Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Dibuku Dyami dya Mānga ya mu Bible

Mānga ya 95: Muswelo Ufundija Yesu

Mānga ya 95: Muswelo Ufundija Yesu

DIFUKU dimo Yesu walombola muntu umo amba ufwaninwe kuswa mukwabo. Uno muntu waipangula Yesu amba: ‘Le mukwetu i ani?’ Bine, Yesu uyukile bilanga uno muntu. Uno muntu ulanga’mba, enka bantu ba ku musaka wabo ne kipwilo kyabo bo bakwabo. Tutalei byamunena Yesu.

Kitatyi kimo, Yesu wadi ufundija na mānga. Ye mwalongela pano. Wasekununa mānga ya Muyuda ne Mwine Samadia. Ketudi bafunde’mba Bayuda bavule kebasenswepo Bene Samadia. Ivwana mānga ya Yesu:

Difuku dimo Muyuda wādi wenda ku Yediko mu dishinda dya ngulu. Ino bangivi bāmukwata. Bāmwiba lupeto lwandi ne kumukupila kubwipi bamwipaye.

Kupwa, kitobo umo Muyuda wāiya mwishinda. Wāmona muntu mukupilwe’wa. Molangila, wālongele kika? Wāsasukila kufula kwa dishinda kaenda. Kupwa kwāiya muntu mukwabo, mwine Leza wa bine. Wādi Mwine Levi. Lelo wāimene? Mhm, nandi kāimenepo kukwasha muntu mukupilwe’wa. Tala kitobo ne Mwine Levi boba benda mu dishinda.

Ino tala udi na muntu mukupilwe’u. I Mwine Samadia. Wakwasha Muyuda. Wamwela lawa pa bilonda. Kupwa wakatūla uno Muyuda kwa kwitūkijija ne kundapibwa.

Mwine Samadia muyampe

Aye upwa ino mānga, Yesu wanena muntu wamwipangulanga’wa amba: ‘Pa bano basatu, mulunda wa binebine wa uno muntu obākupile, lelo i ani? Lelo i kitobo’ni, i Mwine Levi’ni, nansha i Mwine Samadia?’

Muntu’wa walondolola’mba: ‘I Mwine Samadia. Aye wālongēle uno muntu biyampe.’

Yesu wanena’mba: ‘Ubanena biyampe. Nanshi kalonge muswelo umo onka ku bakwabo.’

Le kusenswepo muswelo wādi ufundija Yesu? Tukokeja kwifunda bintu bivulevule bya kamweno shi tuteja binena Yesu mu Bible, mwene i amo?

Luka 10:25-37.



Bipangujo

  • Muntu umo waipangula Yesu kipangujo’ka ne mwanda waka?
  • Yesu ufundijanga kitatyi kimo na bika, ne i bika byoketudi kala bafunde pa Bayuda ne Bene Samadia?
  • Mu mānga yanena Yesu, i bika byatana Muyuda wadi wenda mu dishinda dya ku Yediko?
  • I bika byalonga kitobo umo Muyuda ne Mwine Levi pa kupityila mu dishinda’dya?
  • I ani ukwasha Muyuda mukupilwe pa kifwatulo’pa?
  • Yesu wavuya namani mānga, i kipangujo’ka kyaipangula, ne mwana-mulume’wa walondolola namani?

Bipangujo bikwabo

  • Tanga Luka 10:25-37.

    Yesu wākweshe namani mwana-mulume mwipāne mu bijila alanguluke pa kyaba kya kumulondolola’tu ponka na ponka? (Luka 10:26; Mat. 16:13-16)

    Yesu wāingidije namani byelekejo mwanda wa kufundula mfwatakani mu bemvwaniki bandi? (Luka 10:36, 37; 18:9-14; Tet. 1:9)