Enda ku bidi'mo

Batumoni ba Yehova

Tonga Ludimi Kiluba

Bulombodi bwa Kupwila kwa Būmi ne Mwingilo Wetu wa Bwine Kidishitu

Bulombodi bwa Kupwila kwa Būmi ne Mwingilo Wetu wa Bwine Kidishitu

Kifunka

 

Musango

Binenwa bya Ñanjilo

 2

Byabulēme bya mu Kinenwa kya Leza

 3

Wiibidije Mwa Kusapwila

 4

Būmi bwa Bene Kidishitu

 5

Binenwa bya Mfulo

 6

Wielele’ko Kutanga ne Kufundija

 7

Madingi

 8

Kitatyi

 9

Bupempudi bwa Mutadi wa Kipindi

 10

Yenga wa Kitango

 11

Yenga wa Kivulukilo

 12

Mutadi wa Kupwila kwa Būmi ne Mwingilo

 13

Mwimaniji wa Kupwila kwa Būmi ne Mwingilo

 14

Mukwatakani wa Kitango kya Bakulumpe

 15

Mudingidi Mukwashi

 16

Tulasa Tukwabo

 17

Mavideo

 18

1. Kupwila kwa Būmi ne Mwingilo kukapityijibwa mungya mpangiko idi mu Kabuku ka ku Kupwila Būmi ne Mwingilo ne mungya bulombodi bulonda’ko’bu. Basapudi bonso bafwaninwe kukankamikwa kupityija bipindi bya bana ba masomo. Bantu bakwabo bapwilanga netu kyaba kyonso babwanya kupita’ko shi betabije bufundiji bwa mu Bible ne kukwatañanya būmi bwabo na misoñanya ya bwine Kidishitu.—be p. 282.

 2. Binenwa bya Ñanjilo: Minite 3 ne kwika. Yenga ne yenga, shi lwimbo ne milombelo bibafule, mwimaniji wa Kupwila kwa Būmi ne Mwingilo ukalangula kyumwa kya bantu kya kwivwana mpangiko ilonda’ko, ne kwisambila pa kipangujo kimo kidi ku Papye wa Malondololo a ku Kupwila kwa Būmi ne Mwingilo Wetu wa Bwine Kidishitu.

 3. Byabulēme bya mu Kinenwa kya Leza:

  • Mwisambo: Minite 10. Uno i mutwe wa mwanda ne myanda mikatampe ibidi nansha isatu bidi mu Kabuku ka ku Kupwila Būmi ne Mwingilo. Uno mwisambo ukapebwa mukulumpe nansha mwingidi wa mingilo wa bwino. Shi ku mpangiko ya butangi bwa Bible bwa mu yenga kushilula na mukanda mupya wa mu Bible, mukashilula na kutala video ya mwine mukanda’wa. Muneni ukokeja kukwatañanya myanda ya mu video na mutwe wa mwanda. Inoko, kafwaninwepo kwilwa kwisambila pa myanda itelelwe mu kabuku. Ne kadi, shi kukidi kitatyi, ukengidija bifwatulo ne myanda ya mu Bisonekwa idi mu kabuku, bine bilupwilwe mwanda wa kubweja milangwe pa mwanda wisambilwa’po.

  • Kukola Byabupeta bya ku Mushipiditu: Minite 8. Kano i kakipindi ka bipangujo ne malondololo ka kubulwa ntwelelo nansha mvuyo. Kakapityijibwa na mukulumpe nansha  mwingidi wa mingilo wa bwino. Muneni ukokeja kutonga kwabanya kitatyi ku myanda iná’ya kukwatañana na mvubu yayo ku kipwilo kyenu. Inoko ukepangula bevwaniki bipangujo byonso. Kadi ukatala shi bilomba nansha kebilombepo kutanga mavese onso atelelwe mu bipangujo bibidi bibajinji. Boba bapebwa kunena bakalondolola mu masekonde 30 ne kwika.

  • Butangi bwa Bible: Minite 4 ne kwika. Kino kipindi kya bana ba masomo kikapebwa tutu. Mwanā masomo ukatanga myanda imupelwe pampikwa ntwelelo nansha mvuyo. Mwimaniji wa kupwila ukata nakampata mutyima ku kukwasha bana ba masomo batange pambulwa kilubo, bivwanikwa biyampe, kwampikwa kushishikita, kukoma buluji senene, muleulwilo wa diwi, kwitūkija kufwaninwe, ne kunena munenenwanga.

  4. Wiibidije Mwa Kusapwila: Minite 15 ne kwika. Kitungo kya kino kipindi i kupa bonso mukenga wa kwiibidija mwingilo ne kulumbulula manwa abo a kusapula ne kufundija. Bana ba masomo bakasela bipindi bya kwitana kubajinji ne kujokela’mo ku misapwilo idi pa paje 1 wa Kabuku ka ku Kupwila Būmi ne Mwingilo. Basapudi bakokeja kutonga kwisambila nansha kuleka kwisambila pa dibuku nansha pa video ya mu Bingidilwa Byetu bya Kufundija Nabyo. Kyaba kimo, Kabuku ka ku Kupwila Būmi ne Mwingilo kakalombola kitatyi ne bulombodi bukwabo pa bipindi bya bana ba masomo. Bana ba masomo kebafwaninwepo kubweja’ko myanda mikwabo mwanda’tu wa kubwanya kitatyi kibapelwe. Bya kumwena’ko bimo biteakanibwe senene bibwanya kupwa kukishele munite umo nansha ne kupita. Bakulumpe nabo bakokeja kupebwa bipindi bya bana ba masomo ponso pobimweka’mba bidi na mvubu.

  • Mavideo a Misapwilo ya Kulondela’po: Kweji ne kweji, tukatala ne kwisambila mu mayenga malondakane pa mavideo a misapwilo ya kulondela’po. Ano mavideo akalombola myanda ya mu kwitana kubajinji, kujokela’mo kubajinji, ne kujokela’mo kwa bubidi. Kano kakipindi kakapityijibwa na mwimaniji wa Kupwila kwa Būmi ne Mwingilo.

  • Kwitana Kubajinji: Kino kipindi kya bana ba masomo kikapebwa tutu nansha kaka. Bene bapityija kino kipindi bafwaninwe kwikala mwana-mulume na mwana-mulume, mwana-mukaji nandi na mwana-mukaji; bakeshila shi enka i ba mu kisaka kimo. Mwanā masomo ne mwisambi nandi bakokeja kushikata nansha kwimana. Mwanā masomo ukatonga lwimu mungya mwiimwinwanga kwabo. Mīsambo yabo ikemanina pa musapwilo wa kulondela’po.

  • Kujokela’mo Kubajinji: Kino kipindi kya bana ba masomo kikapebwa tutu nansha kaka. Bene bapityija kino kipindi bafwaninwe kwikala mwana-mulume na mwana-mulume, mwana-mukaji nandi na mwana-mukaji. (km 6/97 p. 2) Mwanā masomo ne mwisambi nandi bakokeja kushikata nansha kwimana. Mwanā masomo ukalombola myanda ya kunena kitatyi kyotujokela muntu wasangedile musapu mu kwitana kubajinji. Mīsambo yabo ikemanina pa musapwilo wa kulondela’po udi mu Kabuku ka ku Kupwila Būmi ne Mwingilo.

  • Kujokela’mo kwa Bubidi: Kino kipindi kya bana ba masomo kikapebwa tutu nansha kaka. Bene bapityija kino kipindi bafwaninwe kwikala mwana-mulume na mwana-mulume, mwana-mukaji nandi na mwana-mukaji. (km 6/97 p. 2) Mwanā masomo ne mwisambi nandi bakokeja kushikata nansha kwimana. Mwanā masomo ukalombola myanda ya kunena kitatyi kyotujokela muntu wasangedile musapu mu kujokela’mo kubajinji. Mīsambo yabo ikemanina pa musapwilo wa kulondela’po.

  • Kifundwa kya Bible: Kino kipindi kya bana ba masomo kikapebwa tutu nansha kaka. Bene bapityija kino kipindi bafwaninwe kwikala mwana-mulume na mwana-mulume,  mwana-mukaji nandi na mwana-mukaji. (km 6/97 p. 2) Mwanā masomo ne mwisambi nandi bakokeja kushikata nansha kwimana. Kino kipindi i kya kumwena’ko kya kifundwa kya Bible kyendejibwa kala. Kebilombepo kwikale ntwelelo nansha mvuyo poso enka shi ye kifundwa kya kudingidila’po mwanā masomo. Kebidipo na mvubu kutanga na diwi ditunduke misango yonso idi mu kipindi kyopityija, nansha byobwanya kulonga kino. I biyampe kulupwila patōka bwino bwa mwa kufundijija.

  • Mwisambo: Kino kipindi kya bana ba masomo kikapebwa tutu kadi kikanenwa bu mwisambo ku meso a kipwilo.

  5. Būmi bwa Bene Kidishitu: Pa kupwa kwimba lwimbo, minite 15 mibajinji ya kino kipindi ikekala na kakipindi kamo nansha tubidi tukwasha bevwaniki bengidije Kinenwa kya Leza mu būmi bwabo. Tuno tubipindi tukapebwa bakulumpe nansha bengidi ba mingilo ba bwino, poso’nka popa palombwelwe muswelo mukwabo, ino shi i bisakibwa bya penu, bikapebwa’nka mukulumpe kete.

  • Kifundwa kya Bible kya Kipwilo: Minite 30. Kino kipindi kikapebwa mukulumpe wa bwino. (Kokwa kudi bakulumpe batyetye, bengidi ba mingilo ba bwino babwanya kwingidijibwa.) Kitango kya bakulumpe kifwaninwe kutonga boba babwenye bisakibwa bya kwendeja Kifundwa kya Bible kya Kipwilo. Boba bakatongwa bafwaninwe kubwanya kwendeja’kyo mu muswelo mufwaninwe mwanda wa kulama kitatyi kitungīlwe kifundwa, ne kukomeneja bisonekwa bikatampe, ne kukwasha muntu ense utanwa’ko amone biyampe kamweno ka myanda ibandaulwa’ya. Babwanya kutana misoñanya ya kwibakwasha mu bulombodi bulupwilwe bwa mwa kwendejeja Kifundwa kya Kiteba kya Mulami. Shi bibwanika, i biyampe kwikale mwendeji ungi ne mutangi ungi yenga ne yenga. Shi mwimaniji wa Kupwila kwa Būmi ne Mwingilo walombe kwipipija kifundwa, nabya mwendeji ukatala muswelo wa kwipipija’kyo. Ubwanya kutonga kuleka kutangija misango imo.

  6. Binenwa bya Mfulo: Minite 3 ne kwika. Mwimaniji wa Kupwila kwa Būmi ne Mwingilo ukavuluja milangwe mikatampe ya mvubu mu byefundwa ku kupwila, kubadila’mo ne kipangujo ne malondololo adi pa Papye wa Malondololo a ku Kupwila kwa Būmi ne Mwingilo. Kadi ukalaa bya mu yenga wiya’ko, padi na kutanga kipangujo kikalondololwa. Shi kukidi kitatyi, ubwanya kutela majina a bana ba masomo bakapityija bipindi yenga wiya’ko. Poso’nka kilombwelwe muswelo mukwabo, mwimaniji ye ukatanga misapu ya mvubu nansha kutangila kipwilo mikanda ya mvubu mu binenwa byandi bya mfulo. Misapu ya kyaba ne kyaba, pamo bwa ya mpangiko ya busapudi ne bukundwe, keifwaninwepo kutangwa ku lukala ino ikalamikwa ku tabulo wa misapu. Shi mwimaniji kadipo na kitatyi kya kuvuya misapu nansha kutanga mikanda mu binenwa byandi bya mfulo, nabya ukalomba batutu badi na tubipindi mu kipindi kya Būmi bwa Bene Kidishitu bepipije tubipindi twabo shi bikokejika. (Tala  musango 5 ne  9.) Kupwila kukafula na lwimbo ne milombelo.

 7. Wielele’ko Kutanga ne Kufundija: Kushilwila mu yenga wa mafuku 7 Kweji 1, 2019, mwimaniji wa Kupwila kwa Būmi ne Mwingilo ukengidija boloshile Kutanga ne Kufundija mwanda wa kufwija’ko bana ba masomo ne kwibadingila. Mwanā masomo ense ukengidila pa kifundwa kidi mu tuboko kupwa kwa kipindi kimupelwe pa Kabuku ka ku Kupwila Būmi ne Mwingilo. Mu yenga mubajinji wa kweji ne kweji, mwimaniji wa Kupwila kwa Būmi ne Mwingilo ukabandaula na bevwaniki kifundwa kimo kya boloshile Kutanga ne Kufundija. Kipindi kya boloshile “Lemba Muswelo Oendelela” i kilupulwe mwanda wa mwanā masomo alembe’mo, ke mwimanijipo wa kulemba’mo.

  8. Madingi: Kupwa kwa kipindi ne kipindi kya bana ba masomo, mwimaniji wa Kupwila kwa Būmi ne Mwingilo ukafwija’ko ne kudingila mwanā masomo kintu kya munite umo mu boloshile Kutanga ne Kufundija. Mwimaniji kakatelapo mwanda wa kudingidila’po mwanā masomo pamwita. Inoko,  shi mwanā masomo wapu kipindi kyandi, mwimaniji ukamufwija’ko, kupwa ukatela mwanda wadi unenwe kumudingidilwa’po, kadi ukalombola pawaingila biyampe ne kumushintulwila na kanye popa pafwaninwe kuta mutyima mu kine kifundwa’kya. Mwimaniji ubwanya ne kwisambila pa myanda mikwabo ya mu kya kumwena’ko shi wamone amba ibwanya kukwasha mwanā masomo nansha bevwaniki. Shi kupwila kubapu nansha kitatyi kikwabo, madingi makwabo ōbaka a mu boloshile Kutanga ne Kufundija nansha a mu dibuku Masomo a Mwingilo akokeja kupebwa mwanā masomo pafula pa mwanda waadi utadilwa’po nansha pa mwanda mukwabo.—Pa kuyukila’ko bivule, tala  musango 13 ne  16 mulombwelwe mwingilo wa mutadi wa Kupwila kwa Būmi ne Mwingilo ne mwingilo wa mudingidi mukwashi.

    9. Kitatyi: I kutupu wa kudya kitatyi, nansha ke mwimaniji wa ku Kupwila kwa Būmi ne Mwingilo mwine paleta madingi. Shi mwanā masomo wapityija kitatyi ukemikwa na bwino. Shi ba tupindi tukwabo abadinga kitatyi, mudingidi mukwashi ukebadingidila pafula. Kupwila konso, ne ñimbo ne milombelo, i nsá imo ne minite 45.

 10. Bupempudi bwa Mutadi wa Kipindi: Shi kipwilo kidi na bupempudi bwa mutadi wa kipindi, mpangiko ikapita’nka munenenwe mu Kabuku ka ku Kupwila Būmi ne Mwingilo, bikeshila enka pa bino: Kifundwa kya Bible kya Kipwilo kya mu kipindi Būmi bwa Bene Kidishitu kikapingakanibwa na mwisambo wa mingilo wa minite 30 ukanenwa na mutadi wa kipindi. Kumeso kwa mwisambo wa mingilo, mwimaniji wa Kupwila kwa Būmi ne Mwingilo ukapituluka mu kīpi mu byefundwa ku kupwila kufika pene’pa ne kulaa bya mu yenga wiya’ko, ne kunena misapu ya mvubu ne kutanga mikanda ya mvubu, ebiya kaite mutadi wa kipindi. Shi mwisambo wa mingilo ubapu, mutadi wa kipindi ukavuya kupwila na lwimbo lwatongele. Kekukekalapo tulasa tukwabo twa mu ludimi lwa kipwilo mu yenga wa bupempudi bwa mutadi wa kipindi. Kisumpi kya ludimi lweni kibwanya kupwila nansha shi mutadi wa kipindi upempula kipwilo kitala kisumpi’kya. Inoko, kisumpi’kya kikelunga na kipwilo kitatyi kya mwisambo wa mingilo wa mutadi wa kipindi.

 11. Yenga wa Kitango: Yenga omudi na kitango kya kipindi nansha kya ntanda, kekukekalapo kupwila kwa pa kipwilo nansha kumo. Muntu ne muntu nansha kisaka ne kisaka kikabandaula myanda ya ku kupwila kwa mu mwine yenga’wa.

 12. Yenga wa Kivulukilo: Shi Kivulukilo kibaponena mu difuku dya kupwila kwa mu yenga, Kupwila kwa Būmi ne Mwingilo kekukekala’kopo. Inoko, kupwila kwa kwenda mu busapudi kukekala’ko mu difuku dya Kivulukilo.

  13. Mutadi wa Kupwila kwa Būmi ne Mwingilo: Kitango kya bakulumpe kikatonga mukulumpe umo wa kwingila bu mutadi wa Kupwila kwa Būmi ne Mwingilo. Uno tutu udi na kiselwa kya kupangika biyampe kuno kupwila ne kutala shi kupitanga mungya buno bulombodi. Ufwaninwe nyeke kwisambila pamo biyampe na mudingidi mukwashi. Enka pomukitambulatambula Kabuku ka ku Kupwila Būmi ne Mwingilo ka kweji kampanda, mutadi wa Kupwila kwa Būmi ne Mwingilo ukabila bana ba masomo bipindi bya kweji’wa. (Tala  musango 4.) Kipindi ne kipindi kya bana ba masomo, ne myanda ya kwibadingidila’po, bikapānwa kumeso kwa kitatyi, mafuku matyetye i mayenga asatu kumeso kwa difuku dikapityija mwanā masomo kipindi, ukebapa’kyo kupityila ku fomu Kipindi kya ku Kupwila kwa Būmi ne Mwingilo Wetu wa Bwine Kidishitu (S-89).

 14. Mwimaniji wa Kupwila kwa Būmi ne Mwingilo: Yenga ne yenga, mukulumpe umo ukemanina Kupwila kwa Būmi ne Mwingilo konso. (Kokwa kudi bakulumpe batyetye, bengidi ba mingilo ba bwino babwanya kwingidijibwa.) I aye ukateakanya binenwa bya ñanjilo ne bya mfulo ne kwisambila pa mavideo onso a misapwilo ya kulondela’po ne mavideo a ntwelelo ya kifundwa kya  mu boloshile Kutanga ne Kufundija. Uketa bapityija bipindi byonso, kadi kukwatañana na bungi bwa bakulumpe, nandi ukokeja kupityija bipindi bikwabo bya ku kupwila. Binenwa bya kutundulukila ku kakipindi kakwabo bifwaninwe kwikala bīpi bininge. Kitango kya bakulumpe kikatonga bakulumpe babwenye bisakibwa ba kwingila uno mwingilo wa bu mwimaniji. Bakulumpe ba bwino batongelwe’ba bakekala bemaniji mu bitatyi mu bitatyi. Mungya ngikadilo yomudi’mo, mutadi wa Kupwila kwa Būmi ne Mwingilo ukokeja kwingila bu mwimaniji divule kupita bakulumpe bakwabo ba bwino. Mukulumpe yense ubwenye bisakibwa bya kwendeja Kifundwa kya Bible kya Kipwilo, i mubwanye padi ne bisakibwa bya kwikala mwimaniji wa kupwila. Inoko, yukai’mba, mwingilo wa mwimaniji ulomba ne kufwija’ko bonso na buswe ne kupa bana ba masomo badi na bipindi madingi. Kadi i aye ufwaninwe kuta mutyima amba kupwila kupwe pa nsá mitungwe. (Tala  musango 6 ne  9.) Shi mwimaniji uswile ne shi ku lukala kudi kyaba, kukabwejibwa mikolo mikwabo ya bwimwa yakengidija pa kwita boba bapityija bipindi kitatyi kyobemana ku mikolo idi ku kineneno. Ne kadi, shi mwimaniji uswile, ukokeja kushikata ku lukala dya ku meza kitatyi kya Butangi bwa Bible ne mu kipindi Wiibidije Mwa Kusapwila. Kulonga namino kukakūla kitatyi.

 15. Mukwatakani wa Kitango kya Bakulumpe: Mukwatakani wa kitango kya bakulumpe ukabanya bipindi byonso bya kupwila, kutalula’mo enka bya bana ba masomo. Ukatonga ne bemaniji ba kupwila kwa yenga ne yenga mu boba batongelwe na kitango kya bakulumpe. Ukengidila pamo na mutadi wa Kupwila kwa Būmi ne Mwingilo, ne kadi mukwatakani wa kitango kya bakulumpe ukata mutyima wa kulamika mpangiko ya kupwila konso ku tabulo wa misapu.

  16. Mudingidi Mukwashi: Shi bikokejika, mukulumpe ukapebwa uno mwingilo ufwaninwe kwikala muneni upotolwele kunena. Kiselwa kya mudingidi mukwashi i kudingila bakulumpe ne bengidi ba mingilo pafula shi i kyendele’mo, pobapityija bipindi kampanda, ekale i ku Kupwila kwa Būmi ne Mwingilo, mīsambo ya bantu bonso, kwendeja nansha kutanga Kiteba kya Mulami, nansha Kifundwa kya Bible kya Kipwilo. (Tala  musango 9.) Shi pa kipwilo padi bakulumpe bavule baneni kadi bafundiji ba bwino, nabya mwaka ne mwaka mukashinta mudingidi mukwashi. Kebilombepo mudingidi mukwashi kudingila batutu kupwa kwa kipindi ne kipindi.

 17. Tulasa Tukwabo: Bipwilo bikokeja kutūla’ko tulasa tukwabo shi kudi bana ba masomo bavule. Kalasa ne kalasa kafwaninwe kwikala na mudingidi wa bwino, nakampata mukulumpe. Inoko shi i kyendele’mo, mukokeja kwingidija mwingidi wa mingilo wa bwino. Kitango kya bakulumpe kikatonga yewa wa kwingila uno mwingilo ne kukwata butyibi shi bakeshinta nansha kuleka kwishinta uno mwingilo. Mudingidi ufwaninwe kulonda bulombodi budi mu  musango 8. Shi mudi na tulasa tukwabo, bana ba masomo bakenda’mo kupwa’tu kwa kakipindi Kukola Byabupeta bya ku Mushipiditu, ka mu kipindi Byabulēme bya mu Kinenwa kya Leza. Bakajokela mudi bantu bonso pa kupwa kwa kipindi kya ku kupwila Wiibidije Mwa Kusapwila. Shi mwisambila pa video, boba badi mu kalasa kakwabo nabo bafwaninwe, shi bibwanika, kumona nansha kwivwana mīsambo abo papo bekele mu kyumba kikwabo. Shi bitupu, mudingidi ukatadija video ku kingidilwa kiselwa ku makasa ne kwisambila’po.

 18. Mavideo: Kukekala mavideo matongwe kala a kutadija ku kuno kupwila. Mavideo a kupwila kwa mu bukata bwa yenga akatūlwa mu JW Library kadi abwanya kutadilwa mu bingidilwa bishileshile. Pakwabo, mavideo alombola misapwilo ya kulondela’po akokeja kutalwa ku kupwila kwa kwenda mu busapudi shi ke mapwe kala kulombolwa ku Kupwila kwa Būmi ne Mwingilo.