Yoshua 9:1-27

  • Bene Ngibeone ba budyumuku bakimba ndoe (1-15)

  • Budimbidimbi bwa bene Ngibeone bubasokoka (16-21)

  • Bene Ngibeone ba kutyaba nkuni ne kuteka mema (22-27)

9  Balopwe bonso ba bukila bwa kushika kwa Yodano+ pobaivwene byobya byalongekele, boba badi mu ntanda ya ngulu, mu Shefela, ne ku mbadi yonso ya Dijiba Dikatampe,*+ ne kampalampala na Lebanona—bene Hiti, bene Amole, bene Kenani, bene Pedizi, bene Hivi, ne bene Yebushi+  basamba kipwano mwanda wa kukalwa na Yoshua ne na Isalela.+  Bekadi ba Ngibeone+ nabo baivwene byobya byalongele Yoshua ku Yediko+ ne ku Ai.+  Penepa balonga bya budyumuku, baomeka byakudya mu mifuko misasamuke beitūla pa bampunda babo, pamo ne milondo ya biseba yadi misabikesabike kadi misonesone;  ku maulu abo kwadi bikwabilo bisanikesanike, byele bilaka, kadi badi bavwele bivwalwa bisasamuke. Mikate yabo yonso ya mpao yadi myūmu, ikūkuka ne kukūkuka.  Ebiya baenda kudi Yoshua ku nkambi ku Ngilengale+ besamba nandi ne na bana-balume ba Isalela amba: “Tubatambe ku ntanda ya kulampe. Shi ke pano sambai netu kipwano.”  Ino bana-balume ba Isalela banena bene Hivi+ amba: “Padi mwikalanga’tu kubwipi netu. Le penepo tusa kusamba nenu kipwano namani?”+  Nabo balondolola Yoshua amba: “Twi bengidi* bobe.” Ebiya Yoshua webepangula’mba: “Le mwi bāni, ne komutamba kwine i kwepi?”  Nabo bamulondolola’mba: “Bengidi bobe batamba ku ntanda ya kulampe+ pa mwanda wa dijina dya Yehova Leza obe, mwanda twaivwene ntumbo yandi ne bintu byonso byaalongele mu Edipito+ 10  ne byonso byaalongele balopwe babidi bene Amole badi bobwa bukila* bwa Yodano: Mulopwe Shihone+ wa Heshebone ne Mulopwe Oka+ wa Bashane, wadi mu Ashetalote. 11  Ebiya bakulumpe betu ne bekadi bonso ba ntanda yetu betusapwidile amba: ‘Selai mpao ya mu lwendo mwende mukesambakane nabo. Mwibalombolei amba: “Tusa kwikala bengidi benu;+ shi ke pano sambai netu kipwano.”’+ 12  Ino mikate yotwaselele bu mpao yetu yadi ikidi na kyanga mu difuku dyotwatalukile ku mobo etu ketwiya kuno komudi. Pano mwimwenei banwe bene, ke myūmu keikūkuka ne kukūkuka.+ 13  Ne kadi ino milondo ya biseba yadi mipya potweiyujije, ino pano ibasabika.+ Ne bivwalwa ne bikwabilo byetu bibasanikasanika mwanda wa lwendo lulampe bininge.” 14  Ponkapo bana-balume basela’ko* bidibwa byabo bimo, ino kwipangula Yehova mpika.+ 15  Penepo Yoshua wapwana nabo+ ne kusamba nabo kipwano kya kwibaleka bōmi, kadi enka nenki ne bamfumu ba kitango nabo bebatyipila mutyipo.+ 16  Ku mfulo kwa mafuku asatu, pa kupwa kusamba nabo kipwano, baivwana’mba bashikatanga pabwipi, dya kubwipi’tu nabo. 17  Kupwa bene Isalela bataluka bafika ku bibundi byabo mu difuku dya busatu; bibundi byabo i Ngibeone,+ Kefila, Belote, ne Kidiata-Yeadimi.+ 18  Ino bene Isalela kebebatambilepo bulwi, mwanda bamfumu ba kitango bebatyipīle mutyipo mu dijina dya Yehova+ Leza wa Isalela. Ebiya kitango kyonso kyashilula kwiuningila bamfumu. 19  Penepo bamfumu bonso basapwila kitango kyonso amba: “Byotwebatyipīle mutyipo mu dijina dya Yehova Leza wa Isalela, ketunenwepo kwibalonga kibi. 20  Tusa kulonga namino: Ketusapo kwibepaya, kutyina’mba Leza waketufītyilwa mutyima pa mwanda wa mutyipo otwebatyipīle.”+ 21  Ebiya bamfumu babweja’ko amba: “Mwibalekei bōmi, ino mwibalekei bekale ke ba kutyaba nkuni ne ba kuteka mema a kitango kyonso.” Bino byo byebalaile bamfumu. 22  Kupwa Yoshua webeta kaebanena’mba: “Mwanda waka mwetudimbile kemunena’mba, ‘Tutamba ku kifuko kya kulampe bininge nenu,’ ino nanshi mushikatanga mu bukata mwetu?+ 23  Tamba pano mwi bafingwe mafingo,+ kadi mukekalanga nyeke mu bupika bwa kutyaba nkuni ne kuteka mema a njibo ya Leza wami.” 24  Nabo balondolola Yoshua amba: “Twalongele namino mwanda bengidi bobe balombwelwe myanda yonso amba Yehova Leza obe wasoñenye Mosesa mwingidi wandi kwimupa ino ntanda yonso ne konakanya bekadi bayo bonso ku meso enu.+ O mwanda twakwetwe moyo pa mwanda wa būmi bwetu* pa mwanda wenu,+ ye kine kyotwalongēle namino.+ 25  Shi ke pano tudi mu makasa enu. Mwitulongei byonso byomulanga’mba byo biyampe ne byoloke.” 26  Ne bino e byawebalongele; webapandije mu makasa a bene Isalela, nabo kebebepailepo. 27  Ino mu dyodya difuku Yoshua webatūla ke ba kutyaba nkuni ne ba kuteka mema a kitango+ ne a kisōkelo kya Yehova pa kifuko kyonso kyatonga,+ kadi badi enka nenki kufika ne dyalelo.+

Kunshi kwa Dyani

Ko kunena’mba, Meditelanea.
Nansha’mba “bapika.”
Ko kunena’mba, bukila bwa kutunduka.
Nansha’mba “babandaula.”
Nansha’mba “myuya yetu.”