Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 KIFUNDWA 13

Temote Wādi Usaka Kukwasha Bantu

Temote Wādi Usaka Kukwasha Bantu

Temote i nsongwalume wādi usenswe kukwasha bantu. Wādi wenda ku bibundi bivule kukakwasha bantu. Kino kyāmuvudijije nsangaji mu būmi. Le usaka kuyuka mobyāikadile?—

Inandya Temote ne nkambo wandi bāmufundije myanda ya Yehova

Temote wātamīne mu kibundi kya Lesetala. Paākidi mwanuke, nkambo wandi Loisa ne inandi Yunisa bāshilwile kumufundija myanda ya Yehova. Temote nandi paādi utama, wādi usaka kukwasha bakwabo bayuke myanda ya Yehova.

Temote paādi ukidi nkasampe, Polo wāmwipangwile shi ubwanya kukasapula nandi ne kukwabo. Temote nandi’mba: ‘Biyampe!’ Wāitabije kwenda mwanda wa kukakwasha bakwabo.

 Temote wāendele na Polo ku kibundi kya Tesalonika mu ntanda ya Masedonia. Pa kufika’ko, bādi bidi ba kwenda lwendo lulampe lwanshi, kupwa lwa bwato. Abo pa kufika, bākweshe bantu bavule bayuke Yehova. Ino bamo bebālobēle, bākimba’nka ne kwibasanshija. O mwanda Polo ne Temote bātalukile bakasapula kukwabo.

Temote wādi na būmi bwa nsangaji kadi buyampe

Pāpita’tu myeji, Polo wānena Temote ajokele ku Tesalonika akatale mwikadile banabetu. Byādi bilomba kininga pa kujokela mu kino kibundi mwādi kyaka nenki! Ino Temote wāendele’mo mwanda wādi na mutyima kūlu pa mwikadile banabetu bādi’ko. Ino aye pa kujoka wāletele lapolo miyampe kudi Polo. Banabetu mu Tesalonika bādi bendelela biyampe!

Temote wāingile na Polo myaka mivule. Kadi Polo wālembele’mba Temote wādi muntu muyampe mpata waādi ubwanya kutuma akwashe bipwilo. Temote wādi usenswe Yehova ne bantu bakwabo.

Le nobe usenswe bantu, kadi usakanga kwibakwasha bayuke Yehova?— Shi ulonge namino, ukekala na būmi bwa nsangaji kadi buyampe na bwādi na Temote!

TANGA MU OBE BIBLE

  • 2 Temote 1:5; 3:15

  • Bilongwa 16:1-5; 17:1-10

  • 1 Tesalonika 3:2-7

  • Fidipai 2:19-22