Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Dibuku Dyami dya Mānga ya mu Bible

Mānga ya 53: Mutyipo wa Yefeta

Mānga ya 53: Mutyipo wa Yefeta
mwana Yefeta mwana-mukaji

LELO kwatyipile kasha mutyipo kupwa kadi wealakanya kyowatyipile’o? Ye mwatyipile mwana-mulume udi pa kifwatulo’u, o mwanda udi na bulanda. Mwana-mulume’u i Yefeta, mutyibi mukomokomo wa Isalela.

Yefeta waikele’ko mu kitatyi kyalekele Bene Isalela kutōta Yehova. Badi kebalonga monka bibi. Penepo Yehova waleka Bene Amona bebamweshe malwa. Kino kibalengeja Bene Isalela bashilule kudidila Yehova’mba: ‘Tubapi mambo kodi. Tubakwisāshila, witukūle!’

Yefeta ne bandi bantu

Bantu abesāsa bilongwa bibi byobalongele. Abalombola kwisāsa na kushilula kutōta monka Yehova. Penepo Yehova webakwasha monka.

Ebiya bantu abatonge Yefeta mwanda wa kulwa na Bene Amona. Yefeta waabija Yehova amukwashe mu bulwi. Penepo watyipila Yehova mutyipo’mba: ‘Shi ukampe bushindañani pa Bene Amona, muntu umbajinji ukalupuka mu njibo yami kwiya kuntundaila ponkajoka na bushindañani, nkakupa’ye.’

Yehova waivwana mutyipo wa Yefeta, kadi wamukwasha atambule bushindañani. Yefeta pa kujoka, uyukile muntu umbajinji watamba mu njibo yandi kwiya kumutundaila? I wandi mwana mwana-mukaji, ye wandi mwana umo kete. Yefeta kadila’mba: ‘Yo! yo! a mwanami! Ubaundetela bulanda bya malwa. Ino ndi mutyipile Yehova mutyipo, nkikokejapo kwalamuka.’

Mwanā Yefeta pa kuyuka mutyipo wandi, nandi wakwatwa bidi bulanda. Mwanda usa kushiya shandi ne balunda nandi. Ino ukapityija mafuku a būmi bwandi mu kwingidila Yehova ku tabenakulo mu Shilo. Penepo kasapwila shandi’mba: ‘Shi wi mutyipe mutyipo kudi Yehova, ufwaninwe kufikidija’o.’

Penepo mwanā Yefeta waenda ku Shilo, ne kupityija mafuku a būmi bwandi wingidila Yehova mu tabenakulo yandi. Bana-bakaji Bene Isalela badi benda kukamupempula’ko ne kusangala nandi pamo mafuku aná mwaka ne mwaka. Bantu abasanswa mwanā Yefeta mwanda i mwingidi mulumbuluke wa Yehova.

Batyibi 10:6-18; 11:1-40.



Bipangujo

  • Yefeta i ani, ne wāikele’ko mu kitatyi’ka?
  • Yefeta watyipīle Yehova mutyipo’ka?
  • Mwanda waka Yefeta wafitwa paajokela kwandi pa kupwa kushinda Bene Amona?
  • Mwanā Yefeta mwana-mukaji wanena bika pa kuyuka mutyipo wa shandi?
  • Mwanda waka bantu baswele mwanā Yefeta mwana-mukaji?

Bipangujo bikwabo

  • Tanga Batyibi 10:6-18.

    Myanda ya kubulwa kikōkeji kwa Isalela kudi Yehova itupa kidyumu’ka kyotufwaninwe kulonda? (Bat. 10:6, 15, 16; Loma 15:4; Kus. 2:10)

  • Tanga Batyibi 11:1-11, 29-40.

    Tuyukile namani amba Yefeta pa kupāna wandi mwana bu “kyakwela kisōkwe” ke mwandapo wa kumwela bu kitapwa kya muntu musokwe pa mudilo? (Bat. 11:31; Levi 16:24; Kup. 18:10, 12)

    Yefeta wāelele wandi mwana mwana-mukaji bu kitapwa muswelo’ka?

    I ñeni’ka yotuboila ku muswelo wādi umwene Yefeta mutyipo waātyipīle Yehova? (Bat. 11:35, 39; Mus. 5:4, 5; Mat. 16:24)

    Mwanā Yefeta i kimfwa kiyampe namani ku bankasampe Bene Kidishitu mu myanda ya kulondalonda mwingilo wa kitatyi kyonso? (Bat. 11:36; Mat. 6:33; Fid. 3:8)