Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Dibuku Dyami dya Mānga ya mu Bible

Mānga ya 7: Bana ba Mapasa Bashalañane

Mānga ya 7: Bana ba Mapasa Bashalañane
Esau

BANO banuke bana-balume babidi i beshile bininge, mwene i amo? Lelo uyukile majina abo? Uno kiluwe omwene i Esau, uno mwanuke mukwabo ulama mikōko i Yakoba.

Esau ne Yakoba bādi bana ba mapasa ba Isake ne Lebeka. Shabo, Isake wādi usenswe Esau bininge, mwanda wādi kiluwe wa binebine ne kadi wādi usokwela kisaka kyabo bidibwa. Inoko Lebeka aye wādi usenswe Yakoba, mwanda wādi utalala, mwana usenswe ndoe.

Pano, nkambo wabo Abalahama wādi ukidi mūmi, kadi fwatakanya muswelo wādi usenswe Yakoba kuteja nsekununi ya Yehova kudi Abalahama. Mafuku pa kupita’po Abalahama wāfwa na myaka 175, papo bano bana ba mapasa bādi kebadi na myaka 15.

Pābwenye Esau myaka 40, wāsongele bakaji babidi ba mu ntanda ya Kenani. Ba Isake ne Lebeka bāfityilwe bininge pa uno mwanda, ke-bantu bano bana-bakaji kebādipo batōta Yehova.

Kupwa, difuku dimo kwalupuka mwanda wālengeje Esau akalabele mwanabo Yakoba bininge. Wālongekele kitatyi kyādi kisaka Isake kwesela wandi mwana mukulu. Esau wādi utengele kutambula dino dyese mwanda wādi mukudile Yakoba. Inoko Esau wādi kala ke mupoteje lupusa lwa kutambula dyese kudi Yakoba. Kadi, kitatyi kyābutwilwe bano bana babidi, Leza wānene’mba Yakoba ye aye ukatambula dyese. Ne kyālongekele enka nankyo. Isake wāesela Yakoba wandi mwana.

Yakoba

Kunyuma, Esau pa kuyuka uno mwanda, wākalabela Yakoba bininge. Wākalabele bininge wāfika ne ku kunena’mba usa kwipaya Yakoba. Lebeka pa kwivwana nankyo, wāfitwa bininge. Enka nankyo, wāsapwila wandi mulume Isake amba: ‘I kibi bininge shi Yakoba nandi asonge mukaji Mwine Kenani.’

Kupwa Isake wāita Yakoba wandi mwana, kāmusapwila’mba: ‘Kokasonga mukaji wa mu Kenani. Enda ku njibo ya nkambo obe Betule mu Halana. Songa umo wa mu bana bana-bakaji ba wandi mwana Lebane.’

Yakoba wāivwana madingi a shandi, enka penepa, wākuta lwendo lwandi lulampe kaenda ku babutule babo mu Halana.

Ngalwilo 25:5-11, 20-34; 26:34, 35; 27:1-46; 28:1-5; Bahebelu 12:16, 17.



Bipangujo

  • Ba Esau ne Yakoba bādi bāni, ne mwanda waka bādi bashalañane?
  • Pāfwile nkambo wabo Abalahama, ba Esau ne Yakoba bādi na myaka inga?
  • Esau wālongele bika byāfityije mutyima wa shandi ne wa inandi bininge?
  • Mwanda waka Esau wākaledile bininge mwanabo Yakoba?
  • Isake wāsapwidile wandi mwana Yakoba bika?

Bipangujo bikwabo

  • Tanga Ngalwilo 25:5-11, 20-34.

    Yehova wālaile bika pa bana babidi ba Lebeka? (Ngal. 25:23)

    Mumweno wa Yakoba ne wa Esau pa bukulu wādi mwishile namani? (Ngal. 25:31-34)

  • Tanga Ngalwilo 26:34, 35; 27:1-46; ne 28:1-5.

    Esau wēlombwele namani amba kasangedilepo bintu bya ku mushipiditu? (Ngal. 26:34, 35; 27:46)

    Pa kusaka Yakoba eselwe madyese na Leza, i bika byāmunene Isake kulonga? (Ngal. 28:1-4)

  • Tanga Bahebelu 12:16, 17.

    Kimfwa kya Esau kilombola amba i bika bikokeja kufikila boba bafutulula bintu bikola?