Zekadia 2:1-13

  • Kimonwa 3: Muntu umo na lukamba lwa kupima nalo (1-13)

    • Yelusalema ukapimwa (2)

    • Yehova, “lubumbu lwa mudilo konsokonso” (5)

    • Kutenga nkishi wa mu diso dya Leza (8)

    • Mizo mivule ikelunga kudi Yehova (11)

2  Kadi natala, namona muntu umo na lukamba lwa kupima nalo+ mu kuboko kwandi.  Penepo naipangula’mba: “Le wendanga kwepi?” Nandi walondolola’mba: “Kukapima Yelusalema, amba ndyuke bunkimbwa bwandi ne bula bwandi.”+  Ino tala! mwikeulu wadi wisamba nami waenda, kadi mwikeulu mukwabo waiya kumusambakana.  Penepo wamunena’mba: “Enda’ko lubilo ukasapwile yewa nsongwalume amba, ‘“Mu Yelusalema mukekalwa+ bu ntanda ya mikenza yampikwa kukingwa,* pa mwanda wa bantu bonso ne bimunanwa bidi’mo.+  Kadi amiwa nkamwikadila,” i Yehova unena, “bu lubumbu lwa mudilo konsokonso,+ kadi nkekalanga ntumbo mu bukata mwandi.”’”+  “Iyai! Iyai! Nyemai ku ntanda ya kungala,”+ i Yehova unena. “Mwanda nemupalakenya ku mvula iná ya mūlu,”+ i Yehova unena.  “A Ziona, iya! Wipandije, abe wikele na mwanā Babiloni mwana-mukaji.+  Mwanda Yehova wa bibumbo, mwine wantuma ku mizo yadi imutūta+ pa kupwa kutumbijibwa,* wanena namino amba: ‘Yewa ense wimutenga, uteñanga nkishi wa mu diso dyami.*+  Mwanda pano nkebabeleñenya kuboko kwami, kadi bakekala ke kitūtwa kya bapika babo.’+ Kadi bine mukayuka’mba Yehova wa bibumbo wantumine. 10  “A mwanā Ziona mwana-mukaji,+ ela nsadi ya tusepo; mwanda yao ngiya,+ kadi nkekala mu bukata mobe,”+ i Yehova unena. 11  “Mizo mivule ikelunga kudi Yehova mu dyodya difuku,+ kadi bakekala bantu bami; nami nkekala mu bukata mobe.” Penepo mukayuka’mba Yehova wa bibumbo wantumine komudi. 12  Yehova ukayata Yuda ke kipindi kyandi pa ntanda ijila, kadi ukatonga Yelusalema monka.+ 13  A ngitu yonso,* ikala talala nyā ku meso a Yehova, mwanda usa kulonga’po kintu tamba ku kīkalo kyandi kijila.

Kunshi kwa Dyani

Ko kunena’mba, yampikwa mumbu ya kwiijika.
Kishima pa kishima i, “pa kupwa ntumbo.”
Nansha’mba “uteñanga diso dyami.”
Nansha’mba “bantu bonso.”