Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Dibuku Dyami dya Mānga ya mu Bible

Mānga ya 23: Bilotwa bya Felo

Mānga ya 23: Bilotwa bya Felo

MYAKA ibidi ibapite’po, Yosefa ukidi enka mu kifungo. Kaseya kamuvulukilepo. Kupwa bufuku bumo, Felo wālota bilotwa bibidi bishile na bikwabo byonso, ino kāyukilepo nshintulwilo yabyo. Lelo ubamumone pano palēle? Bukya lubanga, Felo wāita bañanga bonso ne kwibalombola bintu byonso byaalota. Ino bākomenwa kumulombola nshintulwilo ya bilotwa byandi.

Ke ku mfulo kaseya wāvuluka Yosefa. Kānena Felo’mba: ‘Ponadi mu kifungo, mwadi muntu wabwenye kushintulula bilotwa.’ Ponka’po Felo wātumanya kukalupula Yosefa mu kifungo.

Felo wālombola Yosefa bilotwa byandi amba: ‘Namwene bañombe bakaji basamba-babidi banune, bayampe’tu. Kupwa namona bañombe bakaji basamba-babidi, banyane tēe. Kadi banyane’ba badya boba banune.

Felo ulōta

‘Mu kilotwa kya bubidi nāmwene mivungu miyampe isamba-ibidi, mitante, ipakata ku mutyi umo. Kupwa namona mivungu isamba-ibidi mifumbe, mitune. Kadi yoya mifumbe yamina yoya miyampe.’

Yosefa wānena Felo amba: ‘Bilotwa byonso bibidi bishintulula kintu kimo. Bañombe bakaji basamba-babidi banune ne mivungu isamba-ibidi mitante i myaka isamba-ibidi, kadi bañombe basamba-babidi banyane ne mivungu isamba-ibidi mifumbe nayo monka i myaka isamba-ibidi. Kukekala myaka isamba-ibidi ya bidibwa bingi mu Edipito. Kupwa kukekala myaka isamba-ibidi ya bidibwa bityetye.’

Penepo Yosefa wālombola Felo’mba: ‘Tonga muntu wa ñeni emanine kungwija bidibwa mu myaka isamba-ibidi ya ndoe. Nankyo bantu kebakafupo nzala mu myaka isamba-ibidi ya nzala ikalonda’ko.’

Felo wānengelelwa uno mulangwe. Wātonga Yosefa abunge bidibwa ne kwibibika mu bibīko. Yosefa wāikala muntu mukatampe kupwa’tu Felo mu Edipito.

Myaka mwanda pa kupita’po, kitatyi kya kipupo kya nzala, Yosefa wāmona bantu bāya. Lelo wibayukile? Mwiko, i batutu wandi dikumi’ba! Shabo Yakoba webatume ku Edipito mwanda kebakidipo na bidibwa mwabo mu Kenani. Yosefa wāyuka banababo, ino abo kumuyuka’po mpika. Uyukile mwanda waka? Mwanda Yosefa ke mukulu, kavwele bisandi bya muswelo mukwabo.

Yosefa wavuluka’mba paādi ukidi mwanuke, wālotele banababo bāya bamufukatyila. Ubavuluka powatangile uno mwanda? Yosefa wayuka’mba i Leza wamutumine muno mu Edipito na bubinga buyampe. Molangila Yosefa usa kulonga kika pano? Leka bidi tutale.

Ngalwilo 41:1-57; 42:1-8; 50:20.



Bipangujo

  • I bika byāfikile Felo bufuku bumo?
  • Mwanda waka ku mfulo kaseya wāvulukile Yosefa?
  • I bilotwa’ka byālotele Felo na momwena pa kifwatulo?
  • Yosefa wānene amba bilotwa bishintulula bika?
  • I muswelo’ka wāikele Yosefa ke muntu mukatampe mu Edipito kupwa’tu Felo?
  • Mwanda waka banababo na Yosefa bāile mu Edipito, ne mwanda waka kēbamuyukilepo?
  • Yosefa wāvulukile kilotwa’ka, ne kino kyāmukweshe ayuke bika?

Bipangujo bikwabo

  • Tanga Ngalwilo 41:1-57.

    Yosefa wākokele namani ñeni padi Yehova, ne Bene Kidishitu dyalelo nabo bakokeja kwiula kimfwa kyandi namani? (Ngal. 41:16, 25, 28; Mat. 5:16; 1 Pet. 2:12)

    Myaka ya ndoe mu Edipito yālondelwe na myaka ya nzala ishiyañanya muswelo’ka ngikadilo ya ku mushipiditu idi’mo bantu ba Yehova dyalelo na Bipwilo bya Kine Kidishitu? (Ngal. 41:29, 30; Am. 8:11, 12)

  • Tanga Ngalwilo 42:1-8 ne 50:20.

    Lelo i bibi batōtyi ba Yehova kufukatyila nansha kwivukwila muntu mwanda wa kumulēmeka shi kyo kibidiji kya mu mine ntanda’ya? (Ngal. 42:6)