Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Dibuku Dyami dya Mānga ya mu Bible

Mānga ya 30: Kimuna Kitēma Mudilo

Mānga ya 30: Kimuna Kitēma Mudilo

MOSESA waēndele kufika’nka ne ku lūlu lwa Holeba kukakimba biyombo bya kudisha mikōko yandi. Wēkumona kimuna kitēma mudilo, ino kulota’kyo mpika!

Mosesa ku kimuna kitēma mudilo

Mosesa wālanga’mba: ‘Kino i kimonwa. Leka bidi mfwene njingulule.’ Aye pa kufwena, diwi dyātamba mu bukata bwa kimuna’mba: ‘Kokafwena. Vūla bikwabilo byobe, mwanda poimene’po i pajila.’ I Leza wādi unena kupityila mudi mwikeulu, o mwanda Mosesa wēfile mpala yandi.

Kupwa Leza wāmunena’mba: ‘Namone masusu a bantu bami mu Edipito. Nanshi nkebakūla, kadi nakutume abe ukalupule bantu bami mu Edipito.’ Yehova wādi usaka kukatwala bantu bandi mu ntanda miyampe ya Kenani.

Ino Mosesa wānena’mba: ‘Ami ne wa bitupu. Mbwanya kwibakūla namani? Ino langa bidi shi naenda. Bene Isalela bakangipangula’mba “Le i ani wakutuma?” Lelo nkanena kika?’

Leza nandi amba: ‘Tala kyokanena: “YEHOVA Leza wa Abalahama, Leza wa Isake, ne Leza wa Yakoba wantume komudi.”’ Wābweja’ko amba: ‘Dino ye dyami dijina nyeke ne nyeke.’

Mosesa wālondolola’mba: ‘Ino shi kebankulupilepo ponkanena’mba i abe wantuma.’

Leza wāmwipangula’mba: ‘I kika kidi mu kobe kuboko?’

Mosesa’mba: ‘I mukombo.’

Leza wāmunena’mba: ‘Ela’o panshi.’ Mosesa wēwela, ponka’po mukombo wāikala ke nyoka. Kupwa Yehova wāmulombola kingelengele kikwabo. Wānena’mba: ‘Kuja kuboko mu mbwija yobe.’ Mosesa wēkukuja, aye pakulupula’ko, ke kudi tō! Kuboko kwāikala bwa kukwatwe na misongo mibi itwa bu makopo. Kupwa Yehova wāpa Mosesa bukomo bwa kulonga kingelengele kya busatu. Ku mfulo, wāmunena’mba: ‘Pokalonga bino bingelengele, Bene Isalela bakakulupila’mba i ami wakutuma.’

Penepo Mosesa wājokela ku njibo kanena Yefelo amba: ‘Nakwisāshila, ndeke ñende ku Edipito nkamone mwikadile bantu bami.’ Yefelo wāshindikila Mosesa, Mosesa nandi wāenda ku Edipito.

Divilu 3:1-22; 4:1-20.



Bipangujo

  • I dijina’ka ditwanga lūlu ludi pa kifwatulo’lu?
  • Lombola kintu kyeni kyāmwene Mosesa paāendele na mikōko ku lūlu.
  • Diwi dyātambile mu kimuna dyānene bika, ne dyādi diwi dya ani?
  • Mosesa wālondolwele namani pāmunene Leza akalupule bantu bandi mu Edipito?
  • Leza wānene Mosesa akalombole bantu amba i ani wāmutuma?
  • Mosesa wādi wa kubingija namani amba i Leza wamutuma?

Bipangujo bikwabo

  • Tanga Divilu 3:1-22.

    Bintu byātene Mosesa bitukulupija namani amba nansha shi twimona bu bambulwa bwino mu mingilo ya kiteokratike, ino Yehova uketukwasha? (Div. 3:11, 13; 2 Kod. 3:5, 6)

  • Tanga Divilu 4:1-20.

    Mutyima wa Mosesa wāshintyile namani mu myaka 40 yaālēle mu Midyana, ne i ñeni’ka ikokeja kuboila’ko boba bapebwa madyese mu kipwilo? (Div. 2:11, 12; 4:10, 13; Mika 6:8; 1 Tem. 3:1, 6, 10)

    Nansha shi tubapebwa madingi na Yehova kupityila ku bulongolodi bwandi, i kikulupiji’ka kitupa kimfwa kya Mosesa? (Div. 4:12-14; Mit. 103:14; Bah. 12:4-11)