Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Dibuku Dyami dya Mānga ya mu Bible

Mānga ya 110: Temote—Mukwashi Umpya wa Polo

Mānga ya 110: Temote—Mukwashi Umpya wa Polo

NKASAMPE mwana-mulume udi na mutumibwa Polo’u i Temote. Kisaka kya Temote kikalanga mu Lesetala. Inandi i Yunisa ne nkambo wandi mwana-mukaji i Loisa.

Dino ye dya busatu Polo kupempula mu Lesetala. Polo ne Banabasa baile kusapula’mo pano kepadi kubwipi kwa mwaka nansha ne kupita. Ne pano Polo i mwiye na mulunda nandi Shilasa.

Temote ne Polo

Uyukile binena Polo kudi Temote? Unenanga’mba: ‘Lelo usakile kwenda na Shilasa ne ami? Tusakanga witukwashe na kusapwila bantu ba kulampe.’

Temote walondolola’mba: ‘Eyo, nsa kwenda.’ Ponka’po Temote washiye kisaka kyandi kaenda na Polo ne Shilasa. Poketwafundile bidi myanda ya lwendo lwabo, tutalei byafikila Polo. Kepadi kubwipi kwa myaka 17 tamba Yesu umumwekela mu dishinda dya ku Damakasa.

Vuluka, Polo wāile ku Damakasa mwanda wa kususula bana ba bwanga ba Yesu, ino pano nandi ke mwanā bwanga! Mwenda mafuku, balwana bamo abakute kitumba kya kwipaya Polo, mwanda kebasenswepo myanda ya Yesu yafundija. Ino bana ba bwanga abanyemeja Polo. Abamwela mu kisaku ne kumutūkidija panja pa nsakwa.

Kupwa Polo waenda kukasapula ku Antyioka. Kuno ye kwaitwa dibajinji balondi ba Yesu bu Bene Kidishitu. Penepo Polo ne Banabasa abatumwe tamba mu Antyioka kwenda kukasapula ku matanda a kulampe. Kibundi kimo kyobapempula i Lesetala, kibundi kya ba Temote.

Pabapite kubwipi kwa mwaka umo, Polo waiya lwendo lwa bubidi mu Lesetala. Temote pa kutaluka na Polo ne Shilasa, uyukile kobaenda? Tala pa kalata, wifunde’po bifuko bimobimo.

Dibajinji, abaenda ku Ikoniuma, kupwa ke ku kibundi kya bubidi kitwa bu Antyioka. Ke ku Toasa, ne ku Fidipai, Tesalonika ne Belea. Ubamone Atene pa kalata? Polo wasapwile’mo. Kupwa abalāla mwaka ne kipindi basapula mu Kodinda. Ku mfulo abaije bityetye mu Efisesa. Kupwa abajokela lwa bwato ku Kesalea, ke ku Antyioka, penepo Polo washala kwine’kwa.

Nanshi Temote waenda makilometele mavulevule ukwasha’ko Polo mu kusapula “myanda miyampe” ne kushimika bipwilo bivule bya Bwine Kidishitu. Shi nobe ubatama, lelo ukekala mwingidi wa kikōkeji wa Leza pamo bwa Temote?

Bilongwa 9:19-30; 11:19-26; shapita 13 ku 17; 18:1-22.

Kalata

1. Loma; 2. Medita; 3. Belea; 4. Tesalonika; 5. Kodinda; 6. Fidipai; 7. Atene; 8. Kelete; 9. Toasa; 10. Efisesa; 11. Miletusa; 12. Kolose; 13. Antyioka; 14. Ikoniuma; 15. Lesetala; 16. Saipusa; 17. Antyioka; 18. Kesalea; 19. Yopa; 20. Damakasa; 21. Yelusalema; 22. Kalunga ka mema kakatampe (Meditelanea)



Bipangujo

  • Nkasampe mwana-mulume udi pa kifwatulo i ani, ne ushikatanga kwepi, ne ba inandi ne nkambo wandi mwana-mukaji i bāni?
  • Temote walondolola namani pamunena Polo amba elunge nandi pamo ne Shilasa mu kusapwila bantu ba kulampe?
  • I kwepi kwaitwa balondi ba Yesu dibajinji bu Bene Kidishitu?
  • Ba Polo, Shilasa, ne Temote abakapempula bibundi’ka bikwabo pa kupwa’tu kutamba mu
  • Temote wakwasha Polo namani, ne i kipangujo’ka kifwaninwe kwiipangula dyalelo bankasampe?

Bipangujo bikwabo

  • Tanga Bilongwa 9:19-30.

    Mutumibwa Polo wāingidije manwa namani kitatyi kyaātenwe na kulondwalodwa pangala pa myanda miyampe? (Bil. 9:22-25, 29, 30; Mat. 10:16)

  • Tanga Bilongwa 11:19-26.

    Nsekununi idi mu Bilongwa 11:19-21, 26 ilombola namani amba mushipiditu wa Yehova uludikanga mwingilo wa busapudi?

  • Tanga Bilongwa 13:13-16, 42-52.

    I muswelo’ka ulombola Bilongwa 13:51, 52 amba bana ba bwanga kebāzozelepo pa mwanda wa kupangwapangwa? (Mat. 10:14; Bil. 18:6; 1 Pet. 4:14)

  • Tanga Bilongwa 14:1-6, 19-28.

    Muneneno “bakebafikijija kudi Mfumwetu” witukwasha namani tutalule kuzumbijazumbija mutyima kwa bitupu kitatyi kyotukwasha bapya? (Bil. 14:21-23; 20:32; Yoa. 6:44)

  • Tanga Bilongwa 16:1-5.

    Mutyima wa kwitabija kutwela kwisao wādi na Temote ulombola namani mvubu ya kulongela “bintu byonso pa mwanda wa myanda-miyampe”? (Bil. 16:3; 1 Kod. 9:23; 1 Tes. 2:8)

  • Tanga Bilongwa 18:1-11, 18-22.

    Bilongwa 18:9, 10 ulombola namani amba Yesu aye mwine ye uludika mwingilo wa busapudi, ne kino kitukulupija namani dyalelo? (Mat. 28:20)