Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Dibuku Dyami dya Mānga ya mu Bible

Mānga ya 64: Solomone Waūbaka Tempelo

Mānga ya 64: Solomone Waūbaka Tempelo

DAVIDA paādi kafwile, wālombwele Solomone muswelo wāletele Yehova Leza wa mwa kūbakila tempelo. O mwanda Solomone washilula kūbaka tempelo mu mwaka wa buná wa kubikala kwandi, kadi pabapite myaka isamba-ibidi ne kipindi penepo ibapu. Tununu ne tununu twa bana-balume i bengile ku tempelo, kadi lūbako i lulombe lupeto luvule. Ke-pantu, i bobake na nsahabu ne ndalama mivule.

Tempelo idi na byumba bibidi’nka na mwādi mwikadile tabenakulo. Inoko bino byumba i bikata misunsa ibidi kupita bya mu tabenakulo. Solomone watūdija dikumbo dya kipwano mu kyumba kya munda mwa tempelo, ne bintu bikwabo byādi mu tabenakulo nabyo bibatūlwa mu kyumba kikwabo.

Tempelo pa kupwa, abasoba masobo makatampe. Ebiya Solomone wafukata kumeso kwa tempelo kalombela, enka na momwena pa kifwatulo’pa. Solomone wanena Yehova’mba: ‘Abe kubwanwapo nansha mu madiulu onso, nanshi ino tempelo mityetye nenki po pene. Inoko, a Leza wami, nakwisāshila, ivwana bantu bobe shi balombela mu kino kifuko’ki.’

Mulopwe Solomone ulombela

Solomone ukadikija’tu milombelo, mudilo ubatūka mūlu. Ubasoka milambu ya banyema yobadi balambula. Kupwa kubamweka ne kitōkeji kikatampe kya kwa Yehova mu tempelo yonso. Kino kilombola’mba Yehova waivwana kadi waitabija tempelo ne milombelo ya Solomone. Tempelo ibaikala ke kifuko kīya kutōtela’mo bantu kupita’ko tabenakulo.

Penepo Solomone waludika na tunangu mu bula bwa kitatyi kilampe, ne bantu abaikala mu nsangaji. Ino Solomone wasonge bakaji bavule ba mu matanda angi akubulwa kutōta Yehova. Mwene umwene bidi umo utōta nkishi’u? Ku mfulo, bandi bakaji abamufikija ku kutōta baleza bangi. Uyukile byafikila Solomone pa kulonga kino kilongwa? Wakomenwa kulela bantu biyampe. Waikala ke kilobo, ne bantu ababulwe nsangaji.

Mulopwe Solomone utōta nkishi

Kino kibafikija Yehova ku kukalabela Solomone ne kumunena’mba: ‘Nkakubikula ne kupa bulopwe ku muntu mukwabo. Nkikalongapo kino pokidi mūmi, nkekilonga mu bubikadi bwa obe mwana. Ino nkikamutalulapo bantu bonso mu bulopwe.’ Tutalei mobyafikile.

1 Bilongwa 28:9-21; 29:1-9; 1 Balopwe 5:1-18; 2 Bilongwa 6:12-42; 7:1-5; 1 Balopwe 11:9-13.



Bipangujo

  • Solomone waubaka tempelo ya Yehova mu bula bwa myaka inga, ne mwanda waka i milombe lupeto luvule?
  • Lelo tempelo idi na byumba binga bikata, ne i bika bidi mu kyumba kya munda?
  • Solomone wanena bika mu milombelo yaalombela pavuika tempelo?
  • Yehova walombola namani amba waitabija milombelo ya Solomone?
  • Bakaji ba Solomone abamufikija ku kulonga bika, ne i bika byamufikila?
  • Mwanda waka Yehova wakalabela Solomone ne Yehova wamunena bika?

Bipangujo bikwabo

  • Tanga 1 Bilongwa 28:9, 10.

    Mungya binenwa bya Davida bisonekelwe mu 1 Bilongwa 28:9, 10, tufwaninwe kwikankila’ko kulonga bika difuku ne difuku? (Mit. 19:14; Fid. 4:8, 9)

  • Tanga 2 Bilongwa 6:12-21, 32-42.

    Solomone wālombwele namani amba i kutupu njibo yūbakilwe na muntu ikokeja kubwana’mo Leza Mwine Mukatakata Mwine? (2 Bil. 6:18; Bil. 17:24, 25)

    Binenwa bya Solomone bidi mu 2 Bilongwa 6:32, 33 bilombola’mba Yehova udi namani? (Bil. 10:34, 35; Ngat. 2:6)

  • Tanga 2 Bilongwa 7:1-5.

    Bana ba Isalela pa kumona ntumbo ya Yehova bāmutendele, le batwe netu tukalonga bika potumona madyese esela Yehova bantu bandi dyalelo? (2 Bil. 7:3; Mit. 22:22; 34:1; 96:2)

  • Tanga 1 Balopwe 11:9-13.

    Būmi bwa Solomone bulombola namani mvubu ya kwikala wa kikōkeji kutūla ne ku mfulo? (1 Bal. 11:4, 9; Mat. 10:22; Kus. 2:10)