Yoba 1:1-22

  • Bululame bwa Yoba ne bupeta bwandi (1-5)

  • Satana utatana kukanina kwa mutyima wa Yoba (6-12)

  • Yoba wajimija bintu byandi ne bana (13-19)

  • Yoba katopekelepo Leza (20-22)

1  Kwadi muntu umo mu ntanda ya Uza, dijina dyandi i Yoba.*+ Wadi muntu moloke swā kadi mululame;*+ wadi utyina Leza ne kunyema bibi.+  Wabutwile bana basamba-babidi bana-balume ne bana-bakaji basatu.  Bimunanwa byandi byafikile pa mikōko 7 000, bangamedia 3 000, bañombe 1 000,* ne bampunda* 500, pamo ne bengidi bavule, enka namino’u waikala muntu mukatampe kutabuka bantu bonso ba Kutunduka.  Wandi mwana mwana-mulume ense wadi usoba masobo mu njibo yandi mu difuku dyatungile.* Badi beta’ko banababo bana-bakaji basatu kudya ne kutoma nabo.  Mafuku a masobo pa kupwa, Yoba wadi wibetyija mwanda wa kwibapandula. Penepo wabūka lubanga bwē, webalambwila bitapwa bisōkwe+ wa kyandi wa kyandi. Mwanda Yoba wadi unena’mba: “Padi bami bana i balonge bubi ne kufinga Leza mu mutyima wabo.” Mo mwadi mulongela Yoba mafuku onso.+  Ebiya difuku dyafikile dyatwelele bana ba Leza* wa bine+ kukemana ku meso a Yehova,+ ne Satana+ nandi watwela mu bukata mwabo.+  Penepo Yehova wanena Satana amba: “Le kotamba i kwepi?” Satana nandi walondolola Yehova amba: “Nadi mukajokoloke pa ntanda ne kunangakana’po koku ne koku.”+  Ebiya Yehova wanena Satana amba: “Le wadi ubamone* mwingidi wami Yoba? I kutupu muntu udi bwa aye pa ntanda. Aye i muntu moloke swā kadi mululame,*+ utyinanga Leza ne kunyema bibi.”  Ponkapo Satana walondolola Yehova amba: “Le Yoba utyinanga Leza bitupu?+ 10  Le kumusailepo lusao+ lwa kumukinga aye ne njibo yandi ne bintu byonso byadi nabyo? Ubaesela mingilo ya makasa andi,+ kadi bimunanwa byandi nabyo bibasambakana pa ntanda. 11  Nanshi olola kuboko kobe ukupile bintu byonso byadi nabyo, na bubine ukakufinga ku mpala yobe.” 12  Penepo Yehova wanena Satana amba: “Tala! Bintu byonso byadi nabyo bidi mu kuboko kobe.* Ino enka muntu mwine kokamutenteka kuboko kobe!” Ebiya Satana wataluka ku meso* a Yehova.+ 13  Penepo difuku dyadi didya bandi bana bana-balume ne bana-bakaji koku batoma vinyu mu njibo ya tutu wabo,+ 14  mukendi waiya kudi Yoba keunena’mba: “Bañombe badi badima, bampunda nabo badya kubwipi nabo 15  pebatambanga’dyo bene Sabe abebasela, abaipaya ne bengidi na kipete. Enka amiwa kete ye wapanda’ko kwiya kukulombola.” 16  Aye’tu ukīsamba, mukwabo nandi waiya kanena’mba: “Mudilo wa kwa Leza* wadi ubapone mūlu, ubasōka mikōko ne bengidi kadi ubebaloteja! Enka amiwa kete ye wapanda’ko kwiya kukulombola.” 17  Aye’tu ukīsamba, mukwabo nandi waiya kanena’mba: “Bene Kaladea+ abaiyanga bisumpi bisatu, abatambe bangamedia abebasela, abaipaya ne bengidi na kipete. Enka amiwa kete ye wapanda’ko kwiya kukulombola.” 18  Aye’tu ukīsamba, kadi mukwabo nandi waiya kanena’mba: “Bobe bana bana-balume ne bana-bakaji badi badya koku batoma vinyu mu njibo ya tutu wabo. 19  Ponkapo kivula kikatampe kibatambe mu ntanda mutuputupu, kibakupila mafinko aná a njibo, nayo ibaponena bankasampe, abafu. Enka amiwa kete ye wapanda’ko kwiya kukulombola.” 20  Penepo Yoba waimana, wasana kivwalwa kyandi, watenda ne nywene ku mutwe wandi; wapona pa nshi kaevukwila 21  kanena’mba: “Natambile mutaka munda mwa lolo,Kadi nkajoka mutaka.+ Yehova waleta,+ kadi Yehova wasela. Dijina dya Yehova ditendelwe nyeke.” 22  Mu bino byonso’bi, Yoba kalongelepo bubi nansha kulambika Leza amba walonga kintu kibi.*

Kunshi kwa Dyani

Pakwabo kishintulula’mba “Kintu kya Kushikibwa.”
Nansha’mba “muntu wampikwa kutopekwa kadi moloke swā.”
Kishima pa kishima i, “bisumpi 500 bya bañombe babidi babidi.”
Kishima pa kishima i, “bampunda bakaji.”
Nansha’mba “dyodi ku njibo ya yeu, dyodi ku njibo ya mukwabo.”
Uno i muneneno wa mu Kihebelu ufunkila pa bamwikeulu, bana ba Leza.
Kishima pa kishima i, “ubate mutyima padi.”
Nansha’mba “muntu wampikwa kutopekwa kadi moloke swā.”
Nansha’mba “mu lupusa lobe.”
Kishima pa kishima i, “mpala.”
Bibwanika padi i, “Mapeni.”
Nansha’mba “kutelela Leza kintu kyampikwa kwendela’mo.”