Yoshua 2:1-24

  • Yoshua watume batubedibedi babidi ku Yediko (1-3)

  • Lehaba wafi batubedibedi (4-7)

  • Mulao kudi Lehaba (8-21a)

    • Monji utyila pyā bu kiyukeno (18)

  • Batubedibedi abajokela kudi Yoshua (21b-24)

2  Penepa Yoshua mwanā Nuna watuma bana-balume babidi mu bufyafya bu batubedibedi tamba ku Shityime.+ Webalombola’mba: “Endai mukabele ntanda, nakampata Yediko.” Ebiya baenda bafika ku njibo ya ndumba witwa bu Lehaba,+ bashikata konka.  Penepo basapwila mulopwe wa Yediko amba: “Tala! Bana-balume bene Isalela abatwelanga muno buno bufuku kubela ntanda.”  Ponkapo mulopwe wa Yediko watuma musapu kudi Lehaba’mba: “Tambija bana-balume baile badi mu yobe njibo, mwanda i bāye kubela ntanda yonso.”  Ino mwana-mukaji’wa wasela bana-balume babidi’ba webafya. Kupwa wanena’mba: “I amo bana-balume abaiyanga kondi, ino nkyadipo ndyukile kobatambile.  Pokwadi ke kufīta, kebasake kushita kibelo kya kibundi, bana-balume’ba badi abatambe. Nkiyukilepo kobaendanga, ino shi mwibalonde bukidi musa kwibapeta.”  (Ino aye wadi mwibakandije pa musaka mwibafye mu tumityi twa bukonge twāle milongomilongo pa musaka.)  Penepa bana-balume bebalonda lubilo mu dishinda dyenda ku Yodano dya ku byabu bya lwa ntobwa,*+ bashityididila kibelo kya kibundi kupwa’tu kwa boba badi bebalonda kutamba.  Kumeso kwa bana-balume kulāla, wakanda pa musaka pobadi.  Wasapwila bana-balume’ba amba: “Ndyukile amba Yehova usa kwimupa ntanda+ kadi tubakwatwa moyo pa mwanda wenu.+ Bekadi bonso ba ntanda i bemutuyuke,+ 10  mwanda twaivwene mwaumijije Yehova mema a Dijiba Dityila ku meso enu pomwatambile mu Edipito+ ne byomwalongele balopwe babidi bene Amole, ba Shihone+ ne Oka,+ bomwaipaile bobwa bukila* bwa Yodano. 11  Potwaivwene ino myanda, mityima yetufwile,* kadi kekwadipo nansha umo wadi na bukankamane* pa mwanda wenu, mwanda Yehova Leza wenu i Leza momwa mūlu ne pano panshi pene.+ 12  Shi ke pano nemwisāshila, ntyipilei mu dijina dya Yehova amba, byonemulombola buswe bwa ndamatyidile, nenu lombolai buswe bwa ndamatyidile ku ba mu njibo ya tata; kadi mufwaninwe kumpa kiyukeno kikulupilwa.* 13  Mufwaninwe kupandija tata ne mama, ne banabetu bana-balume ne bana-bakaji, ne bonso bobadi nabo, kadi mufwaninwe kwitupandija* ku lufu.”+ 14  Penepo bana-balume’ba bamunena’mba: “Tusa kupāna būmi bwetu pangala pa būmi bwenu!* Shi kemusokwelepo byotwaile kulonga, nabya tusa kwimulombola buswe bwa ndamatyidile ne bubinebine pasa kwitupa Yehova ino ntanda.” 15  Kupwa webatūkijija pa dididisha na monji, mwanda yandi njibo yadi dya ku lubumbu lwa kibundi. Na bubine wadi ushikata pangala pa lubumbu.+ 16  Ebiya webalombola’mba: “Endai mu ntanda ya ngulu mukafyame’mo mafuku asatu, kutyina’mba boba bemulonda bakemusokola. Penepa shi boba bemulonda abajoka, papo mukokeja kwenda.” 17  Bana-balume bamutentulula’mba: “Tukekala bampikwa mambo mu uno mutyipo owetutyipija+ 18  poso’tu, potusa kubatwela mu ino ntanda, ukute uno monji wa nyushi ityila pyā pa dididisha dyowitutūkijija’po’di. Ufwaninwe kubungila shobe, ne inobe, ne banabenu ne bonso ba mu njibo ya shobe pamo nobe mu ino njibo.+ 19  Penepa muntu ense ukatambila panja pa bibelo bya njibo yobe, mashi andi akekala pa mutwe wandi, papo batwe tukekala bampikwa mambo. Ino shi kibi kibafikila* ense ushele nobe mu njibo, mashi andi akekala pa mitwe yetu. 20  Ino shi usokole byotwaile kulonga,+ tukekala bampikwa mambo mu mutyipo obe owetutyipija.” 21  Nandi amba: “Kikale enka momwanenena’mo.” Ponkapo webaleka bende, nabo beendela shabo. Kupwa, wakuta monji utyila pyā pa dididisha. 22  Ebiya bataluka baenda mu ntanda ya ngulu, bashikata konka mafuku asatu enka ne byajokele boba badi bebalonda. Boba badi bebalonda bebakimbile mu mashinda onso ino kwibatana mpika. 23  Penepa bana-balume babidi’ba batūka ku ntanda ya ngulu, baabuka munonga bafika kudi Yoshua mwanā Nuna. Bamusapwila myanda yonso yebafikīle. 24  Ebiya balombola Yoshua amba: “Yehova wetupe ntanda yonso’ya.+ Na bubine bekadi bonso ba ntanda i betutuyuke.”+

Kunshi kwa Dyani

Byabukwa lwa nshi.
Ko kunena’mba, bukila bwa kutunduka.
Kishima pa kishima i, “mityima yetu yasungulukile.”
Kishima pa kishima i, “kadi mushipiditu kewalangukilepo monka mu muntu.”
Nansha’mba “kiyukeno kya binebine.”
Nansha’mba “kupandija myuya yetu.”
Nansha’mba “myuya yetu ikafwa pa kyaba kyenu!”
Nansha’mba “shi kuboko kubatentekwa pa.”