Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Dibuku Dyami dya Mānga ya mu Bible

Mānga ya 88: Yoano Ubatyija Yesu

Mānga ya 88: Yoano Ubatyija Yesu

TALA nkunda ukatumba pa mutwe wa uno muntu. Uno muntu i Yesu. Kadi na myaka kubwipi kwa 30. Muntu wadi nandi uno i Yoano. Ketudi kala befunde myanda imutala. Ukivulukile kana kājinine munda mwa Edisabeta pāendele Madia kukamupempula? Kana’ka ye Yoano’u. Ino pano ba Yoano ne Yesu baloñanga bika?

Kubatyijibwa kwa Yesu

Yoano kemutokenye Yesu mu Munonga wa Yodano. Uno o muswelo obabatyijanga bantu. Dibajinji, bamutokenyanga mu mema, kupwa ke kumuvubula’mo. Ye mulongela Yoano, o mwanda bamwitanga bu Yoano Umbatyiji. Ino, mwanda waka Yoano wābatyije Yesu?

Bine, Yoano wāmubatyije mwanda Yesu mwine wāile kunena Yoano amubatyije. Yoano wādi ubatyija bantu besāsa bubi bwabo bobālongele. Lelo Yesu nandi wālongele bintu bibi byaādi wa kwisāsa? Mhm, Yesu kālongele’byopo, mwanda i Mwanā Leza utambile mūlu. Nanshi wānene Yoano amubatyije mwanda wa buluji bukwabo. Tutalei buno buluji.

Yesu wādi sendwe wa mbao kumeso kwa kwiya’ye kudi Yoano. Sendwe wa mbao i muntu upunga bintu na mbao, kimfwa mameza, bityi ne bibasa. Yosefa mulumya Madia wādi sendwe wa mbao, ye aye wāfundije’byo ne Yesu. Ino Yehova kātuminepo wandi Mwana pa ntanda mwanda wa kwikala sendwe wa mbao. Wādi na mwingilo wa pa bula wa kulonga, pano kitatyi kya kwiwingila kibabwana. Ino Yesu wānena Yoano amubatyije mwanda wa kulombola’mba wāile kulonga kiswa-mutyima kya Shandi. Lelo Leza i mwikisangele?

Eyo, i musangale, mwanda Yesu pa kulupuka mu mema, diwi dibatambe mūlu’mba: ‘Yao i wami Mwana, ontokelwe pa mutyima.’ Kadi bimweka’mba diulu dibashituka ne nkunda watumba Yesu. Inoko ke nkunda wa binepo. I kwiifwana bitupu. Ino na bubine i mushipiditu sandu wa Leza.

Pano Yesu udi na bivule bya kulanguluka’po, penepo waenda kwa bunka mafuku 40. Satana waiya konka. Watompa Yesu misunsa isatu mwanda wa ajilule bijila bya Leza. Ino Yesu wapele.

Kupwa Yesu wajoka ne kusambakana bantu bamobamo baikala ke balondi bandi nansha bana ba bwanga. Bamo majina abo i Andele, Petelo (witwa ne bu Shimona), Fidipa ne Natanela (witwa ne bu Batolomyu). Penepo Yesu ne bano bana ba bwanga bapya abaenda mu bulolo bwa Ngadilea. Mu Ngadilea abashikata mu Kena, kibundi kya ba Natanela. Kwine’kwa, Yesu waenda ku masobo makatampe, walonga’ko ne kingelengele kyandi kibajinji. Lelo wikiyukile? Waalamwine mema ke vinyu.

Mateo 3:13-17; 4:1-11; 13:55; Mako 6:3; Yoano 1:29-51; 2:1-12.



Bipangujo

  • Bano bantu babidi badi pa kifwatulo i bāni?
  • I muswelo’ka ubatyijibwanga muntu?
  • Na bubine Yoano ubatyijanga bāni?
  • I mwanda’ka mwine walengeja Yesu anene Yoano amubatyije?
  • Leza walombola namani amba wasangala pabatyijibwa Yesu?
  • I bika byalongeka paenda Yesu kwa bunka mafuku 40?
  • Balondi nansha bana ba bwanga babajinji ba Yesu i bāni, ne i kingelengele’ka kibajinji kyalonga Yesu?

Bipangujo bikwabo

  • Tanga Mateo 3:13-17.

    Yesu i mushile bandi bana ba bwanga kimfwa’ka mu myanda itala lubatyijo? (Mit. 40:7, 8; Mat. 28:19, 20; Luka 3:21, 22)

  • Tanga Mateo 4:1-11.

    Muswelo wāingidije Yesu Bisonekwa na bwino witukankamika namani twifunde Bible kitatyi ne kitatyi? (Mat. 4:5-7; 2 Pet. 3:17, 18; 1 Yoa. 4:1)

  • Tanga Yoano 1:29-51.

    Yoano wānene bandi bana ba bwanga balonde ani, ne tukokeja kumwiula namani dyalelo? (Yoa. 1:29, 35, 36; 3:30; Mat. 23:10)

  • Tanga Yoano 2:1-12.

    Kingelengele kibajinji kya Yesu kilombola namani amba Yehova kasuminwangapo bengidi bandi kiyampe? (Yoa. 2:9, 10; Mit. 84:11; Yak. 1:17)