Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Dibuku Dyami dya Mānga ya mu Bible

Mānga ya 55: Mwanuke Mwana-Mulume Wingidila Leza

Mānga ya 55: Mwanuke Mwana-Mulume Wingidila Leza

MWENE yeu mwanuke i mupopoke? Dijina dyandi i Samwele. Mwana-mulume umutūdile kuboko pa mutwe i Edi, kitobo mukatampe wa Isalela. Yeu i Elekana shandya Samwele ne inandi Hana, abaiya kutūla Samwele kudi Edi.

Samwele wetana ne kitobo mukatampe Edi

Samwele udi na myaka iná nansha itano kete. Ino usa kushikata na Edi ne babitobo bakwabo kuno ku tabenakulo ya Yehova. Mwanda waka Elekana ne Hana abapāna Samwele engidile Yehova mu tabenakulo aye ukidi mwanuke? Tutalei.

Myaka mityetye kunyuma, Hana wadi na bulanda bukatampe. Mwanda wadi ñumba, ne wadi wabila bininge kubutula mwana. Penepo difuku dimo, Hana pa kwenda kukapempula tabenakulo ya Yehova, walombela’mba: ‘A Yehova, kokangilwa! Shi umpe mwana mwana-mulume, nakutyipila’mba nkamupāna kodi akakwingidile mu būmi bwandi bonso.’

Yehova walondolola milombelo ya Hana, ne myeji pa kupita’po wabutula Samwele. Hana wasanswa wandi mwana ne kushilula kumufundija mu bwanuke bwandi myanda ya Yehova. Wasapwila wandi mulume amba: ‘Shi mwana watamina’ko ne kuleka mabele, nkamutūla ku tabenakulo akengidile Yehova.’

Ye byotwamona ba Hana ne Elekana balonga pa kifwatulo’pa. Samwele i musangale kwingidila Yehova ku kipema kyandi mwanda i mufundijibwe senene na bambutwile bandi. Mwaka ne mwaka, Hana ne Elekana bāyanga kutōta ku kino kipema kya pa bula, ne kwiya kupempula wabo mwana. Kadi mwaka ne mwaka, Hana uselelanga Samwele mutwelo mupya wamusonene.

Samwele wingidilanga Yehova ku tabenakulo myaka na myaka, o mwanda Yehova ne bantu abamusanswa. Ino Hofini ne Finease, bana ba kitobo mukatampe Edi, kebadipo biyampe. Baloñanga bintu bivule bibi, ne kutonona bakwabo nabo baleke kukōkela Yehova. Edi ufwaninwe kwibatalula mwingilo wa bu kitobo, ino kebatalwile’opo.

Nkasampe Samwele kalekelepo kwingidila Yehova mwandapo bubi bubavula ku tabenakulo. Ino, pabapite kitatyi kilampe pakubulwa Yehova esambe na muntu ye-yense mwanda bantu basenswe Yehova binebine i batyetye. Samwele pa kutama’ko bityetye, kyafika uno muswelo:

Samwele ulēle mu tabenakulo, waivwana diwi dimulangula. Walondolola’mba: ‘Ami uno.’ Penepo wabūka ne kunyemena kudi Edi, kanena’mba: ‘Wadi ubangite, ami uno.’

Ino Edi walondolola’mba: ‘Nkikwityilepo; joka ukalāle.’ Penepo Samwele wakalāla.

Kupwa diwi dibamwite dya bubidi amba: ‘Samwele!’ Penepo Samwele wabūka ne kunyemena monka kudi Edi. Kamunena’mba: ‘Wadi ubangite, ami uno.’ Ino Edi wamulondolola’mba: ‘Nkikwityilepo abe wami mwana; joka ukalāle monka.’ Penepo Samwele wakalāla.

Kadi diwi dibamwite dya busatu’mba: ‘Samwele!’ Penepo Samwele wanyemena kudi Edi. Kanena’mba: ‘Ami uno, pano’ko i abe wangita.’ Ebiya Edi wayuka’mba i Yehova umwita. Penepo, wasapwila Samwele’mba: ‘Kalāle monka, shi wakwite dikwabo, unene’mba: “Nena Yehova, mwanda umpika obe ukutejanga.”’

Ye byanena Samwele pamwita Yehova monka. Kupwa Yehova wasapwila Samwele’mba nsa kupa Edi ne bandi bana mfuto. Kupwa papo, Hofini ne Finease abafu ku bulwi bwa na Bene Fidishitia, Edi pa kwivwana uno mwanda, wapone kimvunda-nyuma, nshingo ibatyumuka ne kufwa wafu. Pa kino, kinenwa kya Yehova kibafikidila.

Samwele watama ne kwikala mutyibi wa mfulo wa Isalela. Aye pa kununupa, bantu abamunena’mba: ‘Tonga mulopwe wa kwituludika.’ Samwele kasakilepo kulonga uno muswelo, mwanda na bubine Yehova ye mulopwe wabo. Ino Yehova wamunena’mba ivwana bantu.

1 Samwele 1:1-28; 2:11-36; 4:16-18; 8:4-9.



Bipangujo

  • Uno mwanuke mwana-mulume udi pa kifwatulo i ani, ne bakwabo badi’po nabo i bāni?
  • Hana walombele bika difuku dimo paadi mu tabenakulo ya Yehova, ne Yehova walondolwele namani milombelo yandi?
  • Samwele udi na myaka inga pobamutwala kukengidila Yehova ku kipema, ne inandi umulongelanga bika mwaka ne mwaka?
  • Tela majina a bana ba Edi, ne i bantu ba muswelo’ka?
  • Yehova waite Samwele namani, ne i musapu’ka waamulombola?
  • Samwele waikala ani pa kutama, ne bibaikala namani aye pa kununupa

Bipangujo bikwabo

  • Tanga 1 Samwele 1:1-28.

    Elekana i mushile mitwe ya bisaka kimfwa’ka kiyampe mu myanda ya kutangidila kumeso mu mutōtelo wa bine? (1 Sam. 1:3, 21; Mat. 6:33; Fid. 1:10)

    I ñeni’ka yotuboila ku kimfwa kya Hana shi tudi na mwanda witukambija ku mutyima? (1 Sam. 1:10, 11; Mit. 55:22; Loma 12:12)

  • Tanga 1 Samwele 2:11-36.

    Edi wālēmekele bandi bana bikatampe namani kutabuka Yehova, ne kino kitupa kidyumu’ka? (1 Sam. 2:22-24, 27, 29; Kup. 21:18-21; Mat. 10:36, 37)

  • Tanga 1 Samwele 4:16-18.

    I misapu’ka iná ya malwa yātambile ku bulwi, ne yāfikije Edi ku bika?

  • Tanga 1 Samwele 8:4-9.

    Isalela wāfityije namani Yehova mutyima, ne tukokeja kukwatakanya Bulopwe bwandi na dikōkeji namani dyalelo? (1 Sam. 8:5, 7; Yoa. 17:16; Yak. 4:4)