Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Dibuku Dyami dya Mānga ya mu Bible

Mānga ya 113: Polo mu Loma

Mānga ya 113: Polo mu Loma

TALA muyololo obakutyile Polo ne sola Mwine Loma umulamine. Polo i mukutwe mu Loma. Ukungile poso’nka Kesala wa Loma anene bya kumulonga. Bantu i bapebwe kishima kya kumupempula mu kifungo.

Mafuku asatu kupwa kufika mu Loma, Polo watume misapu ku bakulumpe ba Bayuda amba bāye bamutale. Penepo Bayuda bavule badi mu Loma abaiya. Polo webasapwila myanda ya Yesu ne bulopwe bwa Leza. Bamo abaitabija ke Bene Kidishitu, ino bakwabo kebetabijepo.

Polo mu kifungo

Penepo Polo wasapwila ne basola badi bamulama bene. Mu myaka ibidi yadi mu kifungo, Polo wasapwila muntu ye-yense wamona. Ne kisaka kya Kesala kine kibaivwana myanda miyampe ya Bulopwe, ne bamo abaikala Bene Kidishitu.

Ino uno mupempudi ulemba ku meza’u i ani? Molangila i ani? Eyo, i Temote. Temote nandi wadi mu kifungo mwanda wasapwile myanda ya Bulopwe, ino pano i mukutululwe. Waiya kukwasha Polo kuno. Uyukile bilemba Temote? Tutalei.

Lelo uvulukile kibundi kya Fidipai ne Efisesa kidi mu Mānga ya 110? Polo wāshimikile’mo bipwilo bya Bwine Kidishitu. O mwanda pano padi mu kifungo, Polo watumina bano Bene Kidishitu mikanda. Ino mikanda idi mu Bible, itwanga bu Bene Efisesa ne Bene Fidipai. Pano Polo ulombolanga Temote myanda ya kulembela Bene Kidishitu balunda nandi ba mu Fidipai.

Bene Fidipai balongēle Polo biyampe. Bamutumine byabuntu ku kifungo, o mwanda pano Polo wibafwija’ko. Waile na byabuntu i Epafolodetusa. Inoko wabelele bininge wasa kufwa. Pano wakoma, kasa ne kujoka. Usa kusela ino mikanda ya Polo kadi basa kujokela ku Fidipai pamo na Temote.

Papo aye mu kifungo, Polo walembe mikanda mikwabo ibidi idi mu Bible. Umo i wa Bene Kidishitu ba mu Kolose. Uyukile mowityilwa? I Bene Kolose. Mukwabo i wa Filemone, mulunda nandi mukatampe wa mu Kolose. Uno mukanda wisambilanga padi Onesemusa mwingidi wa Filemone.

Onesemusa wanyemene Filemone waenda ku Loma. Penepo Onesemusa wayukile’mba Polo udi mu kifungo. Ebiya waiya kumupempula, kupwa Polo wasapwila Onesemusa. Ponka’po Onesemusa waikala Mwine Kidishitu. Pano Onesemusa wealakanya mwanda wa kunyema kwaanyemene. Lelo uyukile bilemba Polo mu mukanda watumina Filemone?

Polo walombe Filemone afwile Onesemusa lusa. Polo walembe amba: ‘Nakwalwija’ye kodi. Pano kadipo enka mwingidi obe kete. Ino kadi, i mwanenu Mwine Kidishitu muyampe.’ Onesemusa pa kujokela ku Kolose, wasela ino mikanda ibidi, umo wa Bene Kolose, mukwabo wa Filemone. Fwatakanya’po bidi nsangaji ya Filemone pa kuyuka’mba mwingidi wandi waikala Mwine Kidishitu.

Polo udi na myanda miyampe imoimo ya kutumina Bene Fidipai ne Filemone mu mikanda. Polo walombola Bene Fidipai’mba: ‘Nemutumina Temote. Ino nsa kwiya kwimupempula panopano.’ Kupwa walembela Filemone’mba: ‘Nongolwele pa kushikata kwako.’

Ebiya Polo pa kukutululwa, wakapempula banababo mu bifuko bivule. Kupwa Polo wakutwe monka mu Loma. Pano wayuka’mba wakepaibwa. Penepo watumina Temote mukanda ne kumunena āye bukidi. Polo walembe amba: ‘Nadi nkōkele Leza, Leza nandi ukampala mpalo.’ Kupwa lufu lwa Polo, pabapite myaka mityetye Yelusalema waonakanibwa dikwabo, pano ke na Bene Loma.

Ino mu Bible mudi bintu bivule. Kupwa Yehova Leza walembeja Yoano mikanda yandi, kubadila’mo ne mukanda wa Kusokwelwa. Uno mukanda wa mu Bible wisambilanga pa mafuku a kumeso. Tutalei pano bikamweka mu mafuku a kumeso.

Bilongwa 28:16-31; Fidipai 1:13; 2:19-30; 4:18-23; Bahebelu 13:23; Filemone 1-25; Kolose 4:7-9; 2 Tem.te 4:7-9.



Bipangujo

  • Polo wasapwila bāni pano pakutyilwe mu Loma?
  • Mupempudi udi ku meza pa kifwatulo i ani, ne ulongelanga Polo bika?
  • Epafolodetusa i ani, ne wasela bika pa kujokela ku Fidipai?
  • Mwanda waka Polo watumina Filemone mulunda nandi mukanda?
  • Polo pa kukutululwa walonga bika, ne i bika byobamulonga dikwabo?
  • Yehova walembeja mikanda ya mfulo ya mu Bible na ani, ne mukanda wa Kusokwelwa witulombola bika?

Bipangujo bikwabo

  • Tanga Bilongwa 28:16-31 ne Fidipai 1:13.

    Polo wādi ulonga bika kitatyi kyaākutyilwe mu Loma, ne lwitabijo lwandi lukomo lwāikele na lupusa’ka pa kipwilo kya Bwine Kidishitu? (Bil. 28:23, 30; Fid. 1:14)

  • Tanga Fidipai 2:19-30.

    I binenwa’ka bya kutendela ba Temote ne Epafolodetusa byānene Polo, ne tukokeja namani kwiula kimfwa kya Polo? (Fid. 2:20, 22, 25, 29, 30; 1 Kod. 16:18; 1 Tes. 5:12, 13)

  • Tanga Filemone 1-25.

    Polo wāsoñenye Filemone amba alonge biyampe pa mwanda’ka, ne kino kibwanya kuludika namani bakulumpe dyalelo? (Fil. 9; 2 Kod. 8:8; Ngat. 5:13)

    Binenwa bya Polo bidi mu Filemone 13, 14 bilombola namani amba wādi ulēmekele mityima ya mundamunda ya bakwabo mu kipwilo? (1 Kod. 8:7, 13; 10:31-33)

  • Tanga 2 Tem.te 4:7-9.

    Pamo bwa Polo, netu tubwanya kukulupila namani amba Yehova uketupala mpalo shi tūminine kufika ne ku mfulo? (Mat. 24:13; Bah. 6:10)