Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Dibuku Dyami dya Mānga ya mu Bible

Mānga ya 99: Mu Njibo ya Pangala

Mānga ya 99: Mu Njibo ya Pangala

PANO ke mu Dya Buná bufuku, kupwa kwa mafuku abidi. Yesu ne batumibwa bandi 12 abaiya kudya bidibwa bya Pashika ku ino njibo ya pangala. Muntu omumwene utamba’wa i Yudasa Isakadiota. Wakalombola babitobo mwa kukwatyila Yesu.

Bidibwa bya ku kyolwa bya Mfumwetu

Kesha dyapityile, Yudasa waendele kobadi kaebepangula’mba: ‘Mukampa bika shi nemukwasha’ko kukwata Yesu?’ Abanena’mba: ‘Ndalama makumi asatu.’ Pano Yudasa wakebete mwanda wa kwiya kwibalombola kudi Yesu. Mwene kino i kibi mpata?

Pano bidibwa bya Pashika bibapu. Ino Yesu washilula bidibwa bikwabo bishile na byonso. Wape batumibwa bandi mukate kanena’mba: ‘Dyai’o, uno welekeja umbidi wami wimupāninwa.’ Kupwa webape kitomeno kya vinyu kanena’mba: ‘Tomai’kyo, ano elekeja mashi ami emumwangilwa.’ Bible wibitelanga bu ‘bidibwa bya ku kyolwa bya Mfumwetu,’ nansha bu ‘bidibwa bya Mfumwetu.’

Bene Isalela bādi badya Pashika mwanda wa kuvuluka kitatyi ‘kyapityile mwikeulu wa Leza pangala’ pa mobo abo mu Edipito, wāipaya bana babajinji mu mobo a Bene Edipito. Ino pano Yesu usakanga balondi bandi bamuvuluke aye ne muswelo webepānina būmi bwandi. O mwanda webanena kuvuluka bino bidibwa mwaka ne mwaka.

Kupwa kudya Bidibwa bya ku Kyolwa bya Mfumwetu, Yesu wanena batumibwa bandi bekale bankanka ne bakomo mu lwitabijo. Ku mfulo, abaimbila Leza ñimbo ne kutamba. Pano ke bwile bininge, ke kunyuma kwa midi ya bufuku. Tutalei kobenda.

Mateo 26:14-30; Luka 22:1-39; Yoano shapita 13 ku 17; 1 Kod.nda 11:20.



Bipangujo

  • Monka mulombwela’kyo kifwatulo, mwanda waka Yesu ne batumibwa bandi 12 badi mu njibo ya pangala?
  • Muntu utamba uno i ani, ne ukaloñanga bika?
  • I bidibwa’ka bya pa bula byashilula Yesu pa kupwa bidibwa bya Pashika?
  • Pashika yādi ivuluja Bene Isalela bika, ino bino bidibwa bya pa bula bivuluja balondi ba Yesu bika?
  • Bidibwa bya Kyolwa bya Mfumwetu pa kupwa, Yesu wanena balondi bandi bika, kupwa abalonga bika?

Bipangujo bikwabo

  • Tanga Mateo 26:14-30.

    Lelo Mateo 26:15 ulombola namani amba Yudasa wāabile Yesu ku kusaka?

    I mpango’ka ibidi ifikijibwe na mashi āmwangile Yesu? (Mat. 26:27, 28; Yel. 31:31-33; Ef. 1:7; Bah. 9:19, 20)

  • Tanga Luka 22:1-39.

    Satana wātwelele mudi Yudasa namani? (Luka 22:3; Yoa. 13:2; Bil. 1:24, 25)

  • Tanga Yoano 13:1-20.

    Na nsekununi idi mu Yoano 13:2, le tukokeja kulambika Yudasa byaālongele, ne i ñeni’ka iboila’ko bengidi ba Leza? (Ngal. 4:7; 2 Kod. 2:11; Ngat. 6:1; Yak. 1:13, 14)

    I mwanda’ka mukatampe uboilwa’ko ñeni wālongele Yesu? (Yoa. 13:15; Mat. 23:11; 1 Pet. 2:21)

  • Tanga Yoano 17:1-26.

    Yesu wālombele amba balondi bandi bekale “bamo bonka” mu buluji’ka? (Yoa. 17:11, 21-23; Loma 13:8; 14:19; Kol. 3:14)