Yoshua 11:1-23

  • Bibundi bya kungala bibakwatwa (1-15)

  • Bushindañani bwa Yoshua mu kīpi (16-23)

11  Yabine mulopwe wa Hazola pa kwivwana’tu uno mwanda, watuma musapu kudi Yobabu mulopwe wa Madona,+ ne kudi mulopwe wa Shimelona, mulopwe wa Akeshafa,+  ne balopwe badi ku ntanda ya ngulu ya kungala, boba ba mu malungu* a kunshi kwa Kinelete, boba ba mu Shefela ne ba pa matēlo a Dola+ dya kushika,  bene Kenani+ ba kutunduka ne kushika, bene Amole,+ bene Hiti, bene Pedizi, bene Yebushi ba mu ntanda ya ngulu, ne bene Hivi+ ba munshi mwa Helemone+ mu ntanda ya Mizipa.  Ebiya baiya ne bibumbo byabo byonso, milwi ne milwi mingi bininge pamo bwa musenga wa ku mukunko wa dijiba, pamo ne tubalwe tungitungi ne makalo a divita mangimangi.  Bano balopwe bonso beivwanikile kwitana, baiya batūla nkambi pamo ku mema a Melome mwanda wa kulwa na Isalela.  Ponkapo Yehova wanena Yoshua amba: “Kokibakwatwa moyo,+ mwanda kesha pa kino kitatyi’ki, nsa kwibapāna bonso batapwe kudi Isalela. Mufwaninwe kuketa tubalwe twabo mijilo,+ ne makalo abo nao mufwaninwe kwiasōka mu mudilo.”  Penepo Yoshua pamo ne bana-balume bonso ba bulwi bebatamba divita mu kitulumukila dya ku mema a Melome.  Yehova webapāna mu makasa a Isalela,+ nabo bebanekenya ne kwibalondalonda kufika ne ku Shidona Mukatampe+ ne ku Miselefote-Maimi+ ne ku Musanza wa Mizipe dya kutunduka, bebatapa enka ne byokekwapandilepo muntu nansha umo.+  Kupwa Yoshua webalonga mwamulombwedile Yehova; waketa mijilo ya tubalwe twabo, wasōka ne makalo abo mene mu mudilo.+ 10  Kupwa papo Yoshua wajoka wakwata Hazola, waipaya mulopwe wandi na kipete,+ mwanda Hazola ye wadi dibajinji mutwe wa ano malopwe onso. 11  Baipaya na kipete bantu bonso* badi’mo, bebonakanya fututu.+ Kekwashelepo kintu nansha kimo kifoma.+ Kupwa wasōka Hazola na mudilo. 12  Yoshua wakwata bibundi byonso bya bano balopwe, wanekenya balopwe babyo bonso na kipete.+ Webonakanya fututu+ enka mwasoñaninye’kyo Mosesa mwingidi wa Yehova. 13  Inoko Isalela kasōkelepo kibundi nansha kimo kyadi pa tungulu twabo kutalula’mo enka Hazola; kyo kibundi kimo kete kyasōkele Yoshua. 14  Bitūtwa byonso bya mu bino bibundi ne bimunanwa, bene Isalela bebiyete ke byabo.+ Ino bakubija bantu bonso na kipete kufika’nka ne byobatukije muntu ense.+ Kebashilepo muntu nansha umo ufoma.+ 15  Enka mwasoñaninye’kyo Yehova kudi Mosesa mwingidi wandi, mo monka mwasoñaninye’kyo Mosesa kudi Yoshua,+ Yoshua nandi walongela monka. Kekudipo kintu nansha kimo kyakalongelepo mu byonso byobasoñenye Mosesa kudi Yehova.+ 16  Yoshua wanekenya ino ntanda yonso, ntanda ya ngulu, Nengeba yense,+ ntanda yonso ya Ngoshena, Shefela,+ Alaba,+ ne ntanda ya ngulu ya Isalela ne Shefela* yayo, 17  kushilwila ku Lūlu lwa Halaka lukanda kufika ne ku Seila, kufika ne ku Bāla-Ngade+ mu Musanza wa Lebanona munshi mwa Lūlu lwa Helemone,+ kadi wakwata balopwe babyo bonso webanekenya, ne kwibepaya webepaya. 18  Yoshua walwa divita na bano balopwe bonso mu kitatyi kampanda. 19  Kekwadipo kibundi kyapwene na bene Isalela poso’nka bene Hivi bekalanga mu Ngibeone.+ Banekenye bibundi bikwabo byonso ku divita.+ 20  Yehova ye webalekele bomije mityima yabo+ kebatambe Isalela divita, mwanda wa ebonakanye fututu+ kwampikwa kafuku. Badi banenwe kutukijibwa, enka mobasoñaninye’kyo Mosesa kudi Yehova.+ 21  Mu kine kitatyi’kya Yoshua wakubija bene Anaki+ ba ku ntanda ya ngulu, ba ku Hebelona, Debile, Anaba, ne ntanda yonso ya ngulu ya Yuda ne ntanda yonso ya ngulu ya Isalela. Yoshua webonakanya fututu ne bibundi byabo bine kumo.+ 22  Kekwadipo mwine Anaki washele mu ntanda ya bene Isalela; bashele’nka+ mu Ngaza,+ mu Ngata,+ ne mu Ashedoda.+ 23  Penepa Yoshua watādila ntanda yonso’ya, enka mwalaile’kyo Yehova kudi Mosesa,+ kupwa Yoshua weipāna bu bupyani ku Isalela mungya bipindi byabo bya kwabanya mu bisaka byabo.+ Ebiya ntanda yakōkolokwa ku divita.+

Kunshi kwa Dyani

Nansha’mba “Alaba.”
Nansha’mba “myuya yonso.”
Nansha’mba “tumikuna.”