Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Dibuku Dyami dya Mānga ya mu Bible

Mānga ya 56: Solo—Mulopwe Umbajinji wa Isalela

Mānga ya 56: Solo—Mulopwe Umbajinji wa Isalela
Samwele ushinga Solo mani bu Mulopwe

TALA Samwele upungulwila māni pa mutwe wa mwana-mulume. Ye mobādi balongela mwanda wa kulombola’mba uno muntu ke mulopwe. Yehova wāsapwidile Samwele apungulwile māni pa mutwe wa Solo. I māni a mananshi meshile na makwabo.

Solo wādi ulanga’mba bulopwe kebumufwaninwepo. Wāsapwila Samwele’mba: ‘Ndi wa ku kisaka kya Benjemani, ye kityetye mu Isalela. Mwanda waka unena’mba nsa kwikala mulopwe?’ Yehova wāsenswe Solo mwanda kādipo wisakila bukatampe ne mvubu. O mwanda wāmutongele ekale mulopwe.

Ino Solo ke mulandapo nansha muntu mutyetye. I wa ku kisaka kya bupeta, kadi i mupopoke, mulampe. I mulampe kupita Mwine Isalela ye-yense! Solo wādi unyema lubilo bininge, kadi i muntu wa mpata kashā. Bantu bāsangala Yehova pa kutonga Solo bu mulopwe. Papo bāshilula kutundula mawi amba: ‘Ufwa bununu abe mulopwe!’

Balwana na Isalela badi monka na bukomo enka na mobādi bekadile kala. Bakisusula monka Bene Isalela. Solo pa kupwa kubikikwa, Bene Amona abebatambe divita. Ino Solo wabungakanya basola bavule, ne kutyumuna Bene Amona. Bantu abasangala’mba bine Solo i mulopwe.

Myaka pa kupita’po, Solo waludika Bene Isalela ne kutambula bushindañani buvule kumeso a balwana nabo. Solo udi kadi na mwana kipanda witwa bu Yonafane. Yonafane nandi wakwasha Isalela mwanda wa kutyumuna malwi. Bene Fidishitia bakidi monka balwana babi mpata na Bene Isalela. Difuku dimo, tununu tuvule twa Bene Fidishitia tubaiya kulwa na Bene Isalela.

Penepo Samwele wasapwila Solo akunge kufika ne pasa kwiya kwela kitapwa nansha kyamulambu kudi Yehova. Ino Samwele waije kwiya. Solo wakwatwa moyo’mba Bene Fidishitia basa kushilula bulwi, penepo wakela kitapwa aye mwine. Ku mfulo Samwele waiya, wasapwila Solo amba ubabulwe kikōkeji. Samwele wanena’mba: ‘Yehova ukatonga muntu mukwabo bu mulopwe wa Isalela.’

Mwenda mafuku Solo wabulwe monka kikōkeji. Penepo Samwele wamusapwila’mba: ‘Kitabukile buya kukōkela Yehova kupita’ko kumulambula mikōko milumbuluke. Byokukōkelepo Yehova, nandi kakakulekapo kwikala mulopwe wa Isalela.’

Tukokeja kuboila ñeni miyampe ku uno mwanda. Amba kukōkela Yehova kitatyi kyonso kudi na kamweno. Kadi amba muntu muyampe, mwādi mwikadile Solo, ukokeja kwalamuka ke mubi. Ketusenswepo kwikala babi, mwene i amo?

1 Samwele shapita 9 ku 11; 13:5-14; 14:47-52; 15:1-35; 2 Samwele 1:23.



Bipangujo

  • Pa kifwatulo, Samwele uloñanga bika, ne mwanda waka?
  • Mwanda waka Yehova wasu Solo, ne Solo i muntu wa muswelo’ka?
  • Mwanā Solo mwana-mulume i ani, ne walonga bika?
  • Mwanda waka Solo waela kitapwa pa kyaba kya kwilaija Samwele āye ele’kyo?
  • I ñeni’ka yotwaboila ku nsekununi ya Solo?

Bipangujo bikwabo

  • Tanga 1 Samwele 9:15-21 ne 10:17-27.

    Kwityepeja kwa Solo kwāmukweshe namani aleke kulonga bibi pāmufutulwile bana-balume bamo? (1 Sam. 9:21; 10:21, 22, 27; Nk. 17:27)

  • Tanga 1 Samwele 13:5-14.

    Lelo i bubi’ka bwālongele Solo pa Ngilengale? (1 Sam. 10:8; 13:8, 9, 13)

  • Tanga 1 Samwele 15:1-35.

    I bubi’ka bukatampe bwālongele Solo mu mwanda utala Akaka mulopwe wa Bene Amaleke? (1 Sam. 15:2, 3, 8, 9, 22)

    Le Solo wēbingije ne kutyina kutopekwa muswelo’ka? (1 Sam. 15:24)

    Tufwaninwe kuteja kidyumu’ka pobetudingila dyalelo? (1 Sam. 15:19-21; Mit. 141:5; Nk. 9:8, 9; 11:2)