Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Dibuku Dyami dya Mānga ya mu Bible

Mānga ya 81: Kukulupila mu Bukwashi bwa Leza

Mānga ya 81: Kukulupila mu Bukwashi bwa Leza

PANO tununu ne tununu twa bantu abataluka mu Babiloni kebenda mu Yelusalema. Abo pa kufika, abatana Yelusalema musadike. Mutupu muntu nansha umo. Bene Isalela bafwaninwe kūbakulula byonso.

Kintu kibajinji kūbaka i madabahu. Kino ye kifuko kya kulambwila’po banyema nansha byabuntu kudi Yehova. Myeji mityetye kupita’po, Bene Isalela abashilula kūbaka tempelo. Ino balwana nabo ba kubwipi kebasakilepo Bene Isalela beyūbake. Penepo abebakwatyija moyo mwanda wa bemike mingilo. Ku mfulo, bano balwana abasoñanya mulopwe mupya wa Peleshia emike mingilo ya lūbako.

Myaka ibapite’po. Pano ke myaka 17 tamba Bene Isalela batamba mu Babiloni. Yehova watume bapolofeto bandi ba Hakai ne Zekadia balombole bantu bashilule kūbaka monka. Bantu abakulupila mu bukwashi bwa Leza ne kukōkela bapolofeto. Abashilula kūbakulula nansha byobadi bakandijibwe na kijila.

Penepo Tatenai mbikavu Mwine Peleshia waiya kwipangula Bene Isalela lupusa lobōbaka nalo tempelo. Bene Isalela abamulombola’mba, pobadi mu Babiloni, Mulopwe Shilusa webanene’mba: ‘Endai mu Yelusalema, mukōbake tempelo ya Yehova Leza wenu.’

Kupwa Tatenai watume mukanda mu Babiloni ne kwipangula shi Shilusa webinenene, mwanda Shilusa wadi ke mufwe. Kepejije mukanda wa mulopwe mupya wa Peleshia ubajoka. Walombola’mba bine Shilusa webinenene. Kadi mulopwe walembe amba: ‘Leka Bene Isalela bōbake tempelo ya Leza wabo. Kadi nakusoñanya nobe kwibakwasha’ko.’ Kubwipi kwa myaka iná kupita’po, tempelo ibapu, Bene Isalela abasangala.

Pabapite myaka mivule. Papo ke kubwipi kwa myaka 48 tamba tempelo ipwa. Bantu ba mu Yelusalema i balanda, kadi kibundi ne tempelo ya Leza kebineñenepo’tu. Ezela Mwine Isalela wayuka bisakila ku tempelo ya Leza pa kujokela mu Babiloni. Ino uyukile byaalonga?

Ezela wakatale Alatazelekishishi mulopwe wa Peleshia, uno mulopwe muyampe wamupe byabuntu bivule bya kuselela mu Yelusalema. Ezela walombe bene Isalela badi mu Babiloni bamuseleje’ko bino byabuntu kufika mu Yelusalema. Kubwipi kwa bantu 6000 abaitabija. Badi na ndalama ne nsahabu mivule ne bintu bikwabo bya bulēme bya kusela.

Ezela wasela mutyima kūlu, mwanda mwishinda mudi bantu babi. Padi bakebanyongolola’tu ndalama ne nsahabu ne kwibepaya. Penepo Ezela wabunge bantu bonso, enka na momwena pa kifwatulo’pa. Ebiya abalombe Yehova ebalame mu lwendo lwabo lulampe lobenda mu Yelusalema.

Ezela ne bantu balombela

Yehova webalama. Abafika bakomo mu Yelusalema kupwa kwa myeji iná ya lwendo. Mwene kino kilombola’mba Yehova ulamanga boba bakulupila mu bukwashi bwandi?

Ezela shapita 2 ku 8.



Bipangujo

  • I bantu banga bataluka mu Babiloni kebenda ku Yelusalema, ino abatana Yelusalema namani pobafika?
  • Bene Isalela abashilula kūbaka bika pobafika, ne balwana nabo abalonga’po namani?
  • Ba Hakai ne Zekadia i bāni, ne abalombola bantu bika?
  • Mwanda waka Tatenai watume mukanda ku Babiloni, ne abamulondolola namani?
  • Ezela walonga bika pa kwivwana’mba tempelo ya Leza ilomba kulongolola?
  • Ezela walombe bika na momwena pa kifwatulo’pa, ne milombelo yandi ibalondololwa namani, ne kino kitufundija bika?

Bipangujo bikwabo

  • Tanga Ezela 3:1-13.

    Shi tudi mu kibundi mwampikwa kipwilo kya bantu ba Leza, i bika byotufwaninwe kwendelela na kulonga? (Eza. 3:3, 6; Bil. 17:16, 17; Bah. 13:15)

  • Tanga Ezela 4:1-7.

    Zelububele wāshidile bantu ba Yehova kimfwa’ka mu myanda ya kwikūkila na bantu bakwabo? (Div. 34:12; 1 Kod. 15:33; 2 Kod. 6:14-17)

  • Tanga Ezela 5:1-5, 17 ne 6:1-22.

    Mwanda waka balwana bātuninye kwimika mwingilo wa lūbako lwa tempelo? (Eza. 5:5; Is. 54:17)

    Byālongele bakulumpe ba Bayuda bikankamika namani bakulumpe Bene Kidishitu bakimbe buludiki bwa Yehova pobatambwa na balwana? (Eza. 6:14; Mit. 32:8; Loma 8:31; Yak. 1:5)

  • Tanga Ezela 8:21-23, 28-36.

    Kumeso kwa kwikwata’ko na kulonga mwanda kamukaya, mwanda waka i biyampe kwiula kimfwa kya Ezela? (Eza. 8:23; Mit. 127:1; Nk. 10:22; Yak. 4:13-15)