Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Dibuku Dyami dya Mānga ya mu Bible

Mānga 1: Leza Washilula Kupanga Bintu

Mānga 1: Leza Washilula Kupanga Bintu

BINTU byonso biyampe byotudi nabyo i bitambe kudi Leza. Wāpangile dyuba dya kwitupa kitōkeji mu mwinya, kweji ne ñenyenye mwanda wa kwitumunikila bufuku. Kadi Leza wāpanga ntanda amba twikale’po.

Ino Leza kābadikilepo kupanga dyuba, kweji, ñenyenye ne ntanda. Lelo uyukile byaāpangile dibajinji? Dibajinji Leza wāpangile bantu bamwifwene. Ketukokejapo kwibamona pamo’nka na moketukokejejapo kumwena Leza. Mu Bible bano bantu batelwa bu bamwikeulu. Leza wāpangile bamwikeulu ba kwikala nandi pamo momwa mūlu.

Mwikeulu umbajinji wāpangilwe na Leza wādi mupite bonso. Wādi Mwana wa Leza umbajinji, kadi wāingile pamo na Shandi. Wākweshe’ko Leza mu kupunga bintu bikwabo byonso. Wākweshe’ko Leza pa kupunga dyuba, kweji, ñenyenye ne ino yetu ntanda.

Lelo penepa ntanda yādi muswelo’ka? Ku ngalwilo, kekwādipo muntu wādi ukokeja kushikata pano pa ntanda. Kepādipo kintu, poso’nka kalunga ka mema ko kādi kajokolokele ntanda yonso. Ino Leza wādi usaka bantu bekale pano pa ntanda. Ebiya wāshilula kuteakanya bintu pa mwanda wetu. Lelo wālongele bika?

Eyo, dibajinji ntanda yādi isakilwa kitōkeji. Ebiya Leza wālonga kitōkeji kya dyuba amba kimunike pano pa ntanda. Wālongele namino mwanda wa kwikale bufuku ne mwinya. Kupwa Leza wālupwila nshi myumu panja pa kalunga ka mema.

Ku ñanjilo, kekwādipo kintu nansha kimo pano panshi. Nshi yādi pamo na kifwatulo kyomwene’ki. Kekwādipo maluba nansha mityi nansha banyema. Kekwādipo mushipa nansha umo mu tulunga twa mema. Leza wādi na mingilo mivule ya kulonga mwanda wa kuneñenya ntanda pa kusaka’mba bantu ne banyema bekale’po.

Yelemia 10:12; Kolose 1:15-17; Ngalwilo 1:1-10.

Ntanda pampikwa kintu


Bipangujo

  • Bintu byonso biyampe byotudi nabyo i bitambe kwepi, le ukokeja kutela’ko kimo?
  • Lelo Leza wābadikile kupanga bāni?
  • Mwanda waka mwikeulu umbajinji kupangwa wādi mupite bonso?
  • Lombola mwādi mwikadile ntanda ku ngalwilo. (Tala kifwatulo.)
  • Leza wāshilwile namani kuteakanya ntanda pa mwanda wa banyema ne bantu?

Bipangujo bikwabo

  • Tanga Yelemia 10:12.

    Lelo bupangi bulombola ngikadilo’ka ya Leza? (Is. 40:26; Loma 11:33)

  • Tanga Kolose 1:15-17.

    I mwingilo’ka wāingile Yesu mu bupangi, ne kino kitutonona tumumone namani? (Kol. 1:15-17)

  • Tanga Ngalwilo 1:1-10.

    I ani wāpangile ntanda? (Ngal. 1:1)

    I bika byālongelwe mu difuku dibajinji dya bupangi? (Ngal. 1:3-5)

    Tela byālongelwe mu difuku dya bubidi dya bupangi. (Ngal. 1:7, 8)