Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 KIFUNDWA 12

Mwipwa wa Polo Wādi na Kininga

Mwipwa wa Polo Wādi na Kininga

Twisambilei bidi pa nsongwalume umo wāpandije muyomba wandi. Muyomba wa uno nsongwalume i mutumibwa Polo. Dijina dya uno nsongwalume ketwidiyukilepo, ino kyotuyukile’tu i amba wālongele kintu kimo kilombola’mba udi bine na kininga. Le ukimba kwivwana byaālongele?—

Polo wādi mu buloko mu Yelusalema. Wākutyilwe mwanda wādi usapula myanda ya Yesu. Bantu bamo babi bāshikilwe Polo, o mwanda bāmukutyīle kitumba kibi. Ke banena’mba: ‘Tulombei komanda wa basola atume basola bandi bakatwale Polo mu kidye. Batwe tukafyame mwishinda, ebiya Polo pasa kupita, kala tumwipaye!’

Mwipwa wa Polo usokwela Polo ne komanda wa basola nkuku mibi ikutyilwe

Mwipwa wa Polo wāivwene pādi pakwatwa kino kitumba. Le wālongele’po namani? Wāenda ku buloko kukasapwila’mo Polo. Ponka’po Polo wāmunena akasapwile komanda myanda ya kino kitumba kibi. Le ulanga byādi bipēla kudi mwipwa wa Polo kukasapwila komanda?— Mhm, mwanda komanda wādi muntu utyinwa. Ino mwipwa wa Polo wādi na kininga, wāenda kukesamba na komanda.

Kepāijijepo, komanda wālonga’po kintu. Wābunga basola kubwipi kwa 500 bakukinga Polo! Wēbalombola bakatwale Polo ku Kesalea’nka bufuku’bwa. Lelo Polo wāpandile?— En-en, bantu babi’ba kebābwenyepo nansha dimo kumukwata! Kitumba kyabo kyākankelwe.

Le i bika byowefunda ku luno lusango?— Nobe ubwanya kwikala na kininga pamo bwa mwipwa wa Polo. Tufwaninwe kwikala na kininga potusapwila bakwetu myanda ya Yehova. Le nobe ukekala na kininga ne kwisambila nyeke padi Yehova?— Shi ulonge namino, ukabwanya kupandija muntu.