Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MBWEJO

Difuku dya Kidye—I Difuku’ka?

Difuku dya Kidye—I Difuku’ka?

ABE umonanga namani Difuku dya Kidye? Bavule balañanga amba myuya yonsololo iketwa umoumo kwimuka ku meso a lupona lwa Leza. Kwine’kwa bakatyibila muntu umo ne umo butyibi. Bamo bakapalwa mpalo ya kutwela mūlu mu nsangaji, ino bakwabo nabo bakaponejibwa ne kwelwa mu masusu a nyeke. Inoko Bible ulombola muswelo mwishile wa mukapityila kine kyaba’kya. Kinenwa kya Leza kishintulula amba ke kitatyipo kilenga nzuba, ino i kitatyi kya lukulupilo ne kwalujibwa kwa bintu.

Tutanga mu Kusokwelwa 20:11, 12 bushintuludi bwa mutumibwa Yoano bwa Difuku dya Kidye amba: “Namwene lupona lukatampe lutōka tō ne muntu ushikete’po. Ntanda ne diulu byanyema lubilo ku meso andi, ne kobyaya jimejime. Kadi namwene bafwe, bakatampe ne batyetye, bemene kumeso kwa lupona, ebiya mivungo ya mikanda yavungululwa. Ino muvungo mukwabo wavungululwa; i muvungo wa mukanda wa būmi. Penepo bafwe’ba batyibilwa mambo mungya byobya bilembelwe mu mivungo ya mikanda mwendele bilongwa byabo.” Le Mutyibi unenenwa’po pano i ani?

Yehova Leza ye Mutyibi Mukatakata wa bantu. Inoko upele muntu mukwabo uno mwingilo wa kutyiba mambo. Kukwatañana  na Bilongwa 17:31, mutumibwa Polo wānene amba Leza “i mutūle’ko difuku dyalanga kutyibila ntanda ikelwe na bantu mambo mu boloke na muntu watongele.” Uno Mutyibi utongelwe i Yesu Kidishitu musanguke. (Yoano 5:22) Penepa i kitatyi’ka kikashilula Difuku dya Kidye? Lelo dikalāla myaka inga?

Mukanda wa Kusokwelwa ulombola amba Difuku dya Kidye dikashilula kinondanonda na divita dya Amakedona, pakapwa konakanibwa ngikadilo ya Satana. * (Kusokwelwa 16:14, 16; 19:19–20:3) Kupwa kwa Amakedona, Satana ne bandemona bandi bakakutwa mu lupongo myaka kanunu. Mu kine kitatyi’kya, balopwe bampyana 144 000 bakatyiba mambo ne kubikala “kubikala bulopwe na Kidishitu myaka 1 000” momwa mūlu. (Kusokwelwa 14:1-3; 20:1-4; Loma 8:17) Difuku dya Kidye ke mwandapo ukapita lubilo mu difuku dya nsá 24 kete, mhm. Dikalāla myaka kanunu.

Mu kine kyaba kya myaka kanunu’kya, Yesu Kidishitu ye ukekala “mutyibi wa bōmi ne bafwe.” (2 Temote 4:1) “Bōmi” i “kibumbo kikatampe” kikapanda pa Amakedona. (Kusokwelwa 7:9-17) Ino mutumibwa Yoano wāmwene ne “bafu, . . . bemene kumeso kwa lupona” lwa kidye. Monka mwālaile Yesu, “bonso badi mu bibundu bakevwana diwi dyandi [Kidishitu] ne kutamba bakatamba’mo,” pobakasanguka. (Yoano 5:28, 29; Bilongwa 24:15) Ino le bonso bakatyibilwa mambo pa myanda’ka?

Mungya kimonwa kya mutumibwa Yoano, amba “mivungo ya mikanda yavungululwa,” “penepo bafwe’ba batyibilwa mambo mungya byobya bilembelwe mu mivungo ya mikanda mwendele bilongwa byabo.” (Kusokwelwa 20:12) Le ino i mikanda musonekelwe bilongwa bya pa kala bya bantu? Nansha dimo, butyibi kebukemaninapo pa byobya byālongele bantu kumeso kwa kufwa. Mwanda waka tunena namino? Mwanda Bible unena’mba: “Mwanda yewa wafwa watalulwa mambo a bubi bwandi.” (Loma 6:7) Boba bakasanguka badi bwa abo bakajokela ku būmi na diseletyi dyampikwa kulemba’po, pampikwa mambo. O mwanda mikanda’ya yelekeja bisakibwa bikwabo bisaka Leza. Pa kusaka amba boba bakapanda pa Amakedona ne boba bakasanguka bekale nyeke bōmi, bibalomba kukōkela ku mbila ya Leza,  kubadila’mo ne bisakibwa bikasaka Yehova bikasokolwa mu bula bwa myaka kanunu. Nanshi, bantu bakatyibilwa mambo mungya byobya byobakalonga mu bula bwa Difuku dya Kidye.

Mu Difuku dya Kidye, bantu bavule bene bakapebwa mukenga wabo umbajinji wa kuyuka kiswa-mutyima kya Leza ne kulonda’kyo mu būmi bwabo. Ko kunena’mba kukekala mwingilo mukatampe wa kufundija. Bine, ‘bekadi ba pano pa ntanda bakalombolwa boloke.’ (Isaya 26:9) Inoko ke bonsopo bakasaka kulonda kiswa-mutyima kya Leza. Isaya 26:10 unena’mba: “Shi kiyampe kilaijibwa kudi mubi, ino kakalombolwapo boloke; mu ntanda ya buluji ukalonga bibi, ne kukabandilapo bulopwe bwa Yehova mpika.” Bano babi bakepaibwa lonsololo mu Difuku dya Kidye.—Isaya 65:20.

Ku mfulo kwa Difuku dya Kidye, bantu bapandile ‘bakekala bōmi,’ ko kunena’mba bantu babwaninine shē. (Kusokwelwa 20:5) Nanshi mu Difuku dya Kidye mo mukalujibwa bantu ku mwikadilo obādi nao dibajinjibajinji. (1 Kodinda 15:24-28) Kupwa kukekala ditompo dya mfulo. Satana ukakutululwa mu kifungo mwanda wa atompe kongola bantu dya mfulo. (Kusokwelwa 20:3, 7-10) Boba bakamukomena bo bakemwena kufikidila kutuntulu kwa uno mulao wa mu Bible unena’mba: “Boloke bakapyananga ntanda, ne kwikala monka nyeke.” (Ñimbo 37:29) Bine, Difuku dya Kidye dikekala dya dyese ku bantu bonso ba kikōkeji!

^ mus. 1 Pa mwanda utala Amakedona, tala dibuku Étude perspicace des Écritures, volime 1, paje 1073-1074 ne volime 2, paje 63-64, kadi ne dibuku Tōta Leza Umo Kete wa Bine, shapita 20, onso alupwilwe na Batumoni ba Yehova.