka tumutōte patōkelela pamo na bene Kidishitu ba bine. O mwanda Kinenwa kyandi kinena’mba: “Twitei mityima batwe bene na bene mwanda wa kwikankamikila ku buswe ne ku mingilo milumbuluke, ne kuleka’byo kwibungila pamo mpika, na mwaibidila bamobamo, ino twikankamikei batwe bene na bene, nakampata pano pomwamona difuku dibafwena po pene.” (Bahebelu 10:24, 25) Kitatyi kyotwibungila pamo na banabetu betabije ku kupwila kwa bwine Kidishitu, twikalanga na mukenga mulumbuluke wa kutendela ne kutōta Leza wetu muswe. Ne kadi twitamijanga ne kwikankamika batwe bene na bene.

19. I muswelo’ka okokeja kuningisha bijimba bya buswe mu kipwilo kya bwine Kidishitu?

19 Ponso potwitana na bakwetu batōtyi ba Yehova, tuningishanga bijimba bya buswe ne bya bulunda mu kipwilo. I biyampe nanshi tukimbe biyampe bidi mu bakwetu, monka mukimbila Yehova biyampe motudi. Ke biyampepo kusaka banabenu mu lwitabijo bekale babwaninine. Vuluka amba bonso kebadipo mu ludingo lumo mu kutama kwa ku mushipiditu, ne amba batwe bonso tulubanga. (Tanga Kolose 3:13.) Kimba kupwana na boba baswele mpata Yehova, nabya nobe  ukatama ku mushipiditu. I amo, kutōta Yehova na batutu ne bakaka ba ku mushipiditu kukakukwasha wilame mu buswe bwa Leza. Lelo Yehova upalanga namani boba bamutōta na kikōkeji ne belamine mu buswe bwandi?

KWATYIJA “BŪMI BWINEBWINE”

20, 21. Lelo “būmi bwinebwine” i būmi’ka, ne mwanda waka i lukulupilo lwa kutendelwa?

20 Yehova upalanga bengidi bandi ba kikōkeji mpalo ya būmi, ino le i būmi bwa muswelo’ka? Lelo bine wi mūmi dyalelo dino? Bavule bakanena amba malondololo adi patōka. Mwene yeu twesa, tudya, ne kutoma? Nanshi twi bōmi. Ne kadi mu bitatyi bya nsangaji, tukokeja’nka ne kunena’mba, “Buno shabo bo būmi bwine!” Inoko, Bible ulombola amba, mu buluji bwinebwine, i kutupu muntu dyalelo udi na būmi bwine.

Yehova usaka wikale na “būmi bwinebwine.” Le ukekala nabo?

21 Kinenwa kya Leza kitusoñanya tukwatyije “pototo būmi bwinebwine.” (1 Temote 6:19) Bino binenwa bilombola amba “būmi bwinebwine,” i kintu kyotukulupile kukatambula mu mafuku āya kumeso. Bine, potukekala babwaninine, tukekala bōmi mu buluji bonso bwa kishima, mwanda tukekala na būmi monka mwādi mwitusakila’bo Leza ku ngalwilo. Popa potukekala mu paladisa pano pa ntanda bakomo nkē, mu ndoe, ne mu nsangaji, po apo potukekala na “būmi bwinebwine”—būmi bwa nyeke. (1 Temote 6:12) Mwene luno i lukulupilo lwa kutendelwa?

22. I muswelo’ka okokeja kukwatyija “senene būmi bwa nyeke bwine”?

22 I muswelo’ka otukokeja kukwatyija “senene būmi bwa nyeke bwine”? Mu mwanda umo onka waādi wisambila’po, Polo wāsoñenye bene Kidishitu amba “balonge biyampe” kadi “bekale bampeta mu mingilo milumbuluke.” (1 Temote 6:18) Nanshi i kimweke patōka amba bivule bitala pa muswelo otwingidija bubine botufundile mu Bible. Ino le Polo wādi usaka kunena amba tukafutwa “būmi bulumbuluke” pangala pa mingilo milumbuluke? Ke amopo, mwanda na bubine, tukapebwa kino kyepelo ku “buntu” bwa Leza. (Loma 5:15) Inoko,  Yehova uloelelwe kupala mpalo boba bamwingidila na kikōkeji. Wabilanga kukumona nobe wikele na “būmi bwinebwine.” Buno būmi bwa nsangaji, bwa ndoe, ne bwa nyeke bo butengēlwe na boba bonso belamine mu buswe bwa Leza.

23. Mwanda waka i kya kamweno kwilama mu buswe bwa Leza?

23 Umo ne umo umbukata mwetu ufwaninwe kwiipangula amba, ‘Lelo ntōtanga Leza mwalombwedile’kyo aye mwine mu Bible?’ Shi twibandaula dyuba ne dyuba, ne kulondolola amba i amo, nabya tudi mu dishinda dyoloke. Tukulupilei amba Yehova i kinyemeno kyetu. Ukanyongolola bantu bandi ba kikōkeji mu ano mafuku a mfulo a tuvutakanya twa ino ngikadilo ya bintu minunu. Kadi Yehova uketupandija ne kwitutweja mu ngikadilo ya bintu impya ya ntumbo yafwena’i. Bine, tukasangala mpata potukemwena kine kitatyi’kya! Ne kadi tukaloelelwa bya binebine pa kuyuka amba twatongele butongi boloke mu bula bwa mafuku a mfulo! Shi nobe walwile’ko kutonga buno butongi pano, bine kukabulwepo kumona “būmi bwinebwine,” būmi bwādi busaka kala Yehova Leza, mu bula bwa myaka yonso nyeke ne nyekeke!