Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Dibuku Dyami dya Mānga ya mu Bible

Mānga ya 34: Bidibwa bya Muswelo Ungi Mupya

Mānga ya 34: Bidibwa bya Muswelo Ungi Mupya

LELO uyukile biboya bantu panshi’bi? Bidi pamo bwa mabwe a mvula. I bintu bitōka, kadi bidi bwa bifulu bisansanesansane. Ino ke mabwe a mvulapo, i bidibwa.

Bene Isalela baboya mana

Pano kepadi kweji umo kete tamba kasha Bene Isalela balupuka mu Edipito. Pano badi mu ntanda mutuputupu. Kemudipo bidibwa bivule, o mwanda bantu abashilula kutompola’mba: ‘Longa Yehova wētwipaile nansha mu Edipito’mwa. Motwādi tudya bidibwa byonso byotusaka.’

Penepo Yehova wānena’mba: ‘Nkanokeja bidibwa mūlu biponene panshi.’ Ebiya Yehova wālongela monka. Abo bukya lubanga, Bene Isalela pa kumona kintu kitōkoloka panshi, bāalula kwiipangula abo bene na bene amba: ‘Lelo i kika?’

Mosesa wānena’mba: ‘I bidibwa byemupa Yehova.’ Penepo bantu bebinika bu MANA. Byādi bitobala bwa mukate mutyutyu obalambile’ko būki.

Mosesa wēbasapwila’mba: ‘Muntu ne muntu ufwaninwe kuboya pa ndīlo yandi.’ Lubanga ne lubanga bādi baboya enka nabya. Kupwa shi dyuba dibanane, mana ādi ashala panshi ādi asuba.

Kadi Mosesa wānene’mba: ‘Kekwakekala muntu nansha umo wakuleya mana kufika ne kesha.’ Ino bantu bamobamo kwivwana mpika. Lelo uyukile mobyāpityile? Pa kukya lubanga, mana obādi baleya ādi ayula mvinyu bā ne kununka bibi.

Inoko kudi difuku dimo mu yenga Yehova dyāsoñenye bantu baboye mana misunsa ibidi kupita mobādi bāboila. I difuku dya busamba. Yehova wānene kuleya’mo ne a kesha, mwanda kakanokejapo mana nansha amo mu difuku dya busamba-bubidi. Pobādi baleya mana mu difuku dya busamba-bubidi, keādipo atwelwa mvinyu kadi keādipo anunka! Kino i kingelengele kikwabo!

Myaka yonso yālele Bene Isalela mu ntanda mutuputupu Yehova wādi wibadisha mana.

Divilu 16:1-36; Umbadilo 11:7-9; Yoshua 5:10-12.



Bipangujo

  • Pa kifwatulo, i bika biboya bantu panshi, ne bitelwanga namani?
  • Mosesa wāsapwidile bantu bika pa mwanda utala kuboya mana?
  • Yehova wāsoñenye bantu balonge bika mu difuku dya busamba, ne mwanda waka?
  • I kingelengele’ka kyādi kilonga Yehova na mana obādi baleya kufika ne mu difuku dya busamba-bubidi?
  • Yehova wādishishe bantu mana mu myaka inga?

Bipangujo bikwabo

  • Tanga Divilu 16:1-36 ne Umbadilo 11:7-9.

    Divilu 16:8 ulombola namani amba tufwaninwe kulēmeka boba batongelwe na Leza mu kipwilo kya Bwine Kidishitu? (Bah. 13:17)

    Mu ntanda mutuputupu, bāvulwije namani Bene Isalela amba bafwaninwe kwiubija mudi Yehova? (Div. 16:14-16, 35; Kup. 8:2, 3)

    Yesu wāshintulwile amba mana ādi elekeja kintu’ka, ne tukokeja kumwena namani mu ‘mukate utūkile mūlu’? (Yoa. 6:31-35, 40)

  • Tanga Yoshua 5:10-12.

    Bene Isalela bādile mana mu bula bwa myaka inga, ne ano ādi matompo kobadi namani, ne i ñeni’ka yotuboila ku luno lusango? (Div. 16:35; Umb. 11:4-6; 1 Kod. 10:10, 11)