Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 KIFUNDWA 4

Wāsangeje Shandi ne Yehova Mwine

Wāsangeje Shandi ne Yehova Mwine

I mulao’ka ulaa Yefeta kudi Yehova?

Byadi bikomo, ino mwanā Yefeta walongele byalaile shandi

Le ubamone nsongwakaji udi pa kifwatulo’pa?— I mwana wa Yefeta. Bible ketutelēlepo dijina dya uno nsongwakaji, ino kyotuyukile’tu i amba wāsangeje shandi ne Yehova mwine. Leka tulonde pano lusango lwandi ne lwa shandi Yefeta.

Yefeta wādi muntu muyampe wādi upityija kitatyi kilampe mu kufundija wandi mwana myanda ya Yehova. Kadi wādi nkanka ne mwendeji muyampe. Difuku dimo, bene Isalela bāmunena ebaludike pobākalwile na balwana nabo.

Yefeta wālombele Leza amukwashe anekenye bulwi. Wātyipa mutyipo kudi Yehova amba shi anekenye, ukamupa muntu mubajinji wa mu yandi njibo ukāya kumutundaila pakajoka ku bulwi. Uno muntu ukekala ku tabenakulo ya  Leza mwanda wa kumwingidila mu būmi bwandi bonso. Tabenakulo kyādi kifuko kwādi bantu mwanda wa kutōta Leza mu oa mafuku. Na bya dyese, Yefeta wāshinda divita! Le uyukile muntu mubajinji wa mu yandi njibo wāile kumutundaila paājokēle ku njibo?—

I mwanā Yefeta mwana-mukaji! Wādi wandi mwana umo enka, ino pano Yefeta ufwaninwe’nka kumutuma. Ino wāimvwene bulanda. Ino vuluka amba, kemupwe kala kutyipa mutyipo. Enka penepa, wandi mwana wamunena’mba: ‘Tata, wimutyipe mutyipo kudi Yehova, nanshi fikidija’o.’

Mwaka ne mwaka, balunda na mwanā Yefeta bādi bakamupempula

Uno mwanā Yefeta nandi wākwetwe bulanda. Ku tabenakulo kādipo wa kusongwa nansha kubutula kwine. Ino aye wādi’nka na mutyima wa kufikidija bidi mulao wa shandi ne kusangaja Yehova. Kino kyādi na mvubu kwadi kupita’ko kusongwa ne kubutula bana. O mwanda wāvilukile kwabo ne kukashikata ku tabenakulo mafuku onso a būmi bwandi.

Le bine ulanga’mba byaālongele byāsangeje shandi ne Yehova?— En-en, byēbasangeje! Abe nobe shi ukōkele Yehova ne kumusanswa, ubwanya kwikala pamo bwa mwana wa Yefeta mwana-mukaji. Nobe ukasangaja bambutwile bobe ne Yehova kumo.