Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Lelo I Bika Bine Bifundija Bible?

 MBWEJO

Lelo Yesu Wābutwilwe mu Kweji wa Dikumi ne Bubidi?

Lelo Yesu Wābutwilwe mu Kweji wa Dikumi ne Bubidi?

BIBLE ketutelēlepo difuku dyābutwilwe Yesu. Inoko, witupa bukamoni buluji bulombola amba Yesu kābutwilwepo mu Kweji wa Dikumi ne Bubidi.

Imvwana bidi ngikadilo ya kūlu moyādi ikadile mu kine kitatyi kya mwaka’kya mu Betelema, mwine mwābutwidilwe Yesu. Kweji wa Bayuda wa Kishileve (ukwatañene na Kweji wa Dikumi ne Umo ne wa Dikumi ne Bubidi) i kweji wa mashika ne mavula. Kupwa kwa uno Kweji, palonda Tebete (kipindi kya Kweji wa Dikumi ne Bubidi ne Umbajinji). Kino kitatyi kya mwaka kūlu kwikalanga kupūte mashika, dimodimo mashika makamankate ekalanga pa ngulu. Bine, tutalei byobya binena Bible pa mwikadilanga lupepo mu yoya ntanda.

Mulembi wa Bible Ezela ulombola amba Kishileve ye Kweji uyukene bu wa mashika ne mavula. Ezela pa kupwa kunena amba bibumbo byāungwidile mu Yelusalema “mu kweji wa kitema [Kishileve], mu difuku dya makumi abidi dya kweji,” ubweja’ko amba bantu bādi “bazakala ne kuzakala . . . pa mwanda wa mvula mukatampe’wa.” Pangala pa mwikadilo wa kūlu  wa mu kine kitatyi kya mwaka’kya, bantu bādi bongwidile pamo bānene abo bene amba: “Kyaba i kya mvula mungimungi, penepo ketukōkejapo kwimana panja.” (Ezela 10:9, 13; Yelemia 36:22) Na bubine bakumbi ba mu ntanda’ya bādi batadija kutyina amba abo bene ne luombe lwabo bakatanwa panja bufuku mu uno Kweji wa Dikumi ne Bubidi!

Ino Bible ulombola amba bakumbi bādi mu madimi bakumba luombe lwabo bufuku bwābutwilwe Yesu’bwa. Bine, Luka mulembi wa Bible ulombola amba kitatyi’kya mu “ntanda’ya mwadi ne bakumbi badi bekele mu ntanda bakesha balama ñombe yabo bufuku” kubwipi na Betelema. (Luka 2:8-12) Ubamone amba na bubine bakumbi bādi bekele panja mu ntanda, kebādipo bananga’tu panja mwinya nkelenkele, mhm. Ino bādi na luombe lwabo mu ntanda bufuku. Le buno bushintuludi bwa kwikala panja bukokeja kukwatañana na mwikadilo wa kūlu kwa mashika ne mavula wa mu Betelema mu Kweji wa Dikumi ne Bubidi? Nansha dimo. Ko kunena’mba myanda yālongekele kitatyi kyābutwilwe Yesu ilombola amba kābutwilwepo mu Kweji wa Dikumi ne Bubidi. *

Kinenwa kya Leza kitulombola biyampe difuku dyāfwile Yesu, ino kekinenepo myanda itala pa difuku dyaābutwilwe. Kino kituvuluja binenwa bya Mulopwe Solomone bya amba: “Dijina diyampe ditabukile kunengela māni malēme a mwenye; kabidi difuku dya lufu i dipite būya ku difuku dya kubutulwa.” (Musapudi 7:1) Nanshi ke kya kutulumukapo shi Bible utela myanda palapala itala mwingilo ne lufu lwa Yesu ino wisambila bityetye’tu pa kitatyi kyandi kya kubutulwa.

Kitatyi kyābutwilwe Yesu, bakumbi ne luombe lwabo bādi mu ntanda bufuku

^ mus. 1 Shi usakila’ko bikwabo, tala dibuku Comment raisonner à partir des Écritures paje 162-165, dilupwilwe na Batumoni ba Yehova.