Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Dibuku Dyami dya Mānga ya mu Bible

Mānga ya 58: Davida ne Ngodiata

Mānga ya 58: Davida ne Ngodiata

BENE Fidishitia abaiya kulwa monka na Isalela. Batutu wa Davida basatu badi mu basola ba Solo. Difuku dimo, Yese wasapwila Davida’mba: ‘Sela miseke ne mikate mijokoloke ukatwadile banabenu. Kebatale shi badi namani pano.’

Ngodiata

Davida pa kufika ku kitūlo kya ba bulwi, wanyemena ku bulwi mwanda wa kutala banababo. Ebiya kampangala Ngodiata Mwine Fidishitia watambe kuzawila Bene Isalela. Wadi wibazawila lubanga ne kyolwa umbula mwa mafuku 40. Wela lubila’mba: ‘Tongai muntu umo āye tulwe nandi. Shi wauntyumuna ne kungipaya tukekala bapika benu. Ino shi mutyumune ne kumwipaya mukekala bapika betu. Tongai’mo umo tulwe nandi.’

Davida waipangula basola bamo’mba: ‘I bika bikapebwa muntu ukepaya uno Mwine Fidishitia ne kukafundula mutonko mu Isalela?’

Sola umo wanena’mba: ‘Solo ukamupa byabupeta bivule. Kadi ukamupa wandi mwana nsongwakaji kwikala wandi mukaji.’

Ino Bene Isalela bonso abatuyuka Ngodiata mwanda i kampangala. Udi kubwipi kwa mametele asatu umbula, kadi udi na sola mukwabo umuselēle ngabo.

Basola bamo abakasapwila Mulopwe Solo amba Davida usakanga kulwa na Ngodiata. Ino Solo walombola Davida’mba: ‘Kubwanyapo kulwa na yeu Mwine Fidishitia. Abe ukidi mwanuke, kadi aye i sola umbūmi bwandi bonso.’ Davida walondolola’mba: ‘Naipaile mpumpi ne ntambo badi basela mikōko ya tata. Ne uno Mwine Fidishitia ukekala bwa umo wa mu bano banyema. Yehova ukankwasha.’ Penepo Solo wanena’mba: ‘Enda shobe, Yehova ekale nobe.’

Davida watūkila ku munonga ne kuboya’ko mabwe atano masenene, waela’o mu kafuko kandi. Kupwa wapakata topito yandi kaenda kukasambakana kampangala. Ngodiata pa kumumona, wamufutulula. Walanga’mba i kipēla kyonka kwipaya Davida.

Davida wela dibwe

Ngodiata wanena: ‘Fwena kuno, nkapāna umbidi obe bu bidibwa bya byoni ne banyema.’ Ino Davida wanena’mba: ‘Abe wiyanga kondi na kipete, ne mukobe ne muketo, ino ami ngiyanga kodi na dijina dya Yehova. Dyalelo dino Yehova wakumpe mu kuboko kwami, kadi nkakushinda panshi.’

Ponka’po, Davida wanyemena kudi Ngodiata. Waomona dibwe mu kafuko kandi, wapanze’dyo mu topito ne kwidyela na kikoso kyonso. Dibwe dibakatwela mu mutwe wa Ngodiata, penepo Ngodiata wapone mufwididile! Bene Fidishitia pa kumona obekulupidile wapone, abaalamuka ke banyema. Bene Isalela abebalonda lubilo ne kutyumuna bulwi.

1 Samwele 17:1-54.



Bipangujo

  • Ngodiata ukolomonanga namani bibumbo bya bulwi bya Bene Isalela?
  • Le Ngodiata i mukata namani, ne Mulopwe Solo wanena kupa muntu ukepaya Ngodiata bika?
  • Davida wanena bika pamulombola Solo amba kubwanyapo kulwa na Ngodiata mwanda ukidi mwanuke?
  • Davida pa kulondolola Ngodiata, walombola namani amba ukulupile mudi Yehova?
  • Monka momwena pa kifwatulo, Davida waipaya Ngodiata na bika, ne Bene Fidishitia abalonga bika pafwa Ngodiata?

Bipangujo bikwabo

  • Tanga 1 Samwele 17:1-54.

    Mwanda waka Davida kādipo na moyo, ne tukokeja kwiula namani bukankamane bwandi? (1 Sam. 17:37, 45; Ef. 6:10, 11)

    Mwanda waka Bene Kidishitu bafwaninwe kwepuka mushipiditu wa kwitāka na wādi na Ngodiata shi bakaya makayo ne kwipwija mukose? (1 Sam. 17:8; Ngat. 5:26; 1 Tem. 4:8)

    Binenwa bya Davida bilombola namani amba wādi na lwitabijo mudi Leza? (1 Sam. 17:45-47; 2 Bil. 20:15)

    Ino nsekununi pa kyaba kya kwitulombola’tu bulwi bwa bibumbo bibidi, itulombola muswelo’ka amba na bubine i bilezaleza byādi bilwa na Yehova, Leza wa bine? (1 Sam. 17:43, 46, 47)

    Bashele’ko bashingwe māni beulanga namani kikulupiji kya Davida mudi Yehova? (1 Sam. 17:37; Yel. 1:17-19; Kus. 12:17)