Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA WA DIKUMI NE BUTANO

Mutōtelo Witabijibwe na Leza

Mutōtelo Witabijibwe na Leza
  • Lelo bipwilo byonso bisangajanga Leza?

  • Tukayuka namani kipwilo kya bine?

  • Batōtyi ba bine ba Leza pano pa ntanda i bāni dyalelo?

1. Le i bika byotukamwena mu kutōta Leza mwasakila?

YEHOVA LEZA witutele mpata mutyima kadi usaka tumwene mu buludiki bwandi bwa buswe. Shi tumutōte mwasakila, tukekala na nsangaji kadi tukepuka makambakano mavule umbūmi. Kadi uketwesela ne kwitukwasha. (Isaya 48:17) Inoko kudi bipwilo tutwa na tutwa bītela amba bifundijanga bubine butala padi Leza. Ino bifundijanga myanda mishile mpata itala pa mwikadile Leza ne pa byasaka kotudi.

2. Tukokeja kuyuka namani muswelo muyampe wa kutōta Yehova, ne i kimfwa’ka kitukwasha twivwanije kino?

2 Shi ke pano, ukayuka namani muswelo muyampe wa kutōta Yehova? Kebikulombepo bidi wifunde ne kwenzankanya bufundiji bwa bipwilo byonso bivule nenki. Abe ufwaninwe’tu kwifunda enka byobya bine bifundija Bible pa mutōtelo wa bine kete. Tulete kimfwa: Mu matanda mavule mwikalanga makambakano a lupeto lwa bubela. Shi abakunena kujiula luno lupeto lwa bubela, le ukalonga namani? Le ukashilula kukwatyila tuyukeno twa lupeto lo-lonso lwa bubela? Mhm. Kikekala kiyampe upityije kitatyi kyobe na kujingulula lupeto lwa bine. Shi ubapu kukwatyila mwikadile lupeto lwa bine kubapu, papo ukajingulula lubilo lonka lupeto lonso lwa bubela. Ne kwifunda kuyuka kipwilo kya bine nako mo monka, kukakukwasha ujingulule bipwilo bya bubela.

3. Mungya Yesu, i bika byotufwaninwe kulonga shi tusaka Leza etwitabije?

 3 I biyampe kutōta Yehova mu muswelo waitabije. Bavule bakulupile amba bipwilo byonso bisangajanga Leza, ino Bible aye kafundijangapo nankyo. Enka ne kwitela’tu bu mwine Kidishitu bitupu kwine kekubwenepo. Yesu wānene amba: “Ke ensepo wa kunena ami amba: ‘Mfumwami, Mfumwami,’ ukatwela mu Bulopwe bwa mūlu, poso yewa ulonga kiswa-mutyima kya Tata udi mūlu.” Nanshi, pa kwitabijibwa na Leza, i biyampe tuyuke byasaka kotudi ne kwibilonga. Boba bonso kebalongapo kiswa-mutyima kya Leza, Yesu wēbetyile bu “ba kujilula bijila.” (Mateo 7:21-23) Kipwilo kya bubela kekidipo na mvubu monka mwikadile lupeto lwa bubela. Kadi kibi kutabuka, kipwilo kya uno muswelo kiletanga kyaka.

4. Binenwa bya Yesu bitala pa mashinda abidi bidi na buluji’ka, kadi dishinda ne dishinda ditwalanga kwepi?

4 Yehova upele muntu yense wa pano panshi mukenga wa kwikala na būmi bwa nyeke. Ino pa kwikala na būmi bwa nyeke mu Paladisa, tufwaninwe kutōta Leza mobifwaninwe ne kwikala na būmi bulonda byasaka. I kya bulanda, mwanda bavule bapelanga kulonga uno muswelo. O mwanda Yesu wānene amba: “Twelelai pa kakibelo katyetye; mwanda dishinda ditwala ku konakanibwa i dikatampe kadi didi pululu, ne benda’mo bene i bavule; inoko kakibelo i katyetye ne dishinda ditwala ku būmi nadyo i dityinye, ne ba kwidisokola bene i batyetye.” (Mateo 7:13, 14) Kipwilo kya bine kitwalanga ku būmi bwa nyeke. Ino kya bubela kitwala ku koneka. Yehova kasakilepo muntu nansha umo akoneke, o mwanda upele bantu bonso mukenga wa kufunda myanda yandi. (2 Petelo 3:9) Nanshi na bubine, muswelo otutōta Leza bo būmi nansha lufu.

MWA KUYUKILA KIPWILO KYA BINE

5. Tukayuka namani boba balonda kipwilo kya bine?

5 Tukasokola namani “dishinda ditwala ku būmi”? Yesu wānene amba mutōtelo wa bine ukayukena ku būmi bwa bantu beulonda. “Mukebayukila ku bipa byabo,” mo mwaānenene. ‘Mutyi muyampe upanga bipa bilumbuluke.’ (Mateo 7:16, 17)  Ko kunena amba, boba badi mu kipwilo kya bine bafwaninwe kuyukena ku nkulupilo yabo ne ku mwiendelejo wabo. Nansha batōtyi ba bine byokebabwanininepo, baluba ne kuluba, ino beelelanga’ko mu kikonge kulonga kiswa-mutyima kya Leza. Tubandaulei pano bilomboji bisamba biyukanya boba balonda kipwilo kya bine.

6, 7. Bengidi ba Leza bamwene Bible namani, ne Yesu wāshile kimfwa’ka mu uno mwanda?

6 Bengidi ba Leza balupulanga bufundiji bwabo mu Bible. Bible mwine unena’mba: “Kisonekwa kyonso i kisonekejibwe na mushipiditu wa Leza kadi i kya kamweno pa kufundija, pa kudingila, pa kolola, ne pa kulemununa mu boloke, amba muntu wa Leza ekale mubwanye byonsololo, muteakanibwe senene mwa kwingidila mwingilo onso muyampe.” (2 Temote 3:16, 17) Kadi mutumibwa Polo wātumīne banababo bene Kidishitu mukanda’mba: “Pomwatambwile kinenwa kya Leza, kyomwaivwene kotudi, mwaitabije’kyo, ke bu kinenwapo kya bantu, aa, ino i monka mokikadile binebine, bu kinenwa kya Leza, kingila ne momudi banwe betabije.” (1 Tesalonika 2:13) Nanshi nkulupilo ne bilongwa bya kipwilo kya bine kebilondangapo mimweno nansha bisela bya bantu. I bilupuke mu Bible, Kinenwa kya Leza kya ku bukomo bwa mushipiditu.

7 Yesu Kidishitu wāshile kimfwa kiyampe kya kulupula bufundiji bwandi mu Kinenwa kya Leza. Pa kulombela kudi Shandi, wānene amba: “Kinenwa kyobe i bubine.” (Yoano 17:17) Nanshi Yesu wādi ukulupile Kinenwa kya Leza, kadi byonso byaādi ufundija byādi bikwatañene na Bisonekwa. Divule Yesu wādi unena’mba: “I kilembwe amba.” (Mateo 4:4, 7, 10) Kupwa wāpituluka mu kisonekwa. Mo monka ne bantu ba Leza dyalelo, nabo kebafundijangapo milangwe yabo. Bakulupile amba Bible i Kinenwa kya Leza, o mwanda balupulanga bufundiji bwabo’nka mu byobya byanena.

8. Kutōta Yehova i kulonga bika ne bika?

8 Boba balonda kipwilo kya bine batōtanga Yehova kete kadi bayukanyanga dijina dyandi. Yesu wānene amba: “Ufwaninwe kutōta Yehova Leza obe, kadi aye kete ye ofwaninwe kwingidila  mingilo ikola.” (Mateo 4:10) Nanshi bengidi ba Leza bafwaninwe kutōka’nka Yehova kete. Kutōta uno muswelo i ne kuyukanya dijina dya Leza wa bine i dijina’ka ne i Leza wa muswelo’ka. Ñimbo 83:18 inena’mba: “Bayūke’mba, abe enka, wa dijina dya bu-Yehova, wi Mwinemukatakatamwine panopantanda ponsololo.” Kadi Yesu wāshile kimfwa pa kukwasha bakwabo nabo bayuke Leza, monka mwaānenene mu milombelo amba: “Nayukanya dijina dyobe ku boba bowayete mu ino ntanda waumpa’bo.” (Yoano 17:6) Ne batōtyi ba bine dyalelo nabo mo monka, bafundijanga bakwabo dijina dya Leza, mpango yandi, ne ngikadilo yandi.

9, 10. Bene Kidishitu ba bine belombolanga buswe abo bene na bene namani?

9 Bantu ba Leza belombolanga buswe bwa binebine, bwampikwa kwisakila. Yesu wānene amba: “Pa kino e pakayukila bonso amba mwi bami bana ba bwanga, shi mudi na buswe umbukata mwenu.” (Yoano 13:35) Bene Kidishitu babajinji bādi beswele uno muswelo. Buswe bwa bwine Leza butyumunanga bijika bya misaka, tubila, ne mizo kadi bukutyilanga bantu mu kijimba kininge kya bu bana na bana bwa bine. (Tanga Kolose 3:14.) Boba badi mu bipwilo bya bubela kebadipo na buno bu bana na bana. Mwanda waka tubanena namino? Mwanda beipayanga abo bene na bene mu ñuma ya tubila ne mizo. Ino bene Kidishitu ba bine abo kebaboyangapo bya bulwi bya kwipaya banababo bene Kidishitu, nansha ke muntu ungi mwine. Bible unena’mba: “Bana ba Leza ne bana ba Dyabola bayukenanga pa uno mwanda: Muntu ense kalongalongapo boloke katambilepo kwa Leza, ne yewa kasenswepo mwanabo mwine. . . . Twisanswei batwe bene na bene; ketwakikalai bwa Kaini, wātambile kwa yewa mubi ne kwipaya mwanabo.”—1 Yoano 3:10-12; 4:20, 21.

10 Na bubine, buswe bwa bine ke enkapo kuleka kwipaya bakwenu. Bene Kidishitu ba bine bapānanga pampikwa kakama kitatyi, bukomo, ne lupeto lwabo mwanda wa kwikwasha ne kwikankamika abo bene na bene. (Bahebelu 10:24, 25) Bekwashanga mu bitatyi bya malwa, ne kwikala biyampe na  bakwabo, budimbidimbi mpika. Bine, balondanga mu būmi bwabo madingi a mu Bible a ‘kulongela bantu bonso biyampe.’—Ngalatea 6:10.

11. Mwanda waka i biyampe kwitabija amba Yesu Kidishitu dyo dishinda dya Leza dya lupandilo?

11 Bene Kidishitu ba bine betabije amba Yesu Kidishitu dyo dishinda dya Leza dya lupandilo. Bible unena’mba: “I kutupu lupandilo mu muntu mukwabo nansha umo, mwanda i kutupu dijina nansha dimo munshi mwa diulu dipelwe bantu motufwaninwe kupandila.” (Bilongwa 4:12) Monka motwamwenine mu Shapita wa 5, Yesu wāpēne būmi bwandi bu kinkūlwa kya bantu ba kikōkeji. (Mateo 20:28) Kadi Yesu ye Mulopwe utongelwe na Leza mu Bulopwe bwa mūlu bukaludika ntanda yonsololo. Kadi Leza usaka tukōkele Yesu ne kulonda bufundiji bwandi shi tusaka kumona būmi bwa nyeke. O mwanda Bible unena’mba: “Yewa ulombola lwitabijo mudi Mwana udi na būmi bwa nyeke; yewa kakōkelapo Mwana kakamonepo būmi, ino bukalabale bwa Leza budi nyeke padi.”—Yoano 3:36.

12. Kubulwa kwikala wa ino ntanda kulomba kulonga bika ne bika?

12 Batōtyi ba bine ke ba ino ntandapo. Yesu paādi usamba ku meso a Pilato mbikavu mwine Loma, wānene amba: “Bulopwe bwami ke bwa ino ntandapo.” (Yoano 18:36) Pa kino, balondi ba bine ba Yesu, nansha bekale mu ntanda’ka, i babikalwa ba Bulopwe bwa mūlu, o mwanda kebekujangapo nansha dimo mu myanda ya politike ya ino ntanda. Kebetabilangapo mutamba kampanda mu ñuma ya ntanda. Inoko batōtyi ba Yehova kebakankajangapo bakwabo kulonga byobasaka, shi kutwela mu kitango kya politike, shi kufwila kubikala, nansha ke kuvota kwine. Nansha batōtyi ba bine ba Leza byokebekujapo mu bimyanda bya politike, ino bakōkelanga ku bijila. Mwanda waka? Mwanda Kinenwa kya Leza kibasoñanya “kukōkela bininge ba lupusa batabukile bukatampe” babikele. (Loma 13:1) Ino popa pepatanya bilomba Leza na byobya bilomba ngikadilo ya politike, batōtyi ba bine balondanga kimfwa kya batumibwa bānene amba: “Tufwaninwe kukōkela Leza bu mulopwe kupita’ko bantu.”—Bilongwa 5:29; Mako 12:17.

13. Balondi ba bine ba Yesu bamwene namani Bulopwe bwa Leza, ne pa kino, baloñanga bika?

 13 Balondi ba bine ba Yesu basapulanga amba Bulopwe bwa Leza lo lukulupilo lumo kete ku bantu. Yesu wālaile amba: “Kadi ino myanda miyampe ya Bulopwe ikasapulwa pa ntanda yonso ikelwe na bantu mwanda wa bukamoni ku mizo yonso, ebiya mfulo keiya shayo.” (Mateo 24:14) O mwanda balondi ba bine ba Yesu Kidishitu basapulanga Bulopwe bwa Leza  bwa mūlu amba lo lukulupilo lumo kete ku bantu, pa kyaba kya kukankamika bantu banyemene ku balopwe ba ino ntanda amba bo basa kupwija makambakano abo. (Ñimbo 146:3) Yesu wētufundije kulomba uno umbikalo mubwaninine paānene amba: “Bulopwe bobe bwiye. Kiswa-mutyima kyobe kilongeke, pamo na momwa mūlu, ne pano pa ntanda pene.” (Mateo 6:10) Kadi Kinenwa kya Leza kyālaile amba buno Bulopwe bwa mūlu “bukatyumuna bipindibipindi ne kukubija malopwe ano’a onsololo [adi’ko dyalelo], kadi bukemananga nyeke.”—Danyele 2:44; Kusokwelwa 16:14; 19:19-21.

14. I bāni bomwene’tu amba bo batōta mungya bisakibwa byonso bya butōtyi bwa bine?

14 Kukwatañana na bino byonso byotwabandaula, wiipangule’po bidi amba: ‘I kipwilo’ka kya bantu batōta na kulupula bufundiji bwabo bonso mu Bible ne kuyukanya dijina dya Yehova? I bantu’ka badi na buswe bwa bwine Leza, badi na lwitabijo mudi Yesu, bapela kwikuja mu bya ntanda, ino basapula bulopwe bwa Leza amba lo lukulupilo lumo kete ku bantu? Mu bipwilo byonso bya pano pa ntanda, i kipwilo’ka kibwenye bino bisakibwa?’ Myanda ilombola patōka amba i Batumoni ba Yehova.—Tanga Isaya 43:10-12.

UKALONGA’PO NAMANI?

15. Kutentekela pa kwitabija amba Leza udi’ko, i bika bikwabo byasaka?

15 Kwitabija’tu mudi Leza kekubwenepo pa kusaka kumusangaja. Mwanda Bible unena amba ne bandemona nabo betabije amba Leza udi’ko. (Yakoba 2:19) Ino i kimweke patōka amba kebaloñangapo kiswa-mutyima kya Leza kadi Leza kebetabijepo, mhm. Nanshi pa kwitabijibwa na Leza, ketufwaninwepo enka kwitabija amba udi’ko, ino tufwaninwe ne kulonga kiswa-mutyima kyandi. Kadi tufwaninwe kutyiba kipwano na bipwilo bya bubela ne kwilunga ku kya bine.

16. I bika bya kulonga pa kuleka kwikuja mu mutōtelo wa bubela?

16 Mutumibwa Polo wānene amba ketufwaninwepo kwikuja mu mutōtelo wa bubela. Wāsonekele’mba: “‘Nanshi tambai  umbukata mwabo, ne kwisansanya,’ e mwanenena Yehova, ‘kadi lekai kutenga kintu kya disubi’; ‘kadi nami nkemutambulanga.’” (2 Kodinda 6:17; Isaya 52:11) Nanshi bene Kidishitu bepukanga kintu kyo-kyonso kikwatañene na mutōtelo wa bubela.

17, 18. “Babiloni Mukatampe” i bika, ne mwanda waka i biyampe kupēlakana ‘kutamba’mo’?

17 Bible ulombola amba miswelo yonso mivulevule ya bipwilo bya bubela ibadilwa mu “Babiloni Mukatampe.” * (Kusokwelwa 17:5) Dino dijina dituvuluja kibundi kya Babiloni wa kala, mwāshilwile kipwilo kya bubela kupwa kwa Dilobe dya mu mafuku a Noa. Bufundiji buvule ne bilongwa bitumbile mu bipwilo bya bubela dyalelo byāshilwile kala mu Babiloni. Kimfwa, bene Babiloni bādi batōta busatu bwa baleza, nansha baleza basatu mu umo. Dyalelo nadyo, Busatu Busantu lo lufundijo lwa kyalwilo lwa bipwilo bivule. Ino Bible ufundija patōkelela amba kudi Leza umo kete wa bine, Yehova, ne amba Yesu Kidishitu i wandi Mwana. (Yoano 17:3) Kadi bene Babiloni bādi bakulupile amba muntu udi na muya keufu, ushalanga mūmi shi umbidi ubafu, ne ubwanya kususuka mu kifuko kya masusu. Dyalelo, lukulupilo lwa muya nansha mushipiditu keufu, ususuka mu kalunga-nyembo ka mudilo lufundijibwanga mu bipwilo bivule.

18 Mutōtelo wa Babiloni wa kala wāsambakene ntanda yonso, o mwanda Babiloni Mukatampe wa dyalelo ukokeja na bubine kutelwa bu umbikalo wa ntanda wa bipwilo bya bubela. Kadi Leza wālaile amba uno umbikalo wa bipwilo bya bubela ukafula na mu kukopa kwa diso. (Kusokwelwa 18:8) Le ubamone mwanda waka i kipite buya kwisansanya na kipindi kyo-kyonso kibadilwa mu Babiloni Mukatampe? Yehova Leza usaka abe ‘utambe’mo’ bukidi pakidi mema mu manwi pano.—Tanga Kusokwelwa 18:4, 8.

Shi wingidile Yehova pamo na bantu bandi, nabya ukamona bivule kutabuka byokajimija

19. I bika byokamwena mu kwingidila Yehova?

 19 Posa kutyiba mbila ya kuleka kwikuja mu kipwilo kya bubela, yuka amba bamo bakaleka padi kupwana nobe. Ino shi wingidile Yehova pamo na bantu bandi, nankyo ukamona bivule kutabuka byokajimija. Nobe kukabulwepo kwikala na batutu ne bakaka obe bavule ba ku mushipiditu pamo bwa bana ba bwanga ba Yesu babajinji bāshile bintu byonso ke bamulonda. Ukabadilwa mu kisaka kikata kya ntanda yonso kya bene Kidishitu ba bine midiyo ne midiyo, bantu bakakusanswa bya binebine. Kadi ukekala na lukulupilo lwa kutendelwa lwa būmi bwa nyeke “mu ngikadilo ya bintu ikāya’ko.” (Tanga Mako 10:28-30.) Padi mwenda mafuku, boba bakakwela pa mwanda wa nkulupilo yobe bakakimba kuyuka byobya bifundija Bible ne kwikala batōtyi ba Yehova.

20. I bika bitengele kumeso boba balonda mutōtelo wa bine?

20 Bible ufundija amba Leza usa kufudija ino ngikadilo imbi ya bintu ne kupingakanya’yo na ntanda impya myoloke mu buludiki bwa Bulopwe bwandi. (2 Petelo 3:9, 13) Bine, ikekala ntanda milumbuluke’po kashā! Kadi mu ino ntanda impya myoloke, mukekala’nka kipwilo kimo kete, mutōtelo wa bine. Mwene i kipite buya nobe utabule matabula mafwaninwe mwanda wa kwilunga na batōtyi ba bine tamba’nka pano?

^ mus. 17 Shi usaka kuyukila’ko myanda ilombola buluji bunenenwa amba Babiloni Mukatampe welekeja umbikalo wa ntanda yonso wa bipwilo bya bubela, tala Mbwejo, paje 219-220.