Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Dibuku Dyami dya Mānga ya mu Bible

Mānga ya 9: Noa Waūbaka Safini

Mānga ya 9: Noa Waūbaka Safini
Bantu basepa Noa

NOA wādi na mukaji umo ne bana bana-balume basatu. Majina a bandi bana i Shema, Hama, ne Yafeta. Ne mwana yense wādi na mukaji. Nanshi mu kisaka kya Noa mwādi bantu mwanda.

Leza wāsapwidile Noa alonge kintu kitulumukwa. Wāmunena ōbake safini mukatampe. Uno safini wādi mukata’nka bwa masua a mema, ino wādi umweka pamo bwa sanduku mukatampe, kadi mulampe. Leza wāmunena’mba: ‘Longa tupala tusatu kadi kalañanya’mo ne byumba.’ Byumba byādi bya kushikata’mo Noa ne kisaka kyandi, banyema ne bidibwa bya abo bonso.

Kadi Leza wāsapwidile Noa ashinge safini bunange kutyina mema akatwela’mo. Leza wānene’mba: ‘Nkaleta dilobe dya mema dikatampe, kadi nkonakanya ntanda yonso. Muntu yense ukekala panja pa safini ukafwa.’

Noa ne bandi bana bākōkela Yehova ne kushilula kupunga safini. Ino bantu bakwabo bādi bebasepa. Bāendelele kulonga byonka bibi. Kutupu wāitabije Noa pādi wibasapwila bikalonga Leza.

Kisaka kya Noa kitweja banyema ne byakudya mu safini

Lūbako lwa safini lwāijije kitatyi kilampe mwanda yādi mikatampe. Kupwa kwa myaka mivule, safini wāpwa. Papo Leza wāsapwila Noa atweje banyema mu safini. Leza wāmunena kutweja banyema ba misaka imoimo babidi babidi, kilume ne kikaji. Ino mu misaka mikwabo ya banyema, Leza wānene Noa atweje banyema basamba-babidi basamba-babidi. Leza wāsapwila monka Noa atweje misaka mishileshile ya byoni. Noa wālongele monka mwāmusapwidile Leza.

Kupwa, Noa ne kyandi kisaka bātwela mu safini. Penepo Leza wāshita ku kibelo. Noa ne kyandi kisaka bādi belaija munda mwa safini. Wimone bwa abe udi munda mwa safini, wilaija. Lelo bine dilobe dyādi dya kwiya mwālaile Leza?

Ngalwilo 6:9-22; 7:1-9.



Bipangujo

  • Kisaka kya Noa kyādi na bantu banga, kadi tela majina a bandi bana basatu?
  • Leza wāsapwidile Noa alonge kintu’ka kitulumukwa, ne mwanda waka?
  • Bantu ba mu mafuku a Noa bālongele bika pādi pebasapwila Noa myanda ya safini?
  • Leza wānene Noa alonge bika na banyema?
  • Leza pa kupwa kushita kibelo kya safini, Noa ne kyandi kisaka bādi balonga bika?

Bipangujo bikwabo

  • Tanga Ngalwilo 6:9-22.

    I kika kilengeje Noa ekale mutōtyi wa kutendelwa wa Leza wa bine? (Ngal. 6:9, 22)

    Leza umonanga bikandangobo namani, ne netu tufwaninwe kuleka bika shi tukaya makayo? (Ngal. 6:11, 12; Mit. 11:5)

    Tukokeja kwiula Noa namani kitatyi kyobetupa madingi ku bulongolodi bwa Yehova? (Ngal. 6:22; 1 Yoa. 5:3)

  • Tanga Ngalwilo 7:1-9.

    Yehova wāmwene Noa muntu wakubulwa kubwaninina bu moloke, le kino kitukankamika namani dyalelo? (Ngal. 7:1; Nk. 10:16; Is. 26:7)