Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Dibuku Dyami dya Mānga ya mu Bible

Mānga ya 90: Na Mwana-Mukaji ku Mushimwa

Mānga ya 90: Na Mwana-Mukaji ku Mushimwa

YESU washikata kwitūkija dya ku mushimwa wa mu Samadia. Bandi bana ba bwanga abaenda kukapota bidibwa mu kibundi. Mwana-mukaji wisamba na Yesu uno, i mwiye kuteka mema. Yesu wamunena’mba: ‘Mpeko mema ntome.’

Yesu wisamba na Mwana-Mukaji Mwine Samadia

Kino kibatulumuja uno mwana-mukaji bininge. Uyukile i mwanda waka? Mwanda Yesu i Muyuda, ino aye i Mwine Samadia. Bayuda bavule kebasenswepo Bene Samadia. Kebesambengapo ne nabo bene! Ino Yesu usenswe bantu bonso. Penepo wanena’mba: ‘Shi wadi uyukile ukulomba mema a kutoma, longa ubamulombe wakupe mema a būmi.’

Mwana-mukaji wanena’mba: ‘A Mukelenge, mushimwa i mulampe, kadi kudipo na kalobelo. Le kokamona mema a būmi i kwepi?’

Yesu wanena’mba: ‘Shi utome mema a mu uno mushimwa ukekala na kyumwa monka. Ino mema onkakupa akokeja kwikadija’ko muntu nyeke.’

Mwana-mukaji wanena’mba: ‘A Mukelenge, mpe ao mema’o! Nankyo nkikevwanapo kyumwa monka. Kadi nkikāyapo kuteka mema kuno dikwabo.’

Mwana-mukaji walanga’mba mema anena Yesu i a bine. Ino Yesu unenenanga pa bubinebine butala padi Leza ne bulopwe bwandi. Buno bubinebine budi’nka bwa mema a būmi. Bukokeja kupa muntu būmi bwa nyeke.

Kupwa Yesu wanena mwana-mukaji’mba: ‘Enda ukete obe mulume mwiyei.’

Nandi walondolola’mba: ‘Nkidipo na mulume.’

Yesu wanena’mba: ‘Ubalondolola biyampe. Inoko wadi na balume batano, kadi mwana-mulume odi nandi pano ke obe mulumepo.’

Mwana-mukaji watulumuka, mwanda byonso’bi i bya bine. Lelo Yesu wayuka bino bintu namani? Eyo, mwanda Yesu i muntu wa kutumwa na Leza Wālailwe’wa, kadi Leza umusapwilanga ino myanda. Pano bana ba bwanga ba Yesu abajoka, nabo abatulumuka mwanda wesambe na mwana-mukaji Mwine Samadia.

I kika kyotwefunda mu bino byonso? Kino kilombola’mba Yesu i muyampe ku bantu ba misaka yonso. Twikalei netu’nka bwa aye. Ketwakilangai’mba bantu bamo i babi mwandapo i ba ku musaka kampanda. Yesu usakanga bantu bonso bayuke bubinebine butwala ku būmi bwa nyeke. Netu tukwashei bakwabo befunde bubinebine.

Yoano 4:5-43; 17:3.



Bipangujo

  • Mwanda waka Yesu washikata pa mushimwa wa mu Samadia, ne wanena uno mwana-mukaji bika?
  • I kika kyatulumuja mwana-mukaji bininge, ne Yesu wamunena bika, ne mwanda waka?
  • Mwana-mukaji walanga amba Yesu wisambilanga pa mema a muswelo’ka, ino na bubine ao i mema’ka?
  • Mwanda waka mwana-mukaji watulumuka pa kumona myanda imutala iyukile Yesu, ne weiyukile namani?
  • I ñeni’ka yotuboila ku nsekununi ya mwana-mukaji wadi pa mushimwa?

Bipangujo bikwabo

  • Tanga Yoano 4:5-43.

    Mungya kimfwa kya Yesu, i muswelo’ka otufwaninwe kumona bantu ba lukoba ne misaka mishile na yetu? (Yoa. 4:9; 1 Kod. 9:22; 1 Tem. 2:3, 4; Tet. 2:11)

    I kamweno’ka ka ku mushipiditu kamona muntu wikala mwanā bwanga wa Yesu? (Yoa. 4:14; Is. 58:11; 2 Kod. 4:16)

    Tukalombola namani amba tudi na mutyima wa kufwija’ko pamo bwa mwana-mukaji Mwine Samadia wāsapwile byaāfundile? (Yoa. 4:7, 28; Mat. 6:33; Luka 10:40-42)