Enda ku bidi'mo

Enda ku ntwelelo ya bubidi

Batumoni ba Yehova

Kiluba

Lelo Usaka Kuyuka Bubinebine?

Lelo Usaka Kuyuka Bubinebine?

BUBINEBINE butala pa bika? Butala pa bipangujo bikatampe bimobimo biipangulanga nyeke bantu. Padi nobe kodi mwiipangule bipangujo bwa bino:

  • Lelo Leza witutele mutyima binebine?

  • Le mavita ne masusu bikapwanga?

  • I kika kitufikilanga potufwanga?

  • Lelo kudi lukulupilo ku bafwile?

  • I muswelo’ka onkokeja kulombela Leza nandi angivwane?

  • I muswelo’ka ombwanya kwikala na būmi bwa nsangaji?

I kwepi kokatana malondololo ku bino bipangujo byonso? Shi wadi amba wi mwende mu bibīko bya mabuku, longa wi mutane bitabo bivule bimweka bu byobileta malondololo. Divule dine, bino bitabo bipatanyanga. Bikwabo bimweka bu bya mvubu mu kitatyi kampanda, ino mu kyaba’tu kityetye byapwa bulēme, bebyandikulula nansha kwibipingakanya.

Inoko, kudi dibuku dimo didi na bilondololwa bikulupilwa. I dibuku didi na bubinebine. Yesu Kidishitu wālombēle kudi Leza amba: “Mwanda obe kyo kyabinebine.” (Yoano 17:17) Dyalelo tuyukile uno Mwanda amba i Bible. Mu ano mapaje alonda’ko, ukamona mu kīpi malondololo aleta Bible, apēla, kadi a bine ku bipangujo bidi kūlu’bi.

 Lelo Leza Witutele Mutyima Binebine?

KINE KIPANGWILWA KINO KIPANGUJO: Twikele mu ntanda miyule butapani ne bukondame. Bipwilo bivule bifundija’mba masusu otususuka i kiswa-mutyima kya Leza.

BINE BIFUNDIJA BIBLE: Leza kalengejangapo nansha dimo bintu bibi. Yoba 34:10 unena’mba: “Leka! Leka! Leka! kulampe kwine, Leza kalongapo bibi; kadi ku Mwinebukomobonso alonge bukondame.” Leza udi na mpango ya buswe pa bantu. O mwanda Yesu wētufundije tulombe amba: “Abe Tata wetu wa mūlu, . . . Bulopwe bobe bufike. Muswidile mutyima obe mūlu ne panopantanda pene i monka.” (Mateo 6:9, 10) Leza witutele mutyima bininge, pa kino i mulonge kintu kipite bukata mwanda wa kufikidija mpango yandi.Yoano 3:16.

Tala ne Ngalwilo 1:26-28; Yakoba 1:13; ne 1 Petelo 5:6, 7.

Le Mavita ne Masusu Bikapwanga?

KINE KIPANGWILWA KINO KIPANGUJO: Divita dikikubija bantu kikunye. Muntu yense ususukanga.

BINE BIFUNDIJA BIBLE: Leza i mulaye kitatyi kyakaluja ndoe pano pa ntanda ponsololo. Mu Bulopwe bwandi, umbikalo wa mūlu, bantu ‘kebakelombolapo bulwi monka, ehe.’ Ino, “bakabunda bipete byabo ke makasu.” (Isaya 2:4) Leza ukapwa bukondame ne masusu onso. Bible i mulaye amba: “Leza ukapampula impolo yonso mu meso abo; ne lufu nalo kelukēkalakopo dikwabo kadi, mhm, nansha kuyoyokota miyoa, nansha kudila kwine, nansha misongo mīne mpika. Bintu bibajinji [ke kubadila’mo bukondame ne masusu kadi] bibatukidila.”Kusokwelwa 21:3, 4.

Tala ne Mitōto 37:10, 11; 46:9; ne Mika 4:1-4.

I Kika Kitufikilanga Potufwanga?

KINE KIPANGWILWA KINO KIPANGUJO: Bipwilo bivule mu ino ntanda bifundija’mba kudi kintu kidi munda mwa muntu kyendelelanga na būmi shi umbidi ubafu. Bakwabo bakulupile’mba bafu babwanya kususula bōmi, nansha amba Leza upanga banonga-bibi mfuto na kwibela mu kalunganyembo ka mudilo wa nyeke.

BINE BIFUNDIJA BIBLE: Shi muntu wafu, kakidi’kopo. Musapudi 9:5 unena’mba: “Bafwe kebayukilepo nansha kimo kine.” Bafu kebabwanyapo kususula bōmi nansha kwibakwasha mwanda kebayukilepo kintu, kebevwanangapo, nansha kulonga kintu kyo-kyonso.Mitōto 146:3, 4.

Tala ne Ngalwilo 3:19 ne Musapudi 9:6, 10.

 Lelo Kudi Lukulupilo ku Bafwile?

KINE KIPANGWILWA KINO KIPANGUJO: Tusakanga kwikala bōmi ne kusangala pamo na bantu botuswele. I kyendele’mo shi twabila kumona monka baswe betu bafwile.

BINE BIFUNDIJA BIBLE: Bantu bavule bafwile bakasangulwa. Yesu wālaile amba ‘boba badi mu bibundu bivulukwa bakatamba’mo.’ (Yoano 5:28, 29) Mwendele mpango ya Leza imbajinjibajinji, boba bakasangulwa bakekala na kyepelo kya kwikala mu paladisa pano pa ntanda. (Luka 23:43) Mu bino bilailwe mudi ne būmi bubwaninine kadi bwa nyeke ku bantu ba kikōkeji. Bible unena’mba: “Boloke bakapyananga ntanda, ne kwikala monka nyeke.”—Mitōto. 37:29.

Tala ne Yoba 14:14, 15; Luka 7:11-17; ne Bilongwa 24:15.

I Muswelo’ka Onkokeja Kulombela Leza Nandi Angivwane?

KINE KIPANGWILWA KINO KIPANGUJO: Bantu ba mu bipwilo byonso balombelanga. Inoko, bavule bamonanga’mba milombelo yabo keilondololwangapo.

BINE BIFUNDIJA BIBLE: Yesu wētufundije twepuke kujokelajokela mu bishima bimo byonka mu milombelo yetu amba: “Kadi pa kulombela napo kokipituluka bitupu bitupu, wa dimo kō dimo.” (Mateo 6:7) Shi tusaka’mba Leza evwane milombelo yetu, tufwaninwe kulombela mu muswelo waitabije. Pa kino, tufwaninwe kwifunda kuyuka kiswa-mutyima kya Leza ne kulombela mungya kino kiswa-mutyima. Tutanga mu 1 Yoano 5:14 amba: “Wivwane tulombe kintu, shi kika, shi kika, monka muswidile mutyima [wa Leza], nankyo witwivwana.”

Tala ne Mitōto 65:2; Yoano 14:6, 14; ne 1 Yoano 3:22.

I Muswelo’ka Ombwanya Kwikala na Būmi bwa Nsangaji?

KINE KIPANGWILWA KINO KIPANGUJO: Bantu bavule balañanga’mba lupeto, ntumbo, nansha buya bwa kilungi byobikebaletela nsangaji. O mwanda, bebikimbakimba, ino ne kutana nsangaji mpika.

BINE BIFUNDIJA BIBLE: Yesu wālombwele kine kileta nsangaji paānene amba: “Dyese dyo dyabo bakulandapala pa mutyima.” (Mateo 5:3) Tukokeja kutana nsangaji ya bine poso shi tulonge bukomo bwa kuvuija kisakibwa kyetu kikatampe—kyumwa kyetu kya kuyuka bubinebine butala padi Leza ne mpango yandi kotudi. Buno bubinebine budi mu Bible. Kuyuka buno bubinebine kubwanya kwitukwasha tunañune bintu bine bidi na mvubu mikatampe ne bintu bya bitupu. Kuleka bubinebine bwa mu Bible buludike butyibi ne bilongwa byetu kuketutwala ku būmi budi na kitungo.Luka 11:28.

Tala ne Nkindi 3:5, 6, 13-18 ne 1 Temote 6:9, 10.

 Tubabandaula’tu mu kīpi malondololo aleta Bible ku bipangujo bisamba. Le usaka kuyukila’ko malondololo makwabo? Shi ubadilwanga mu “bakulandapala pa mutyima,” bine ukasaka’o. Padi wiipangulanga bipangujo bikwabo pamo bwa bino: ‘Shi Leza witutele mutyima, mwanda waka i muleke bibi ne masusu mavule uno muswelo umbula bwa myaka? I muswelo’ka onkokeja kulumbulula būmi bwa kyami kisaka?’ Bible uletanga malondololo mafike’po, kadi asangaja ku bino bipangujo, ne ku bikwabo bivule bine.

Inoko dyalelo bavule bapelanga kwifunda Bible. Bamonanga Bible bu kitabo kikatampe kadi kikomo kwivwanija. Le usakanga bukwashi mwa kutanina malondololo mu Bible? Batumoni ba Yehova bakokeja kukukwasha mu miswelo ibidi.

Muswelo umbajinji i kukupa dibuku Lelo I Bika Bine Bifundija Bible? Dino dibuku didi na kitungo kya kukwasha boba kebadipo na kyaba babandaule malondololo aleta Bible ku mepangujo a mvubu mikatampe. Muswelo wa bubidi i kukwata mpangiko ya kwifunda nobe Bible ku bitupu. Kamoni wa Yehova umo wa bwino udi pabwipi nobe ubwanya kukufikila kwinjibo nansha pa kifuko kyosaka mwanda wa kubandaula Bible pamo nobe mu kitatyi kityetye’tu ku yenga ne yenga, kwampikwa kufuta. Midiyo ne midiyo ya bantu bamwenanga kala byabuyabuya mu ino mpangiko. Bavule i bafule ku kunena na nsangaji amba: “Natana bubinebine!”

I kutupu kintu kilēme kutabuka bubinebine. Mwanda bubinebine bwa mu Bible bwitukūlanga ku kabutyibutyi, ku kavutakanya, ne ku moyo wampikwa kwendela’mo. Kadi bwitupanga lukulupilo, kitungo, ne ndoe. Yesu wānene amba: “Mukayūkidijanga bya bu-binebine, nabyo bikemukūlanga ke mudi bāna-pabo.”Yoano 8:32.