Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Dibuku Dyami dya Mānga ya mu Bible

Mānga ya 89: Yesu Utōkeja Tempelo

Mānga ya 89: Yesu Utōkeja Tempelo

BINE pano Yesu udi’tu bwa mulobe, mwene i amo? Lelo uyukile kyalobele? Mwanda bano bantu badi mu tempelo ya Leza ya mu Yelusalema badi na lwiso. Basakanga kumwena lupeto mu bantu bāya kutōta Leza.

Yesu ukuvumwina mameza a lupeto panshi

Ubamone bañombe bana ne mikōko ne bankunda bonso’ba? Bine, bantu bapotejanga bano banyema mu tempelo. Uyukile mwanda waka? Mwanda Bene Isalela bakimbanga banyema ne byoni bya kulambula kudi Leza.

Bijila bya Leza byānene amba, shi Mwine Isalela waluba, ufwaninwe kuleta mulambu kudi Leza. Kwādi ne bitatyi bikwabo byādi bileta Bene Isalela milambu. Ino mwine Isalela wādi wa kumona kwepi banyema ba kulambula kudi Leza?

Bene Isalela bamo bādi bamunine byoni ne banyema. Bādi bakokeja kwibalambula. Ino Bene Isalela bavule kebādipo bamunine banyema ne byoni. Bakwabo bādi kulampe na Yelusalema, kebādipo bakokeja kuselela banyema babo ku tempelo. Penepo bantu bādi bāya kupotela banyema ne byoni konka. Ino bano bantu bādi na lupoto lukomo. Bādi beba bantu. Kadi kebādipo bafwaninwe kupoteleja mu tempelo ya Leza.

Bino ye byalobeja Yesu. Penepo wafulamika mameza a bantu ba lupeto ne kumwanga lupeto lwabo. Kadi wajinge kibaka kya myonji ne kutambija banyema bonso mu tempelo. Wanena bantu bapoteja bankunda’mba: ‘Mwibatambijei muno! Kemwakitūlai njibo ya Tata ke nsoko ya kumwena’mo lupeto.’

Balondi bamo ba Yesu badi nandi ku tempelo mu Yelusalema. Abatulumuka pa kumona bilonga Yesu. Kupwa abavuluka pobalembele myanda itala Mwanā Leza mu Bible amba: ‘Buswe bwa njibo ya Leza bukatēma mwadi’nka bwa mudilo.’

Yesu walonga bingelengele bivule padi muno mu Yelusalema ku kupwila kwa Pashika. Kupwa Yesu wataluka mu Yudea kajokela ku Ngadilea. Pa kwenda, wakapityila mu bulolo bwa Samadia. Tutalei byalongeka’ko.

Yoano 2:13-25; 4:3, 4.



Bipangujo

  • Mwanda waka bantu bapoteja banyema mu tempelo?
  • I bika byalobeja Yesu?
  • Monka momwena pa kifwatulo, Yesu walonga bika, ne wanena bantu bapoteja bankunda balonge bika?
  • Balondi ba Yesu pobamumona ulonga bino, abavuluka bika?
  • Yesu wapityila mu bulolo’ka pa kujokela ku Ngadilea?

Kipangujo kikwabo

  • Tanga Yoano 2:13-25.

    Yesu byaāfityīlwe boba bādi bashintulula lupeto mu tempelo, i muswelo’ka otufwaninwe kumona bya busunga ku Njibo ya Bulopwe? (Yoa. 2:15, 16; 1 Kod. 10:24, 31-33)