Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 KIFUNDWA 6

Davida Kādipo na Moyo

Davida Kādipo na Moyo

Lelo shi ubaivwana moyo wikalanga ulonga bika?— Padi unyemenanga kudi inobe nansha shobe bakukwashe. Ino kudi muntu mukwabo ubwanya kukukwasha nobe. Aye udi na bukomo kupita bantu bonso. Le umuyukile?— En-en, i Yehova Leza. Twisambile bidi pa lusango lwa Davida, nkasampe umo utelelwe mu Bible. Wādi uyukile amba Yehova ukamukwasha nyeke, o mwanda kādipo na moyo.

Davida paākidi mwanuke, bambutwile bandi bāmufundije kusanswa Yehova. Kino kyākweshe Davida aleke kwikala na moyo nansha shi kubalongeka kintu kilenga moyo. Wādi uyukile amba Yehova i Mulunda nandi kadi ukamukwasha. Kitatyi kimo, paādi ulama mikōko, ntambo mwine yao waiya wasuma mukōko kaenda nao! Le uyukile byālongele’po Davida? Wāpanga ntambo lubilo, ne mobimwekela wāmwipaile na andi makasa! Kadi kitatyi kyāile uluse wakwata mukōko, Davida wāmwipaile! Le ulanga i ani wākweshe Davida?— I Yehova.

Kudi kadi ne kitatyi kikwabo kyālombwele Davida amba binebine kādipo na moyo. Bene Isalela bādi balwa na bantu ba mu ntanda ya Fidishitia. Sola umo mwine Fidishitia wādi mulampe, kampangala! Dijina dyandi i Ngodiata. Uno kampangala wādi upunika bene Isalela ne Yehova mwine. Ngodiata wāita na kipuni basola bene Isalela bāye balwe nandi. Ino bene Isalela bonso bādi na moyo wa kulwa nandi. Penepa Davida pa kwivwana uno mwanda, wāmulombola Ngodiata amba: ‘Nsa kulwa nobe! Yehova usa kunkwasha, ne kadi nsa kukushinda!’ Le nobe ubamone amba Davida kādipo na moyo?— Bine, kādipo nao. Le usaka kuyuka byālondele’po?

Davida wāsela topito ne mabwe atano asenena, kupwa wāenda kukalwa na kampangala. Ngodiata pa kumona Davida butye, wāmupunika. Ino Davida wāmunena’mba: ‘Abe wiya ko ndi ne kipete, ino ami nanshi ngiya kodi mu dijina dya  Yehova!’ Penepa wāela dibwe mu topito, wāenda lubilo kudi Ngodiata ne kumwasa’dyo. Dibwe dyamwasa’nka pa bukata bwa meso! Kampangala wāpona ne kufwa wafwa! Bene Fidishitia bazambalala, ne kwisakuna lubilo. Le mwanuke mutyetye bwa Davida wābwenye’tu namani kushinda kampangala?— Yehova wāmukweshe, kadi Yehova wādi nkomonkomo kutabuka uno kampangala!

Davida kādipo na moyo mwanda wādi uyukile amba Yehova usa kumukwasha

Le i bika byowefunda ku lusango lwa Davida?— Yehova udi na bukomo kupita muntu ye-yense. Kadi aye i Mulunda nobe. Shi difuku dimo ubaivwana moyo, vuluka’mba Yehova ukakukwasha wikale wambulwa moyo!