Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Dibuku Dyami dya Mānga ya mu Bible

Mānga ya 24: Yosefa Watompa Banababo

Mānga ya 24: Yosefa Watompa Banababo

YOSEFA usaka kuyuka shi batutu wandi 10 bakidi babi ne bampikwa lusa. Webanena’mba: ‘Mwi batubedibedi. Mubaiya kutala buzoze bwa yetu ntanda.’

Nabo amba: ‘Mhm, ke amopo. Twi bantu ba binebine. Twi bana na bana batwe bonso. Twadi 12. Inoko umo ke kutupu’ye, mukala nandi ushele na tata kwetu.’

Yosefa walonga bu wibapatanya. Wakute mwanabo witwa bu Shimioni mu kifungo, ne kuleka bakwabo basele bidibwa bende kwabo. Ino webanena’mba: ‘Pa kukajoka, mufwaninwe kupaika ne mukala wenu.’

Abo pa kujokela kwabo ku Kenani, abalombola shabo Yakoba byonso byebafikile. Yakoba wafītwa. Kadila’mba: ‘Yosefa kakidi’kopo, ne Shimioni pano nandi kutupu’ye. Nkisapo kwimupa mukala wami Benjemani.’ Ino bidibwa pa kushilula kutyepa, Yakoba waleka basele Benjemani, bende ku Edipito bakapote bidibwa bikwabo.

Papo Yosefa wamone banababo bāya. Wasepelela bininge pa kumona nkasandi Benjemani. Kufika ne pano, i kutupu ujingulwile’mba mulēme’u i Yosefa. Ebiya Yosefa walonga kintu kimo kya kutompa banababo 10.

Wasoñanya bengidi bandi bayuje bidibwa mu mifuko. Ino pakubulwa kwibayukija, waomekeja kitomeno kyandi kya ndalama mu mufuko wa Benjemani. Abo pa kutaluka ne kwenda kulampe mpika, Yosefa watume bengidi bandi bakebalonde. Bengidi pa kwibapeta, kebebanena’mba: ‘Mwanda waka mubaibe kitomeno kya ndalama kya mfumwetu?’

Bonso balondolola’mba: ‘Ketwibilepo kitomeno kyandi. Shi mubatana kitomeno na yense wa umbukata mwetu, nankyo yao muntu afwe.’

Penepa bengidi ababandaula mu mifuko yonso, abatana kitomeno mu mufuko wa Benjemani, enka na mowekimwena pano’mu. Bengidi abanena’mba: ‘Banwe bakwabo endai, inoko Benjemani ufwaninwe kwaluka netu.’ Lelo banababo 10 pano abalonga kika?

Bonso abajoka pamo na Benjemani ku njibo ya Yosefa. Yosefa wanena banababo’mba: ‘Banwe endai kwenu, ino Benjemani ukashala kuno ke umpika wami.’

Yuda watentulula’mba: ‘Shi njoke pampikwa uno mwanuke, tata wami ukafwa mwanda umusenswe bininge. Nakwisāshila, ngikale umpika obe kuno, ino uno mwanuke umuleke ajoke kwetu.’

Yosefa wamone amba banababo abaalamuka. Kebadi pano na lusa. Tubandaulei pano kyalonga Yosefa.

Ngalwilo 42:9-38; 43:1-34; 44:1-34.

Abasambila banababo ne Yosefa


Bipangujo

  • Mwanda waka Yosefa wānene banababo amba i batubedibedi?
  • I bika byālekēle Yakoba Benjemani wandi mwana nkasa ende mu Edipito?
  • Kitomeno kya ndalama kya Yosefa kyātwelele namani mu mufuko wa Benjemani?
  • Yuda wālombele kulonga bika mwanda wa balekelele Benjemani?
  • Banababo na Yosefa bāalamukile namani?

Bipangujo bikwabo

  • Tanga Ngalwilo 42:9-38.

    Binenwa bya Yosefa bidi mu Ngalwilo 42:18 i kivulujo kiyampe namani ku boba badi na biselwa dyalelo mu bulongolodi bwa Yehova? (Neh. 5:15; 2 Kod. 7:1, 2)

  • Tanga Ngalwilo 43:1-34.

    Nansha Lubeni byaādi mwana umbedi, ino mwanda waka Yuda ye wādi unena pa kyaba kya banababo? (Ngal. 43:3, 8, 9; 44:14, 18; 1 Bil. 5:2)

    Yosefa wātompele namani banababo patōkelela, ne mwanda waka? (Ngal. 43:33, 34)

  • Tanga Ngalwilo 44:1-34.

    Yosefa wētelele bu ani mu budyumuku bwandi bwa kusaka banababo baleke kumujiula? (Ngal. 44:5, 15; Levi 19:26)

    Banababo na Yosefa bālombwele namani amba kebakidipo na mukao obādi bakwatyila mwanabo? (Ngal. 44:13, 33, 34)