Yoshua 6:1-27

  • Lubumbu lwa Yediko lubapone (1-21)

  • Lehaba ne kisaka kyandi abapande (22-27)

6  Ebiya Yediko wadi mushitwe mbū pa mwanda wa bene Isalela; kekwadipo wadi utamba nansha utwela.+  Kupwa Yehova wanena Yoshua amba: “Tala, napāna Yediko mu makasa obe ne mulopwe wandi ne ba bulwi bandi bakomokomo.+  Banwe bana-balume bonso ba bulwi mufwaninwe kujokoloka kibundi, mujokoloke kibundi musunsa umo. Mo momufwaninwe kulongela mu mafuku asamba.  Nena babitobo basamba-babidi basele masengo asamba-abidi a mikōko milume kumeso kwa Sanduku. Ino mu difuku dya busamba-bubidi, mufwaninwe kujokoloka kibundi misunsa isamba-ibidi kadi babitobo bafwaninwe kwila masengo.+  Shi abavumija lusengo lwa mukōko mulume—ponso pomwivwana’tu kuvuma* kwa lusengo—bantu bonso bafwaninwe kutūta kyungwe kikatampe kya divita. Kupwa lubumbu lwa kibundi lukapona pa nshi kakangabanga,+ kadi bantu bafwaninwe kwenda, muntu ne muntu olokēle patadidile mpala yandi.”  Ebiya Yoshua mwanā Nuna waityija babitobo kaebasapwila’mba: “Tekunai sanduku wa kipwano, kadi babitobo basamba-babidi bafwaninwe kusela masengo asamba-abidi a mikōko milume kumeso kwa Sanduku wa Yehova.”+  Kupwa wasapwila bantu amba: “Talukai, endai mukajokoloke kibundi, kadi bibumbo bya basola+ belumbile byabulwi bifwaninwe kutangidila Sanduku wa Yehova kumeso.”  Kadi enka mobalombwedile bantu kudi Yoshua, babitobo basamba-babidi badi baselele masengo asamba-abidi a mikōko milume ku meso a Yehova baenda kumeso kebavumija masengo’a, papo sanduku wa kipwano kya Yehova wibalonda.  Ne kadi bibumbo bya basola belumbile byabulwi byapita ku meso a babitobo badi bēla masengo, papo basola ba kunyuma balonda Sanduku kitatyi kyobadi bēla’nka kwila masengo. 10  Penepa Yoshua wasoñanya bantu amba: “Kemwakitūtai kyungwe kadi mawi enu keakevwanikwa. Kemwakilupulai kishima nansha kimo mu byakanwa byenu kufika ne difuku dyonkemunena’mba, ‘Tūtai kyungwe!’ Penepa kemutūta kyungwe.” 11  Ebiya waseleja Sanduku wa Yehova kebajokoloka nandi kibundi, bekijokoloka musunsa umo, kupwa papo bajokela mu nkambi balāla monka. 12  Abo bukya ke kesha Yoshua wabūka lubanga futwi, babitobo nabo basela Sanduku+ wa Yehova, 13  kadi babitobo basamba-babidi badi baselele masengo asamba-abidi a mikōko milume badi benda kumeso kwa Sanduku wa Yehova bēla’nka kwila masengo. Bibumbo bya basola belumbile byabulwi byadi bitangidile ku meso abo papo basola ba kunyuma balonda Sanduku wa Yehova kitatyi kyobadi bēla’nka kwila masengo. 14  Difuku dya bubidi bajokolokele kibundi musunsa umo, kupwa papo bajokela mu nkambi. Balongele enka namino mu mafuku asamba.+ 15  Mu difuku dya busamba-bubidi babūka lubanga futwi, kibangabanga’tu kikitamba, baenda bajokoloka kibundi muswelo umo onka misunsa isamba-ibidi. I enka mu dino difuku mobaendele bajokoloka kibundi misunsa isamba-ibidi.+ 16  Ebiya musunsa wa busamba-bubidi babitobo baila masengo, kadi Yoshua wasapwila bantu amba: “Tūtai kyungwe,+ mwanda Yehova wemupe kibundi! 17  Kibundi ne bintu byonso bidi’mo bifwaninwe konakanibwa fututu;+ byonso i bya Yehova. Enka Lehaba+ ndumba ye ukashala mūmi, aye ne bonso badi nabo mu njibo, mwanda wafile mikendi yotwatumine.+ 18  Ino mwilamei ku byobya bya konakanibwa fututu,+ kutyina’mba mwakabila kintu kya konakanibwa kemwikisela,+ mulonge nkambi ya Isalela ke kintu kya konakanibwa ne kwiiletela kyamalwa.*+ 19  Ino ndalama yonso ne olo* yonso ne bipungwa byonso bya mukuba ne bya byuma i bijila kudi Yehova.+ Bifwaninwe kwenda mu kibīko kya byabulēme kya Yehova.”+ 20  Penepa bantu batūta kyungwe padi pavuma masengo.+ Bantu pa kwivwana’tu kuvuma kwa lusengo ne pa kutūta kyungwe kikatampe kya divita, lubumbu lwapona pa nshi kakangabanga.+ Kupwa bantu bakatwela mu kibundi, muntu ne muntu olokēle patadidile meso andi, bakwata kibundi. 21  Baonakanya fututu byonso byadi mu kibundi na kipete, ne mwana-mulume ne mwana-mukaji, ne mwanuke ne mukulu, ne ñombe, ne mukōko, ne mpunda mwine kumo.+ 22  Kupwa Yoshua wanena bana-balume babidi bakabelele ntanda’ba amba: “Endai ku njibo ya ndumba, tambijai panja mwana-mukaji’wa ne bonso badi nabo, monka momwamutyipīle’kyo.”+ 23  Penepo bansongwalume batubedibedi’ba baenda batambija Lehaba, pamo ne shandi ne inandi ne banababo, ne bonso baadi nabo; bine batambija kisaka kyandi kyonso,+ bebaselela senene pantu kampanda panja pa nkambi ya Isalela. 24  Ebiya basōka na mudilo kibundi ne bintu byonso byadi’mo. Ino ndalama, ne olo, ne bintu bya mukuba ne bya byuma, bebipāna ke bya mu kibīko kya byabulēme kya njibo ya Yehova.+ 25  Enka Lehaba ndumba kete ne ba mu njibo ya shandi ne bonso baadi nabo e bo bapandijibwe na Yoshua;+ kadi ukishikete mu Isalela kufika ne dyalelo,+ mwanda wafile mikendi yatuminwe na Yoshua kubela Yediko.+ 26  Mu kine kitatyi’kya Yoshua watyipa uno mutyipo* amba: “Afingwe mafingo ku meso a Yehova muntu ukasomonwa kūbakulula kino kibundi kya Yediko. Kitatyi kyakāla kyalwilo kya kibundi ukajimija wandi mwana umbedi, kadi pakashimika bibelo byakyo ukajimija wandi mwana mukala.”+ 27  Enka nenki Yehova wadi na Yoshua,+ ne ntumbo yandi yasambakene ntanda yonso.+

Kunshi kwa Dyani

Nansha’mba “kudila kwa mulenga.”
Nansha’mba “makambakano; mushikwa.”
Nansha’mba “nsahabu.”
Bibwanika padi i, “watyipija bantu uno mutyipo.”